ދީން ޙިމާޔަތް ކުރުމަކީ ސިޔާސީ އިންފާރު ތަކުން ބޭރުގައިވާ ކެމެއް ރައީސް ޔާމީން ވިދާޅުވެއްޖެއެވެ. އެމަނިކުފާނު މިހެން ވިދާޅުވީ "އަންނަނީ އަންނަނީ" މި ނަމުގައި އިދިކޮޅު ކޯލިޝަނުން މިރޭ ކާނިވަލުގައި ބޭއްވި އެއްވުމެއްގައި ވާހަކަފުޅު ދައްކަވަމުންނެވެ.
ދީންހިމާޔަތް ކުރުމަކީ ސިޔާސީ އިންފާރުން ބޭރުގައިވާ ކަމަކަށް ވާއިރު އެކަމުގައި ބަހުސެއް ނެތި ސީޔާސީ ލީޑަރުން ބައިވެރިވާން ޖެހޭ ކަމަށް ރައީސް ޔާމިން ވިދާޅުވިއެވެ. ދީނަށް ގަދަކަންދީ ދީނަށް ނަޞްރުދިނުމަކީ ސިޔާސީ އިންފާރުން ބޭރުގައިވާކަމެއްކަމަށާއި އެއީ ސިޔާސީ ވުމެއްނޫންކަމަށް ރައީސް ޔާމީން ވިދާޅުވިއެވެ. ސިޔާސީ ޕާޓީއަކަށް ވީނަމަވެސް އެވާހަކަ ދައްކަން ޖެހޭކަމަށް އެމަނިކުފާނު ވިދާޅުވިއެވެ. އެމްޑީޕީގެ ވެސް ގިނަ މެމްބަރުނަކީ ރާއްޖޭގައި އިސްލާމްދީން ނޫން ދީނަކަށް ޖާގަދޭން ބޭނުންނުވާނެ މެންބަރުންކަމަށް، ޤަބޫލުކުރައްވާ ކަމަށް ރައީސް ޔާމީން ވިދާޅުވިއެވެ.
އެމަނިކުފާނުގެ ވެރިކަމެއް، އަދިވެސް ރާއްޖެއަށް އަޔަސް ރާއްޖޭގެ މިނިވަންކަމާއި އިސްތިޤްލާލަށް އަރައިގަނެ ބަސް ބުނާނެ ބަޔަކު ނާންނާނެކަމަށް ވިދާޅުވިއެވެ. ދިވެހިންގެ ކަންކަން ނިންމާނީ ދިވެހިންކަމަށް ރައީސް ޔާމީން ވިދާޅުވަމުން ގެންދަވާ ވާހަކަފުޅު މިރޭގެ ޖަލްސާގައި ވެސް ތަކުރާރުކުރެއްވިއެވެ.
ޑިމޮކްރަސީއަކީ ވެރިކަން ކުރުމުގައި މިހާތަނަށް އެއަށްވުރެ ރަނގަޅު އެހެން ނިޒާމެއް ނެތް ނިޒާމެއްކަން ފާހަގަ ކުރައްވާ، ދުނިޔާގެ ހުރިހާ ތަނެއްގައި އެޑިމޮކްރަސީ އޮންނަނީ އެއްޞޫލުތަކެއް ނުވަތަ ބަހާތަކެއްގެ މައްޗަށް ނޫންކަމަށް ރައީސް ޔާމީން ފާހަގަ ކުރެއްވިއެވެ. އެކި ޤައުމުތަކުން ޑިމޮކްރަސީގެ އިންތަކާއި މިންތައް ޖަހައިފައި ވަނީ އެމީހުންނަށް ބޭނުންވާ މިންވަރަށް ކަމަށް ފާހަގަ ކުރެއްވިއެވެ. ކޮންމެ ޤައުމެއްގައި އެއްގޮތަކަށް ޑިމޮކްރަސީ ކަންކަން ނޯންނަނީ، ކޮންމެ ޤައުމަކުންވެސް އެމީހުން ޤަބޫލުކުރާ، ހިފަހަށްޓަން ބޭނުންވާ އުޞޫލުތަކުގެ މަށްޗަށް އިންތައްޖަހައިފައި ވާތީކަމަށް ވިދާޅުވިއެވެ.
"އަޅުގަނޑުމެން އިންތަކެއް ޖަހަން މިޖެހެނީ ބަދަލުނުކުރެވޭނެ ކަންތަތައްތަކެއްގެމަތީގައި ތިބުމުން. އެއަށް ޖާގަ ދީގެން އަޅުގަނޑުމެން ޑިމޮކްރަސީ ހަދަން މިޖެހެނީ" ރައީސް ޔާމީން ވިދާޅުވިއެވެ.
މީގެ ކުރިން މުއާހަދާތަކުގައި ދިވެހި ސަރުކާރުން ސޮއިކޮށްފައި ހުންނާނީ އެކަންކަމަށް ރިޢާޔަތްކޮށް، ރާއްޖެއަށް އުފުލޭނެ ވަރު ބުރައިގައިކަމަށް ވެސް ރައީސް ޔާމިން ފާހަގަކުރެއްވިއެވެ. އެނޫންކަންކަމުގައި ރާއްޖެއިން ވާނީ ރަސްގެ ލާފައިކަމަށް ވިދާޅުވިއެވެ. އިސްލާމްދީނުގެ ކަންކަމަށް ގޮންޖަހާ ކަންތައްތަކުގައި އެއްބަސްވެފައި ނުހުންނާނެކަމަށް ވިދާޅުވިއެވެ.
