ހުކުރު ދުވަހު އިނގިރޭސިވިލާތުގެ ލަންޑަނުގެ ލަންޑަން ބްރިޖް ކައިރީގައި ވަޅިން ހަމަލާދީ ދެ މީހަކު މަރާލައި، ތިން މީހަކު ޒަޚަމްކޮށްލި ހަމަލާގެ ޒިންމާ އިސްލާމިކް ސްޓޭޓް (އައިސިސް) އިން އުފުލައިފިއެވެ.
އެ ޖަމައާތުން ހިންގާ ނިއުސް އެޖެންސީ އަޢުމާޤު މެދުވެރިކޮށް ނެރުނު ބަޔާނެއްގައި އެ ޖަމާއަތުން ބުނެފައި ވަނީ ލަންޑަނުގައި ހަމަލާދީފައި ވަނީ އެ ޖަމާއަތުގެ ހަނގުރާމަވެރިއަކު ކަމުގައެވެ. އޭނާ އެކަން ކޮށްފައި ވަނީ އެޖަމާއަަތާ ހަނގުރާމަކުރާ ގައުމުތަކުގެ ރައްޔިތުންނަށް ގެއްލުންދިނުމަށް ގޮވައިލުމުން އެކަމަށް އިޖާބަދިނުމުގެ ގޮތުން ކަމުގައެވެ. އެހެންނަމަވެސް، އެކަމުގެ އެއްވެސް ހެއްކެއް ދައްކާފައި ނުވެއެވެ.
ޓެރަރިޒަމްގެ ކުށުގައި މީގެ ކުރިން ޖަލަށްލައިި ފާއިތުވި އަހަރު ދޫކޮށްލި މީހަކަށް ލަންޑަނުގައި ވަޅިއެއް ހިފައިގެން ނުކުމެ އެތައް ބަޔަކަށް ހަމަލާދެވުނީ ކިހިނެއްތޯ ބެލުމަށް އިނގިރޭސިވިލާތުގެ ކައުޓަޓެރަރިޒަމް ފުލުހުން މިހާރު ވަނީ ތަހުގީގެއް ފަށާފައެވެ.
ކައުޓަޓެރަރިޒަމް ފުލުހުންގެ ވެރިޔާ ނީލް ބާސޫ ވިދާޅުވީ. 2017 ވަނަ އަހަރުވެސް ޓެރަރިސްޓް ހަަމަލާއެެއްގައި އެތައް ބަޔަކު މަރާލާފައިވާ ސަރަހައްދުގައި ވަޅިން ހަމަލާދިން އުސްމާން ޚާން (28 އަހަރު) ދިޔައީ ޖަލުން ދޫކޮށްލާ މީހުންނަށް ތައުލީމުދިނުމަށް ހިންގޭ ޕްރޮގްރާމެއްގައި ބައިވެރިވަމުންެނެވެ. ފުލުހުން ބުނީ ޓެރަރިޒަމްގެ ކުށެއްގައި 2012 ވަަަނަ ހައްޔަރުކުރި އުސްމާން ޚާން 2018 ވަނަ އަހަރު ދޫކޮށްލީ 'ލައިސެންސް' ގެ ދަށުންނެވެ. މާނައަކީ އޭނާ ވަކި ޝަރުޠުތަކެއް ފުރިހަމަކުރަން ޖެހެއެވެ. އެހެން ނޫނީ އަލުން ޖަލަށް ދާން ޖެހޭނެއެވެ.
ޕާކިސްތާނުގެ އާއިލާއަކަށް ނިސްބަތްވާ އުސްމާން ޚާންގެ މައްޗަށް 2013 ވަނަ އަހަރު 16 އަހަރަށް ޖަލަށްލުމަށް ހުކުމްކުރެއްވި ފަނޑިޔާރު ވަނީ އޭނާއަކީ 'ނުރައްކާތެރި ޖިހާދީ' އަކަށް ވާތީ 'ލައިސަންސް' ޕްރޮގްރާމްގެ ދަށުން އޭނާ ދޫކޮށްނުލުމަށެވެ. އެހެންނަމަވެސް، ޖަލުގައި 6 އަހަރު ހޭދަކުރުމަށް ފަހު ޖީޕީއެސް ޓެގެއް އަޅުވާފައި ދޫކޮށްލި މައްސަލަ މިހާރު ދަނީ އިތުރަށް ބަލަމުންނެެވެ.
