ރާއްޖެ އިސްލާމްވީ ދުވަސް ފާހަގަކުރުމުގެ ގޮތުން މިނިސްޓްރީ އޮފް އިސްލާމިކް އެފެއާޒާއި ހޯމް މިނިސްޓްރީ ގުޅިގެން ކުޑަކުދިންގެ ހަވީރެއް ބޭއްވުމަށް ނިންމަވައިފިއެވެ.
މި ހަވީރު ބޭއްވުމަށް ހަމަޖެހިފައިވަނީ މާދަމާ ހަވީރު 4:00 އިން 5:45 އަށެވެ. އަދި ރޭގަނޑު 8:00 އިން 10:00 އަށެވެ. ކުޑަކުދިންނަށް ޚާއްސަ މި ޙަރަކާތް ކުރިއަށްދާނީ އިސްލާމީ މަރުކަޒުގެ މާބުލް އޭރިއާގައެވެ.
ކުޑަކުދިންގެ މި ހަވީރުގައި 13 ސްޓޯލް ހުންނާނެއެވެ. މި ހަވީރުގައި ކުރިއަށް ގެންދާ ކުޅިވަރުތަކުގެތެރޭގައި މަސްބޭނުމާއި، މެއިޒް ގޭމާއި، ކޭން ނޮކް ޑައުންއާއި، ސޮޕޮންޖް ގޭމް ފަދަ އެތައް ކުޅިވަރެއް ހިމެނޭ ކަމަށް އިސްލާމިކް މިނިސްޓްރީން ވިދާޅުވިއެވެ. އޭގެ އިތުރަށް މަދަހަ ކިޔުމާއި، ޓެލެސްކޯޕް ބޭނުންކޮށްގެން ތަރިތަކާއި ހަނދު ބެލުމާއި، ތީރުޖެހުން ފަދަ ވަރަށް ތަފާތު ހަރަކާތްތައްވެސް ކުރިއަށް ގެންދިއުމަށްވަނީ ހަމަޖެހިފައި ކަމަށް އެމިނިސްޓްރީން ވިދާޅުވިއެވެ.
ކުޅިވަރުތަކުގައި ބައިވެރިވާ ކޮންމެ ކުއްޖަކަށްވެސް އެ ބައިވެރިވާ ހަރަކާތް ހިންގާ ސްޓޯލަކުން ހަދިޔާއެއް ލިބޭނެއެވެ. މިނިސްޓްރީ އޮފް އިސްލާމިކް އެފެއާޒްގެ އެކި ޑިޕާޓްމަންޓްތަކުގެ 7 ސްޓޯލެއްގެ އިތުރުން، އަޔާދީ ތަކާފުލް، އެމް.އެން.ޔޫ، އެކްސެލް އިންޓަނޭޝަނަލް ސްކޫލް އަދި މޯލްޑިވްސް ޙައްޖު ކޯޕަރޭޝަނުން ސްޓޯލްތައް މި ހަވީރުގައި ހުންނާނެއެވެ.
ކުޑަކުދިންނާ ގުޅޭ ގޮތަށް ތައްޔާރުކޮށްފައިވާ މި ހަރަކާތްތަކަކީ ވަރަށް ތަފާތު އަދި އެކުދިން ޝައުޤުވެރިވާނެ ހަރަކާތްތަކެއް ކަމަށްވެސް އިސްލާމިކް މިނިސްޓްރީން ވިދާޅުވިއެވެ.
މި ޙަރަކާތުގައި ވީހާވެސްގިނަ މީހުން ބައިވެރިވުމަށް ވެސް މިނިސްޓްރީން އެދިވަޑައިގަންނަވައެވެ.
