ރާއްޖޭގެ ފަޚުރުވެރި 31 ވަނަ ނަޞްރުގެ ދުވަހުގެ މުނާޞަބަތުގައި، އެމްއެންޑީއެފުން "ވިކްޓްރީ ރަން" މިއަދު ބާއްވައިފިއެވެ.
މިއަދު ހެނދުނު މާލޭގައި ކުރިއަށްގެންދިޔަ މި ދުވުން ފެށައިފައިވަނީ ހެނދުނު 6:00 ގައެވެ. ދުވުން ފެށީ ކަޅުތުއްކަލާކޮށިންނެވެ. ގިނަޢަދަދެއްގެ ސިފައިން ބައިވެރިވި ދުވުމުގައި މާލެ ވަށައިވަނީ ބުރެއްޖަހައިފައެވެ. މިދުވުމުގައި ޗީފްއޮފް ޑިފެންސް ފޯސް މޭޖަރޖެނެރަލް ޢަބްދުޝަމާލް ބައިވެރިވެ ވަޑައިގެންނެވިއެވެ.
"ވިކްޓްރީ ރަން" އަކީ އަސްކަރިއްޔާތަކުގައި ކާމިޔާބީ ފާހަގަކުރުމަށާއި އަސްކަރީ ސަފުތަކުގެ ބަދަހިކަން ދައްކައިދިނުމާއި، ޤައުމީ ރޫޙާއި ޖޯޝް ލަޝްކަރުގައި އަށަގެންނެވުމަށް ބާއްވަމުންގެންދާ ހަރަކާތެކެވެ. އަދި ވަކިން ޚާއްޞަކޮށް މި ހަރަކާތް ރަމްޒުކޮށްދެނީ ދީނާއި ޤައުމުގެ ޙައްޤުގައި ޝަހީދުވި މަތިވެރި އަބްޠާލުންގެ ޒިކުރާއެވެ.