ދީނަށް ގޮންޖަހާ ރަސުލާއަށް ފުރައްސާރަކުރާ މީހުންނަކީ އެންމެ ބޮޑަށް ނަފަރަތާއި ރުޅިވެރިކަން އަމާޒުވާންޖެހޭ މީހުންކަމަށް ވިދާޅުވިއެވެ. އިސްލާމް ދީނުގެ ބޮޑެތި އުޞޫލީ މައްސަލަތަކަށް ގޮންޖަހާފައި ދިވެހިންތަކެއް ނުކުތީމާ އެކަމަށް ރައީސުލްޖުމްހޫރިއްޔާ ވިސްނަން ދެހަފަތާ ނަގައިގެން ނުވާނެކަމަށް ރައީސް ޔާމީން ވިދާޅުވިއެވެ. އެމްޑިއެންގެ ރިޕޯރޓާގުޅިހެން ރައީސުލްޖުމްހޫރިއްޔާ ކަންކުރެއްވި ގޮތާމެދު ފާޑުވިދާޅުވަމުން ރައީސް ޔާމީން ވިދާޅުވީ، ކަކަން ހޫނުކެނޑެންދެން ރައީސުލްޖުމްހޫރިއްޔާ ހުންނަވައިގެން ނުވާނެކަމަށާއި އެންމެ ފުރަތަމަ އެކަމަށް ޙައްޤުބަސް ބުނެ އެކަން ތަންފީޒުކުރަންޖެހޭ މީހަކީ ރައީސުލް ޖުމްހޫރިއްޔާކަމަށެވެ. އެމްޑީއެންގެ ރިޕޯރޓްގެ މައްސަލައިގައި ރައީސުލްޖުމްހޫރިއްޔާގެ ނާޤާބިލް ކަމާއި އަޅާނުލުން ދައްކުވައިދެނީ އެއީ އެމަނިކުފާނު އެހާ ކަންބޮޑުވާކަމެއް ނޫންކަމެއްކަމަށް ވެސް ރައީސް ޔާމީން ވިދާޅުވިއެވެ. އެމްޑީއެންގެ ރިޕޯޓްގައި އިސްލާމްދީނާއި، މާތް ރަސޫލާއަށް ފުރައްސާރަ ކޮށްފައިވާއިރު އެ މައްސަލައާ މެދު އެހާ "ވަޅޯ" ކޮށް އަމަލު ކުރެއްވުމުން އެ މަނިކުފާނު ހައިރާންވެ ވަޑައިގެންފައިވާ ކަމަށްވެސް ވިދާޅުވިއެވެ.
އެމްޑީއެންއާ ދޭތެރޭގައި ފިޔަވަޅު އަޅަންވީމާ އެކި ކަރަކަރައިގެ ސަފީރުން ވަޑައިގެން ރައީސަށް ދަންނަވަނީ ކޮން އިލްތިމާސެއްތޯ ވެސް ޔާމީން ވަނީ ސުވާލު އުފައްދަވައިފއަވެ. ކުރިންވެސް ފަސް އަހަރުގެ ސަރުކާރެއް ހިންގިކަމަށާއި އެފަދަ ކަންކަމުގައި ބަސްބުނާކަށް ބޭރުގެ މީހުންނަށް އަންނާކަށް ނުކެރޭނެކަން ފާހަގަކުރެއްވިއެވެ.
އެނެމެ މުހިންމީ މިވަންކަމާއެކު ދައުލަތެއް އޮތުންކަމަށް މިސަރުކާރަކުން ނުދެކޭ ކަމަށާއި މުސްތަޤިއްލު ދާޚީލީ އަދި ޚާރިޖީ ސިޔާސަތެއް އެބައޮތްތޯ ވެސް ޔާމީން ވަނީ ސުވާލު އުފައްދަވައިފައެވެ. ޚާރިޖީ ސިޔާސަތު ބިނާވެގެން ދަނީ ބޭރުގެ ކަރަކަރައިގެ މީހުން ބޭނުންވާ ގޮތަށް ކަމަށް ވާއިރު ދިވެހިން އަމިއްލަ ފަސްގަނޑުގައި ތިބީ ކިޙާވަރެއްގައިތޯ ވެސް ޔާމިން ސުވާލު އުފެއްދެވިއެވެ.
އެންމެ މުޤައްދަސް އެއްޗަކީ މިނިވަންކަމާއި ދައުލަތެއް އޮތުންކަމަށް، ކުރީގައި ދައުލަތުގެ ބޮޑުން ޤަބޫލުކުރިއަސް މިހާރު އެކަން އެގޮތަށް ނުހިނގާކަން ރައީސް ޔާމީން ފާހަގަ ކުރެއްވިއެވެ. ދިވެހި ފަސްގަނޑުން ލިބެންވާ ފުރިހަމަ މަންފާ ، ލިބެންވާނީ ދިވެހިންނަށް ކަމަށްވެސް މިހާރުގެ ސަރުކާރުން ޤަބޫލުނުކުރާކަމަށް ރައީސް ޔާމިން ތުހުމަތުކުރެއްވިއެވެ.
