ތުރުކީ ސިފައިން އިރުއުތުރު ސީރިޔާއަށް ވަނުމަށް ފުރުސަތުދިނުމުގެ ގޮތުން އެމެރިކާ ސިފައިން އެ ސަރަހައްދުން ފަހަތަށް ޖެހެން ފަށައިފިއެވެ. އެ ސަރަހައްދުގައި ހަރަކާތްތެރިވާ ކުރުދީ ހަނގުރާމަވެރިން ބުނީ، މިއީ އިސްލާމިކް ސްޓޭޓާ ދެކޮޅަށް އެމީހުން ހޯދީ ކާމިޔާބީ އަނެއްކޮޅަށް ޖަހާނެ ކަމެއް ކަމުގައެވެ.
ކުރުދީ ހަނގުރާމަވެރިން ވަނީ އިސްލާމިކް ސްޓޭޓް ބަލިކުރުމުގައި މުހިއްމު ދައުރެއް އަދާކޮށްފައެވެ. އެހެންނަމަވެސް، ތުރުކީން ދެކެނީ އެއީ ޓެރަރިސްޓުން ކަމުގައެވެ.
"ތުރުކީން ކުރީއްސުރެ ރާވަމުން އައިގޮތަށް، ސީރިޔާ އުތުރަށް އެމީހުން ވަރަށް އަވަހަށް އަރާނެ. އެމެރިކާގެ ސިފައިން އެ އޮޕަރޭޝަނަށް އެހީއެއް ނުވާނެ. އަދި އެކަމުގައި ބައިވެރިވެސް ނުވާނެ. އަދި އެ ސަރައްދާއި ކައިރި ހިސާބުގައި އެމެރިކާ ސިފައިން ނުވެސް ތިބޭނެ." ވައިޓް ހައުސްގެ ޕްރެސް ސެކްރެޓަރީ ރޭގެ ވަގުތެއްގައި ނެރުއްވި ބަޔާނެއްގައި ވެއެވެ.
މި ބަޔާނާ ގުޅިގެން ތުރުކީގެ ރިޔާސީ ތަރުޖަމާނު އިބްރާހީމް ކާލިން ވިދާޅުވިގޮތުގައި، ސީރިޔާގެ އުތުރުގައި ތުރުކީން ގާއިމުކުރަން އުޅޭ 'އަމާން ސަރަހައްދު'ގެ ބޭނުމަކީ، ޓެރަރިސްޓުން އެ ސަރަހައްދުން ހުސްކޮށް ސަރަހައްދު 'ސާފުކުރުމާ'އި، ސީރިޔާގެ ބިމަށް އެގައުމުގެ ރެފިއުޖީން އައުމަށް މަގުފަހިކުރުމެވެ.
އެމެރިކާގެ ކުއްލި ނިންމުން އައިސްފައި މިވަނީ، ދާދި ފަހުން އެމެރިކާގެ ރައީސު ޑޮނާލްޑް ޓްރަމްޕްއާއި ތުރުކީގެ ރައީސު ފޯނުން ވާހަކަފުޅުދައްކަވައި، ސީރިޔާގެ އުތުރުގައި ގާއިމުކުރާ 'އަމާން ސަރަހައްދާ' ބެހޭގޮތުން މަޝްވަރާކުރައްވާފައި ވަނިކޮށެވެ.
ތުރުކީ ސިފައިންނަށް ތަންދީފައި އެމެރިކާ ސިފައިން ފަހަތަށް ޖެހުމުން، މައިގަނޑު ގޮތެއްގައި ކުރުދީ ހަނގުރާމަވެރިންގެ މައްޗަށް އެކުލެވޭ ސީރިއަން ޑިމޮކްރެޓިކް ފޯސަސް (އެސްޑީއެފް) ވަނީ އެކަން ކުށްވެރިކޮށްފައެވެ.
"އެމެރިކާ ސަފައިންވަނީ އެމީހުން ކުރާނެކަމަށް ބުނި ކަން ނުކޮށް، ތުރުކީ ސަރަހައްދީ ރޮނގު ކައިރިން އެމީހުންގެ ސިފައިން ބާލާފައި. މިހާރު ތުރުކީން އެދަނީ އުތުރު އަދި އިރުމަތީ ސީރިޔާއަށް އަރައިގަތުމުގެ މަޝްރޫއަކަށް ތައްޔާރުވަމުން." އެސްޑީއެފުން ނެރުނު ބަޔާނެއްގައި ވެއެވެ.
"ތުރުކީން ސީރިޔާގެ އިރުމައްޗާއި އުތުރުގައި ކުރިއަށް ގެންދާ އޮޕަރޭޝަން އަހަރުމެން އިސްލާމިކް ސްޓޭޓާ ދެކޮޅަށް ކުރާ ހަނގުމާއަށް ވަރަށް ބޮޑަށް ނޭދެވޭ އަސަރުކުރާނެ." އެ ބަޔާނުގައި ވެއެވެ.
ތުރުކީ ސަރުކާރުން އަބަދުވެސް ދެކެމުން އަންނަނީ ކުރުދީ ހަނގުރާމަވެރިންނަކީ ޓެރަރިސްޓުން ކަމުގައެވެ. ޕީކޭކޭ ތުރުކީ ކުރުދީ ޖަމާއަތްތަކުން ތުރުކީ ސަރުކާރާ ދެކޮޅަށް ހަނގުރާމަކުރާތީއެވެ. އެހެންނަމަވެސް، އެމެރިކާ ސިފައިންގެ މަދަދާއެކު، އިސްލާމިކް ސްޓޭޓް ފަހަތަށް ޖައްސާލުމުގައި އެންމެ މުހިއްމު ދައުރެއް އަދާކޮށްފައި ވަނީ ކުރުދީ ހަނގުރާމަވެރިންނެވެ.
ތުރުކީގެ އޮޕަރޭޝަނުގެ ސަބަބުން، އެ ސަރަހައްދުގެ ކޭންޕުތަކުގައި ތިބި އިސްލާމިކް ސްޓޭޓްގެ ހަނގުރާވެރިންގެ އާއިލާތަކުން ވެސް ދަނީ އެމީހުންނަށް ވާނެ ގޮތަކާމެދު ކަންބޮޑުވުން ފާޅުކުރަމުންނެވެ. އެ ސަހަރައްދުގެ ކޭންޕު ތަކުގައި މިފަދަ 70 ހާސް މީހުން އެބަތިއްބެވެ.
