ހދ.ހަނިމާދޫން މީހަކު ރަހީނުކުރި މައްސަލައެއްގައި ދެމީހަކު ބަންދުކޮށްފި ކަމަށް ފުލުހުން ވިދާޅުވެއްޖެއެވެ.
ރަހީނުކުރެވިފައިވަނީ 22 އަހަރުގެ ދިވެހި ފިރިހެނެކެވެ. ރަހީނު ކުރުމުގެ އިތުރުން އޭނާއަށްވަނީ ބިރުދައްކައި އަނިޔާވެސް ކޮށްފައި ކަމަށް ފުލުހުން ވިދާޅުވިއެވެ. އެޒުވާނާ ރަހީނުކޮށްފައިވަނީ ޑިސެމްބަރު އެކެއްގައެވެ.
އޭނާ ރަހީނު ކުރިދުވަހު ފުލުހުންނަށް އެމަޢުލޫމާތު ލިބިފައިވާ ކަމަށާއި އެމައްސަލާގައި މިހާތަނަށް ވަނީ 24 އަހަރުގެ މީހަކާއި 27 އަހަރުގެ މީހަކު ބަންދުކޮށްފައި ކަމަށް ފުލުހުން ވިދާޅުވިއެވެ. އެދެމީހުން ބަންދުކޮށްފައިވަނީ ކޯޓު އަމުރެއް ހޯދައިހެންނެވެ.
އެ ދެ މީހުންގެ ބަންދާމެދު ގޮތެއް ނިންމަން ކުޅުދުއްފުށީ މެޖިސްޓްރޭޓު ކޯޓަށް ގެންދިޔުމުން އެކޯޓުން ވަނީ އެމީހުންގެ ބަންދަށް ދިހަ ދުވަސް ޖަހައިދީފައެވެ.
ރަހީނުކުރެވިފައިވާ މީހާ ފުލުހުންނަށް ސަލާމަތް ކުރެވިފައިވަނީ ޑިސެމްބަރ 2 ވަނަދުވަހު އެވެ. އޭނާ ސަލާމަތްކޮށްގެން ފުލުހުންވަނީ އޭނާ ހޮސްޕިޓަލަށް ގެންގޮސްފައެވެ.
މިއީ ތަހުގީގު ކުރަމުންދާ މައްސަލައަކަށްވާތީ މިވަގުތު އިތުރު މަޢުލޫމާތު ދެވެންނެތް ކަމަށް ފުލުހުންވަނީ ވިދާޅުވެފައެވެ.
