ނޫސްވެރިޔާ އަޙްމަދު ރިޟްވާން ޢަބްދުﷲގެ މަރާ ގުޅޭގޮތުން، ތުޙުމަތު ކުރެވޭ ފުލުހުން ހައްޔަރުކުރަންޖެހޭ ޤާނޫނީ ސަބަބެއް ނެތްކަމަށް ފުލުހުންގެ އިދާރާއިން ބުނެފިއެވެ. މިކަން ހާމަކުރައްވައިފައި ވަނީ ފުލުހުންގެ އިދާރާއިން ނެރުއްވި ނޫސްބަޔާނެއްގައެވެ.
ނޫސް ބަޔާނުގައި ބުނެފައިވަނީ، ގޮތް ނޭގޭ މަރުތަކާބެހޭ މައްސަލަތައް ތަޙްޤީޤްކުރާ ކޮމިޝަނާއި ކުރެވުނު މުޢާމަލާތްތަކުން، އެކޮމިޝަނުން ނެރެފައިވާ، ރިލްވާނުގެ މަރާގުޅޭ ރިޕޯރޓްގައި މިހާތަނަށް ފާހަގަ ކުރައްވައިފައިވާ ފުލުހުންގެ މައްޗަށް ޖިނާޢީ ދަޢުވާ ކުރެވޭފަދަ ހެކިތަކެއް ލިބިފައި ނުވާކަމަށެވެ. އަދި ތުޙުމަތު ކުރެވޭ ދެފުލުހުން ހައްޔަރުކުރަންޖެހޭ ފަދަ ޤާނޫނީ ސަބަބުތަކެއް އޮތްކަމަށް އެކޮމިޝަނުން ނުދެކޭ ކަމަށެވެ. ނަމަވެސް އިދާރީ ގޮތުން އަޅަން ޖެހޭ ފިޔަވަޅު އެޅުމަށްޓަކައި ފުލުހުންގެ އިދާރާއިން އެ ފުލުހުންގެ މައްސަލަ ތަޙްޤީޤްކުރުމަށް ފެންނަކަމަށެވެ. ތުޙުމަތު ކުރެވޭ ދެ ފުލުހުންނަކީ ފުލުހުންގެ އިންޓެލިޖެންސް ދެ އޮފިސަރުންކަމަށްވާ މުޙައްމަދު ޖިނާހާއި އިބްރާހީމް ރިއްފަތެވެ.
ތަޙްޤީޤަށް ހުރަސް އެޅިދާނެތީ މި ދެފުލުހުން ހައްޔަރު ކުރުމަށް ކޯޓް އަމުރުރަކަށް އެދުމަށް އޭޓާނީ ޖެނެރަލް މިމަހު ފަސްވަނަ ދުވަހު ސިޓީއަކުން ވަނީ ފުލުހުންނަށް ދަންނަވައިފައި ކަމަށް ނޫސްބަޔާނުގައި ވެއެވެ. ނަމަވެސް މިމަހު ފަސްވަނަ ދުވަހުގެރޭ ރިޔާސީ ކޮމިޝަނާ ފޯނުން ކުރެވުނު މުޢާމަލާތުގަޔާއީ އޭގެކުރިން ބޭއްވުނު ބައްދަލުވުންތަކުގައިވެސް އެ ދުފުލުހުން ހައްޔަރު ކުރަންޖެހޭ ޤާނޫނީ ސަބަބެއް ނެތްކަމަށް ބުނެފައިވާކަމަށް ފުލިހުންގެ ނޫސްބަޔާނުގައި ވަނީ ބުނެފައެވެ. މިމަހު ފަސްވަނަ ދުވަހުގެ ރޭ އެކޮމިޝަނުން ފޮނުވި ސިޓީއެއްގައި ވެސް އެމައްސަލައާ ގުޅިގެން ތުޙުމަތު ކުރެވޭ ފުލުހުންގެ މައްސަލަ ތަޙްޤީޤް ކުރުމަށް އެދިފައިވާކަމަށް ނޫސްބަޔާނުގައި ވަނީ ބުނެފައެވެ.
ރިޟްވާންގެ މަރާގުޅިގެން ތުޙުމަތު ކުރެވޭ ފުލުހުންގެ މައްސަލަ ތަޙްޤީޤ ކުރުމަށް އެޓާނީ ޖެނެރަލް އެދިވަޑައިގެންނެވުމުގެ ކުރިންވެސް މައްސަލައިގައި ތުޙުމަތުކުރެވޭ ޖިނާހާއި ރިއްފަތު މައްސަލަ އިދާރީ މައްސަލަ އެއްގެ ގޮތުގައި ތަޙްޤީޤްކުރަން ފަށްޓަވައިފައިވާކަމަށް ނޫސް ބަޔާނުގައި ވަނީ ބުނެފައެވެ. އެ ދެ ފުލުހުން މިމަހު ފަސްވަނަ ދުވަހު ވަޒީފާގެ މަސްޢޫލިއްޔަތުން ވެސް ދުރުކުރައްވައިފައިވާ ކަމަށް ފުލުހުންގެ ބަޔާނުގައި ބުނެއެވެ. މައްސަލަ ބަލާ ޑިސިޕްލިނަރީ ބޯޑަށް މިދެފުލުހުންގެ މައްސަލަ ހުށަހެޅުމަށް ތައްޔާރުވަމުންދާކަމަށް ވެސް ނޫސްބާނުގައި ބުނެފައި ވެއެވެ.
