ފާއިތުވި ސެޕްޓެންބަރު މަހު އިސްރާއީލުގައި ބޭއްވުނު އާއްމު އިންތިޚާބަށް ފަހު ސަރުކާރެއް އެކުލަވާލުމުގެ މަސައްކަތް ހަވާލުކުރެވުނު މިހާރުގެ ބޮޑުވަޒީރު ބެންޖަމިން ނަތަންޔާހޫ އެ މަސައްކަތް ހުއްޓާލައި، އޭނާއަށް ސަރުކާރެއް އެކުލަވާނުލެވުނުކަން ރައީސު ރޫވެން ރިވްލީންއަށް އަންގައިފިއެވެ.
ރައީސު ރިވްލީން މިހާރު ވަނީ ސަރުކާރު އެކުލަވާލުމުގެ މަސައްކަތް އިންތިޚާބުގައި ނަތަންޔާހޫއާ ދާދި އެއްވަރަކަށް ގޮނޑި ކާމިޔާބުކުރި ބްލޫ އެންޑް ވައިޓް ޕާޓީގެ ލީޑަރު ބެނީ ގަންޓްޒްއާ ހަވާލުކުރަން ނިންމައިފައެވެ.
ކަނާތު ފިޔައިގެ ލިކޫޑް ޕާޓީގެ ލީޑަރު ނަތަންޔާހޫ މަސައްކަތްކުރީ ގިނަ ފަރާތްތަކެއް ހިމެނޭ ގައުމީ އެއްބައިވަންތަކަމުގެ ސަރުކާރެއް އެކުލަވާލެވޭތޯއެވެ. އެހެންނަމަވެސް، އޭނާ ވަނީ އެކަމުގައި ނާކާމިޔާބު ވެފައެވެ.
އުމުރުން 70 އަހަރުގެ ނަތަންޔާހޫ ވަނީ އެންމެ ފަހުން ބަލި ގަބޫލުކޮށް، އޭނާގެ ފޭސްބުކް ސަފުހާގައި އާއްމުކުރި ވީޑިޔޯއެއްގައި "ވަރުބަކަމެއްނެތި" މަސައްކަތްކުރުމާ އެކުވެސް އޭނާއަށް އެކަން ކާމިޔާބުނުކުރެވުނުކަމަށް އެއްބަސްވެފައެވެ.
"މަޝްވަރާގެ މޭޒުދޮށަށް ބެނީ ގްންޓްޒް ގެނެވޭތޯ އަހަރެންނަށް ކުރެވެން އޮތްހާ މަސައްކަތެއް ފާއިތުވި ހަފުތާތަކުގައި ވަނީ ކޮށްފައި. ގައުމީ އެއްބައިވައިވަންތަކަމުގެ ސަރުކުރެއް އެކުލަވާލެވޭތޯ ކުރެވެން އޮތްހާ މަސައްކަތެއް، އަދި އަނެއްކާ އިންތިޚާބެއް ބާއްވަން ނުޖޭހެ ގޮތް ހަދަން ކުރެވެން އޮތްހާ މަސައްކަތެއް ކުރިން." ނަތަންޔާހޫ ބުނެފައި ވެއެވެ.
"އަހަރެންނާ ސަރުކާރެއް އެކުލަވާލަން ހަވާލުކުރި ޒިންމާ އަހަރެން ދޫކޮށްލައިފިކަން ކުޑަ އިރުކޮޅެއް ކުރިން އަހަރެން ވަނީ ރައިސަށް އަންގާފައި." ނަތަންޔާހޫ އިތުރަށް ބުނެފައި ވެއެވެ.
ބެނީ ގަންޓްޒްއަކަށްވެސް ސަރުކާރެއް އެކުލަވާލުން ފަސޭހައެއް ނޫނެވެ. އިސްރާއީލުގެ ސިޔާސީ މަސްރަހު ދިރާސާކުރާ މީހުން ދެކޭ ގޮތުގައ އޭނާއަށް ވެސް އެކަން ކާމިޔާބެއް ނުކުރެވޭނެއެވެ.
ނަތަންޔާހޫގެ ދަށުމް އިސްރާއީލު ސިފައިންގެ ވެރިޔާގެ މަގާމުގައި ކުރިން ހުރި ގަންޓްޒްއާ އާ ސަރުކާރެއް އެކުލަވާލުމުގެ މަސައްކަތް ހަވާލުކުރަން ރައީސު ރިވްލީން ނިންމި ނަމަވެސް، ރަސްމީކޮށް އެކަމް ކުރާނީ ގާނޫނުހަދާ މަޖިލީސް، ކްނެސެޓަށް ހޮވިފައިވާ ޕާޓީތަކުން އެއްޗެއް ބުނުމަށް 3 ދުވަސް ދިނުމަށް ފަހުއެވެ.
އެއަށް ފަހު ސަރުކާރެއް އެކުލަވާލުމަށް ގަންޓްޒްއަށްވެސް ލިބޭނީ 28 ދުވަހެވެ.
ބްލޫ އެންޑް ވައިޓް ޕާޓިން ނެރުނު ބަޔާނެއްގައި ބުނެފައި ވަނީ ބެނީ ގަންޓްޒްގެ ޒައާމަތުގައި "ލިބަރަލް' ސަރުކާރެއް އެކުލަވާލުމަށް އެޕާޓީ އޮތީ ތައްޔާރަށް ކަމަށެވެ. "ލިބަރަލް" އިން އެ ޕާޓީ އިޝާރާތް ކުރަނީ ޔަހޫދީ ދީނީ ޕާޓިތައް ނުހިމެނޭ ސަރުކާރަކަށެވެ.
ފާއިތުވި ސެޕްޓެންބަރު މަހުގެ 17 ވަނަ ދުވަހު އޮތް އާއްމު އިންތިޚާބުގައި ބްލޫ އެންޑް ވައިޓް ޕާޓީން 33 ގޮނޑި ކާމިޔާބުކުރި އިރު ލިކޫޑް ޕާޓީއަށް ލިބިފައި ވަނީ 32 ގޮނޑިއެވެ. ކްނެސެޓްގެ އަޣުލަބިއްޔަތަކީ 61 ގޮނޑިއެވެ.
ފާއިތުވި އެޕްރީލް މަހުގެ 9 ވަނަ ދުވަހުވެސް އިސްރާއީލުގަ އާއްމު އިންތިޚާބެއް ބޭއްވިއެވެ. އެ ފަހަރުވެސް އެއްވެސް ޕާޓީއަކަށް ސަރުކާރެއް އެކުލަވާނުލެވުމުން ދެ ވަނަ އިންތިޚާބެއް ބޭއްވީއެވެ.
