އުމުރުފުޅުން 34 އަހަރުގައި ފިންލޭންޑުގެ ބޮޑުވަޒީރުކަމަށް މިއަދު އައްޔަންވެވަޑައިގަތުމާއެކު، މާދަމާ (އަންގާރަ ދުވަހު) އެމަގާމާ ހަވާލުވެވަޑައިގަންނަވާއިރު، ދުނިޔޭގައި މިވަގުތު ހުންނެވި އެންމެ ޒުވާން ބޮވަޒީރުކަމުގައި ސެނާ މާރިން ވެވަޑައިގަންނަވާނެއެވެ.
ފިންލޭންޑުގައި ވެރިކަންކުރާ ވާތު ފިޔައިގެ ކޯލިޝަނުގެ މައި ޕާޓީ ސޯޝަލް ޑިމޮކްރެޓްސް އިން ޓްރާންސްޕޯޓް އެންޑްއ ކޮމިޔުނިކޭޝަންސް މިނިސްޓަރުކަމުގައި ހުންނެވި މާރިން ބޮޑުވަޒީރުކަމުގެ މަގާމަށް އައްޔަންކުރަން ނިންމީ، ބޮޑުވަޒީރުކަމުގައި ހުންނެވި އެންޓި ރިނޭ އިސްތިއުފާދެއްވުމާ ގުޅިގެންނެވެ. އޭނާ އިސްތިއުފާދެއްވި ކޯލިޝަނުގައި ހިމެނޭ ސެންޓަ ޕާޓީން އޭނާއަށް ކުރި ތާއީދު އަނބުރާ ގެންދިއުމުންނެވެ.
"އިތުބާރު އަލުން އުފެއްދުމަށް އަހަރުމެން ކުރަން ހުރި މަސައްކަތްތައް ވަރަށް ގިނަ." ޕާޓީގެ ލީޑަރަކު ހޮވުމަށް ނެގުނު ވޯޓު ހަނިގޮތަކަށް ކާމިޔާބުކުރެއްވުމަށް ފަހު މާރިން ވިދާޅުވިއެވެ.
ފިންލޭންޑުގައި ވެރިކަން ކުރާ ކޯލިޝަނުގައި ހިމެނޭ ފަސް ޕާޓީގެ ލީޑަރުންނަކީވެސް އަންހެނުންނެވެ. އޭގެ ތެރެއިން ހަތަރު ބޭފުޅުންނަކީ 40 އަހަރަށްވުރެ ހަނގު ބޭފުޅުންނެވެ.
މާރިން ވެވަޑައިގަންނަވާނީ ފިންލޭންޑުގައި މިހާތަނަށް ބޮޑުވަޒީރުކަން ކުރައްވާ އެންމެ ހަނގު ބޭފުޅާ ކަމުގައެވެ. އެހެންނަމަވެސް، އޭނާ ވިދާޅުވީ އެކަމާމެދު ނުވިސްނަވާ ކަމުގައެވެ.
"އަހަރެންގެ އުމުރު ނުވަތަ ޖިންސާ މެދު އެއް ގޮތަކަށްވެސް ނުވިސްނަން. އަހަރެން ވިސްނަނީ އަހަރެން ސިޔާސީ މައިދާނަށް ނުކުންނަން ޖެހުނު ސަބަބާއި، އެ ސަބަބުތަކަށްޓަކައި ވޯޓުލާމީހުންގެ އަހަރުމެންނަށް އިތުބާރުކުރި ސަބަބުތަކާ މެދު." މާރިން ވިދާޅުވިއެވެ.
ދުނިޔޭގައި މިވަގުތު ތިއްބެވި އެންމެ ޒުވާން ލީޑަރުންނަށް ބަލާއިރު، ނިއުޒީލޭންޑުގެ ބޮޑުވަޒީރު ޖެސިންޑާ އާޑާންގެ އުމުރުފުޅަކީ 39 އަހަރެވެ. ޔުކްރޭންގެ ބޮޑުވަޒީރު އޮލެކްސީ ހޮނުޗަރުކްގެ އުމުރުފުޅަކީ 35 އަހަރެވެ. އަދި ބުނެވޭ ގޮތުގައި އޮތުރު ކޮރެޔާގެ ޒައީމު ކިމް ޖޮންގް އުންގެ އުމުރުފުޅަކީވެސް މިހާރު 35 އަހަރެވެ.
ގިނެސް ވާލްޑް ރިކޯޑްސްއިން ބުނާ ގޮތުގައި ދުނިޔޭގައި މިވަގުތު ހުންނެވި އެންމެ ދޮށީ ބޮޑުވަޒީރަކީ މެލޭޝިޔާގެ ބޮޑުވަޒިރު މަހާތީރް މުޙައްމަދުއެވެ. އޭނާގެ އުމުރުފުޅުން 94 އަހަރެވެ.
