ސީރިޔާގެ އިރުއުތުރު ސަރަހައްދު ކުރުދީ 'ޓެރަރިސްޓުން' ގެ ކިބައިން ސަލަމާތްކޮށް އެ ސަރަހައްދު އަމާންކުރުމުގެ ނަމުގައި ތުރުކީ އެސަރަހައްދައި އަރައި ދެމުންދާ ހަމަލާތަކުގެ ސަބަބުން އެތައް ހާސް އާއްމުން އެ ސަރަހައްދު ދޫކޮށް ދާން ފަށައިފިއެވެ.
މިހާރުވެސް 60 ހާސް މީހުން ގެދޮރު ދޫކޮށް ހިޖުރަކޮށްފިކަމަށް އިންސާނީ ހައްގުތައް ރައްކާތެރިކުރުމަށް މަސައްކަތްކުރާ ޖަމާއަތަކުން ވަނީ ބުނެފައެވެ.
"ބުދަދުވަހުއްސުރެ 60 ހާސް މީހުން ވަނީ ސަރަހައްދީ ރޮނގާ ކައިރީ ހިސާބުތައް ދޫކޮށް ގޮސްފައި. ގިނަ މީހުން ދަތުރުކުރީ އިރަށް، (ސީރިޔާގެ) ހަސަކާއާ ދިމާއަށް." ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުނެފައި ވެއެވެ.
ސީރިޔާގެ އިދިކޮޅު ހަނގުރާމަވެރި ޖަމާއަތްތަކާ ހަވާލާދީ ބައެއް ޚަބަރުތައް ބުނާ ގޮތުގައި ތުރުކީ ސިފައިން މިހާރު ވަނީ ސީރިޔާގެ ދެ ރަށެއް ކަމުގައިވާ ތައްލު އަބްޔަޟު އަދި ރައުސުލް ޢައިނު ހިސާރުކޮށަފައެވެ. އަދި އެ ދެ ރަށުގެ ވަށައިގެންވާ 11 އަވަށެއް ހިފައިފައެވެ.
އެ ސަރަހައްދުން ލިބޭ ރިޕޯޓުތައް ބުނާ ގޮތުގައި ތުރުކީ ސިފައިން ވަނީ ސީރިޔާގެ ކުރުދީ ހަނގުރާމަވެރި ޖަމާއަތް ޕީޕަލްސް ޕްރޮޓެކްޝަން ޔުނިޓްސް (ޕީޕީޔޫ) ގެ 174 ހަނގުރާމަވެރިން މަރާލާފައެވެ. ޕީޕީޔޫ އަކީ ތުރުކީން ޓެރަރިސްޓް ޖަމާއަތެއް ކަމުގައި ބަލާ ތުރުކީގެ ކުރުދީ ހަނގުރާމަވެރި ޖަމާއަތް ކާޑިޝް ވާކާސް ޕާޓީ (ޕީކޭކޭ) އަށް ތާއީދުކުރާ ބައެކެވެ. އަނެއްކޮޅުން ސީރިއަން ޑިމޮކްރެޓިކް ފޯސަސް (އެސްޑީއެފް) އިން ބުނެފައި ވަނީ ތުރުކީގެ ވައިގެ ހަމަލާތަކުގެ ސަބަބުން އާއްމުންގެ 9 މީހުން މަރުވެފައިވާ ކަމުގައެވެ.
ސީރިޔާގެ ދާޚިލީ ހަނގުރާމައިގައި، ކުރުދީންނަކީ ހުޅަނގުގެ ގައުމުތަކުގެ އެކުވެރިންނެވެ. އަދި ތުރުކީއަކީ އެމެރިކާއާއި ގާތް، ނޭޓޯގެ މެންބަރެކެވެ. މިހެންވުމުގެ ސަބަބުން ދުނިޔޭގެ ބޮޑެތި ގައުމުތަކުން ތިބީ ތުރުކީގެ ހަމަލާތަކާ ގުޅިގެން ޖެހޭނީ ކޮންއަތަކަށް ކަން ނޭނގިފައެވެ.
ތުރުކީން ސީރިޔާގެ އިރުއުތުރުގައި ހިންގާ އަސްކަރީ އޮޕަރޭޝަން ކުށްވެރިކުރަން އދ.ގެ ސަލާމަތީ މަޖިލީހުގައި ކުރި މަސައްކަތްވެސް ވަނީ ނާކާމިޔާބުވެފައެވެ. ޔޫރަޕްގެ ފަސް ގައުމު ކަމުގައިވާ ފްރާންސް، ޖަރުމަނު، ބެލްޖިއަމް، އިނގިރޭސިވިލާތް އަދި ޕޮލެންޑު ގުޅިގެން ތުރުކީގެ އަސްކަރީ އޮޕަރޭޝަން ކުށްވެރިކޮށް ސަލާމަތީ މަޖިލީހަށް ހުށަހެޅި ގަރާރު އެމެރިކާއާއި ރަޝިޔާއިން ވަނީ ވީޓޯކޮށްލާފައެވެ.
ސީރިޔާގައި ހަރަކާތްތެރިވާ ކުރުދީ ޖަމާއަތްތަކާ ދެކޮޅަށް ހަމަލާދޭން ތުރުކީން ރާވާތާ ދުވަސްތަކެއް ވެއްޖެއެވެ. ނަމަވެސް އެކަށް ހުރަހަކަށް ވެފައި އޮތީ އެ ސަރަހައްދުގައި އެމެރިކާ ސިފައިން ތިބުމެވެ. އެމެރިކާ ސިފައިން އެ ސަރަހައްދުން ފަހަތަށް ޖެހި، ތުރުކީ ސިފައިން އަރައިގަތުމަށް މަގުފަހިކުރުމާއެކު ތުރުކީން ވަނީ ކުރުދީންނާ ދެކޮޅަށް އަސްކަރީ އޮޕަރޭޝަން ފަށާފައެވެ.
