މޯލްޑިވް ގޭސް ޕްރައިވެޓު ލިމިޓެޑަށް ބޭނުންވާ ޓެކުނިކަލް މީހުން ތަމްރީން ކުރުމަށްޓަކައި ވަރަށް އަވަހަށް ސްކޮލަރޝިޕް ފުރުސަތު ހުޅުވައިލައްވާނެ ކަމަށް އެކުންފުނިން ވިދާޅުވެއްޖެއެވެ.
މޯލްޑިވްގޭސްގެ މެނޭޖިންޑިރެކްޓަރ ޝަޒައިލް ޝިޔާމް ވިދާޅުވީ އެފުރުސަތު މިއަހަރު ނޫނީ އަންނަ އަހަރު ހުޅުވައިލައްވާނެކަމަށެވެ. އޭނާ ވިދާޅުވީ ފުރަތަމަ ބައްލަވާނީ ކުންފުނީގައި މިހާރުވެސް މަސައްކަތް ކުރައްވާ މީހުންނަށް އެފުރުސަތު ދީގެން ކުންފުނީގެ ތެރެއިން މީހުން އުފައްދަން ކަމަށެވެ. ކުންފުނީން މީހުން ނުވެއްޖެ ކަމަށްވާނަމަ އެފުރުސަތު ޢާއްމުކޮށް ހުޅުވައިލަވާނެ ކަމަށް އޭނާ ވިދާޅުވިއވެ. އެކަމަކު ޢާއްމުކޮށް ހުޅުވާލާ ފުރުސަތުގައި ސްކޮލަރޝިޕް ދޭނީ ކިޔަވައިގެން އައިސް މޯލްޑިވްގޭސްގައި މަސައްކަތް ކުރުން ޝަރުތުކޮށްފައެވެ.
"މިއަހަރުތެރޭ އެހެންނޫނީ އަންނަ އަހަރު ސީދާ ރާއްޖެއިން ބޭރުން ޓެކުނިކަލް މީހުން ތަމްރީން ކުރަން އަޅުގަނޑުމެން ސްކޮލަޝިޕް ހުޅުވާލާނަން އިންޓަރނަލީ. އެތެރެއިން ނުލިބިއްޖެއްޔާ ޕަބްލިކުން ނަމަވެސް ބަޔަކު ހޯދައިފައި އަޅުގަނޑުމެން ފޮނުވާނަން ތަމްރީން ކުރަން ރާއްޖެއިން ބޭރަށް. ކިޔަވައި ނިމިގެން އައިސް މޯލްޑިވް ގޭސްގައި މަސައްކަތްކުރާ ގޮތަށް،" ޝަޒާއިލް ވިދާޅުވިއެވެ.
އެކުންފުނިން މިހާރުވެސް ގެންދަނީ ރާއްޖެއިން ބޭރަށް މީހުން ފޮނުވައިގެން މީހުން ތަމްރީން ކުރަމުނެވެ. އަދި ބޭރުން މީހުން ގެނެސްގެން ވެސް ކުންފުނީގެ މީހުންނަށް ތަމްރީން ދެއްވަމުން ގެންދަވާ ކަމަށް ޝަޒާއިލް ވިދާޅުވިއެވެ.
