އައްޑޫ ސިޓީ ޕޮލިހުން ހިންގި އެކިއޮޕަރޭޝަން ތަކުންނާއި އެއާޕޯޓަށް ފުރަންދާ ފަތުރުވެރިންގެ އަތުން އަތުލައިފައިވާ ބަނގުރާ ފުޅިތަކެއް މިއަދު ނައްތާލައިފިއެވެ.
މިއީ 2016 ވަނައަހަރުން ފެށިގެން 2019 ވަނައަހަރާ ހަމައައަށް އެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް ގެނެސްފައި ބަނގުރާއެވެ.
މިއަދު ނައްތާލައިފައިވަނީ ޖުމްލަ 54 ފުޅިއެވެ. އެއީ އެއާޕޯޓަށް ފުރަންދާ ފަތުރުވެރިންގެ އަތުން އަތުލައިގެންފައިވާ ބަނގުރާގެ އިތުރަށް އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައި ބަނގުރާގެ ތެރެއިން މައްސަލަ މުޅިން ނިމިފައިވާ މައްސަލަތަކާ ގުޅުންހުރި އެއްޗެއްސެވެ.
މިތަކެތު ނައްތާލައިފައިވަނީ ގަމުގައި ހުންނަ "ރަތްގެ" ސަރަހައްދުގައެވެ. މިއަދު ނައްތާލި ބަނގުރާގެ ތެރޭގައި ގިނައީ ފަތުރުވެރިންގެ އަތުން އަތުލައިފައިވާ ބަނގުރާއެވެ.
މިތަކެތި ނައްތާލައިފައިވަނީ މިފަދަތަކެތި ނައްތާލަން ހަދާފައިވާ ޤަވާޢިދުގެތެރެއިން ކަމަށް ފުލުހުން ވިދާޅުވިއެވެ. އެ ނައްތާލައިފައިވަނީ ފަޅެއްކޮނެ ފަހަރަކު ފުޅިއެއް ވަޅަށް އޮއްސައިގެންނެވެ. ހުސްފުޅިތައްވެސް ވަނީ ތަޅާލުމަށްފަހު ވަޅުލައިފައެވެ.
މިއަދު ނައްތާލައިފައިވަނީ ގަން ޕޮލިސް ސްޓޭޝަނުގެ ދަށަށް ގެނެސްފައިވާ 42 ފުޅިއާއި ހިތަދޫ ޕޮލިސް ސްޓޭޝަންގެ ދަށަށް ގެނެސްފައިވާ 12 ފުޅިއެވެ.
