އިންޑިއާގެ އެހީއަކި ބަދަލެއް އެދިގެން ކޮށްދިން ކަމެއްނޫން:ހޫދު

އިންޑިއާއިން ރާއްޖެއަށް މިއަދުދިން އެހީއަކީ އޭގެ ބަދަލުގައި އެއްވެސް ކަމެއް އެދިގެންދިން އެހީއެއް ނޫންކަމަށް ރައީސް އޮފީހުން ވިދާޅުވެއްޖެއެވެ.

ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވީ ޒަމާނުއްސުރެން ރާއްޖެއާ އެންމެގާތް އެންމެ ރަހުމަތްތެރި ކަމެއް ބާއްވާ އަދި ދިމާވާ ހުރިހާ ކަމެއްގައި އެންމެބޮޑަށް އެހީތެރިވާ އިންޑިއާއިން މިއަދުދިން އެހީގެ ފަހަތުގައި އެއްވެސް އިތުރުކަމެއް ނުވާކަމަށެވެ.

އިންޑިއާއިން މިއަދު ވަނީ ރާއްޖެއަށް ވަރަށްބޮޑު އެހީތެރިކަމެއް ފޯރުކޮށްދީފައެވެ. އެގޮތުން ރާއްޖޭގެ މިލިޓްރީގައި ބޭނުން ކުރުމަށް މުޅިންއައު އުޅަނދެއް ވަނީ ކޯސްޓްގާޑަށް ހަދިޔާ ކުރައްވައިފައެވެ. އޭގެ ސަބަބުން ރާއްޖޭގެ ސަރަހައްދު ބެލެހެއްޓުމަށް މިހާރަށްވުރެ ފަސޭހަވެގެންދާނެއެވެ.

އޭގެ އިތުރަށް އިންޑިއާއިންވާނީ ރާއްޖޭގެ ތިން ރަށެއްގައި މަސްޕްލާންޓް  ގާއިމް ކޮށްދޭން ނިންމައި އެކަމުގެ އެހީވެސް ދެއްވައިފައެވެ. ތިން މަސް ޕްލާންޓް ގާއިމް ކުރުމަށް ހަމަޖެހިފައިވަނީ އައްޑޫ ސިޓީގެ 3 ރަށެއްގައެވެ. މަޢުލޫމާތު ލިބިފައިވާ ގޮތުގައި ތިން ފެކްޓްރީގެ އަގަކީ ގާތްގަނޑަކަށް 1.5 މިލިއަން ޑޮލަރެވެ. އެއީ މިސަރުކާރުގެ ގޭދޮށު މަސްފެކްޓްރީގެ ސިޔާސަތުގެ ދަށުން ގާއިމްކޮށްދެއްވާ ފެކްޓްރީއެވެ.

އިންޑިއާއިން މިއަދުވަނީ ރާއްޖެއަށް ރުޕޭކާޑު ވެސް ތަޢާރަފްކޮށްފައެވެ. މާލޭގެ މަގުބައްތިތައް ލެޑު ލައިޓަށް ބަދަލުކުރުމަށް ވެސް އިންޑީއާއިން ވަނީ އެހީދެއްވައިފައެވެ.

މިއެހީތައް ވީޑިއޯ މެދުވެރިކޮށް އިފްތިތާހުކޮށްދެއްވީ އިންޑިއާގެ ބޮޑުވަޒީރު ނަރެންދުރަ މޯދީއެވެ. ރައީސް އޮފީހުގައި މިއަދު ހަވީރު ބޭއްވި ރަސްމިއްޔާތެއްގައި މި އެހީތައް ދިވެހިސަރުކާރާ ޙަވާލުކޮށްދެއްވީ އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރެވެ. ރާއްޖޭގެ ފަރާތުން މިއެހީއާ ޙަވާލުވެ ވަޑައިގެންނެވީ ފޮރިން މިނިސްޓަރ ޢަބްދުﷲ ޝާހިދާއި، ޑިފެންސް މިނިސްޓަރ މާރިޔާ އަޙުމަދު ދީދީއާއި، ބީއެމްއެލްގެ ސީއީއޯ ޓީމް ސޯޔަރ އެވެ.