ގައުމު އިތުރަށް ހަލަބޮލިނުކުރުމަށާއި، ހަމަނުޖެހުން ހިންގާ މީހުން އިންސާފުގެ ކުރިމައްޗަށް ގެންނަވާނެ ކަމުގެ އިންޒާރު އިތިއޯޕިޔާގެ ބޮޑުވަޒީރު އަބީ އަޙްމަދު ދެއްވައިފިއެވެ. އޭނާ މިއިންޒާރުދެއްވާފައި މިވަނީ ނިމިގެން ދިޔަ ހަފުތާގައި އެގައުމުގައި ހިނގި ހަމަނުޖެހުންތަކުގައި 67 މީހުން މަރުވެފައި ވަނިކޮށެވެ.
"އިތިއޯޕިޔާ މީހުން އެކަތިގަނޑަށްވެ، އެއްބައެއްގެ ގޮތުގައި ނުތިބެއްޖެނަމަ އަހަރުމެންނަށް ކުރިމަތިވެފައި މިވާ އުނދަގޫ ހާލަތު އިތުރަށް ގޯސްވެގެން ދާނެ." ހަމަނުޖެހުންތައް ފެށުނު ފަހުން ފުރަތަމަ ފަހަރަށް އޭނާގެ އޮފީހުން ނެރުނު ބަޔާނެއްގައި ބޮޑުވަޒީރު ވިދާޅުވެފައި ވެއެވެ.
"ގާނޫނުގެ ވެރިކަން ނެގެހެއްޓުމަށާއި، ހަމަނުޖެހުން ހިންގާ މީހުން އިންސާފުގެ ކުރިމައްޗަށް ގެނައުމަށް، ފަސްޖެހުމެއްނެތި ސާބިތުކަމާއެކު އަހަރުމެން މަސައްކަތްކުރާނަން." އެ ބަޔާނުގައި ވެއެވެ.
ފާއިތުވި ބުދަ ދުވަހު ހަމަނުޖެހުންތައް ފެށުނީ، ސަރުކާރަށް ފާޑުކިއުއްވާ ބޭފުޅަކު ކަމުގައިވާ ޖަވާރު މުޙައްމަދު، އޭނާއަށް ސަރުކާރުން ދެމުން އައި ބޮޑީގާޑުން ޚިދުމަތް ހުއްޓާލައިފިކަމަށް ވިދާޅުވުމާ ގުޅިގެންނެވެ. ޖަވާރު މުޙައްމަދުއަކީ އަބީ އަޙްމަދު ވެރިކަމަށް ގެންނެވުމަށް މަސައްކަތްކުރެއްވި ބޭފުޅެކެވެ. އެހެންނަމަވެސް، ފަހުން ދެ ބޭފުޅުންގެ ގުޅުން ވަނީ ގޯސްވެފައެވެ.
ދާދިފަހުން ނޯބަލް ސުލްހައިގެ އިނާމު ލިބިވަޑައިގެންނެވި އަބީ އަޙްމަދު ތުހުމަތުކުރައްވާ ގޮތުގައި ހަމަނުހެޖުންތަކުގައި މިހާރު ވަނީ ނަސްލީ އަދި ދީނީ ހަމަނުޖެހުންތަކެއްގެ ކުލަވަރު ޖެހިފައެވެ.
"މި މައްސަލަ ދީނީ އަދި ނަސްލީ މައްސަލައަކަށް ބަދަލުކުރުމަށް މަސައްކަތްކުރެވިފައި ވޭ." އަބީގެ ބަޔާނުގައި ވެއެވެ.
އޭނާ އިތުރަށް ވިދާޅުވި ގޮތުގައި ހަމަނުޖެހުންތަކުގައި ގެތަކަށާއި، ވިޔަފާރިކުރާ ތަންތަނަށާއި، އަޅުކަންކުރާ ތަންތަނަށް ހަމަލާ ދީފައި ވާއިރު، އިތިއޯޕިޔާގެ އެތައް ރައްޔިތުންނެއް ވަނީ މަގުމަތިވެފައެވެ.
މައިގަނޑު ގޮތެއްގައި ހަމަނުޖެހުންތައް ހިނގާފައިވަނީ ވެރިރަށް އެޑިސްއަބާބާ އާއި، އޮރޯމިޔާ ސަރަހައްދުގައެވެ. ބޮޑުވަޒީރު އަބީ އަޙްމަދުއާއި، އޭނާއަށް މިހާރު ފާޑުވިދާޅުވަމުން ގެންދަވާ ޖަވާރު މުޙައްމަދުއަކީ އޮރޯމޯ ނަސްލަށް ލިސްބަތްވެވަޑައިގަންނަވާ ދެ ބޭފުޅުންނެވެ.
ދެ ބޭފުޅުންނަށް ތާއީދުކުރާ ގިނަ މީހުންނަކީ އޮރޯމޯ މީހުން ކަމުގައި ވާއިރު، އަންނަ އަހަރު ބާއްވާ އިންތިޚާބުގައި ޖަވާރު މުޙައްމަދު ބޮޑުވަޒީރު އަބީއާ ވާދަކުރައްވަމަން ނުކުމެވަޑައިގެންފިނަމަ، އެކަން އޭނާއަށް ބޮޑު ގޮންޖެހުމަކަށް ވާނެއެވެ.
