ރާއްޖޭގެ ކުރީގެ ރައީސުލްޖުމްހޫރިއްޔާ އަދި ޕީޕީއެމްގެ ރައީސް ޢަބްދުﷲ ޔާމީން ޢަބްދުލްޤައްޔޫމާ ދެކޮޅަށް ދައުލަތުން އުފުލާފައިވާ މަނީ ލޯންޑަރިންގެ މައްސަލަ އެންމެ ފަނޑިޔާރަކަށް ބެލޭނެ ކަމަށް ޤާބޫލު ނުކުރައްވާ ކަމަށް ޕީޕީއެމް ކޯލިޝަނުން ބުނެފިއެވެ.
ޕީޕީއެމްއާއި ޕީއެންސީން މިއަދު ހަވީރު ބޭއްވި ނޫސްވެރިންގެ ބައްދަލުވުމުގައު ޕީއެންސީ ނާއިބު ރައީސް އަދި މާވަށު ދާއިރާގެ މަޖިލީސް މެމްބަރ އަދި ކުރީގެ އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ ރައީސް ޔާމީންގެ މައްސަލަ ބެއްލެވުމަށް ބެންޗެއް ކަނޑައަޅަންޖެހޭނެ ކަމަށް ޤާބޫލު ކުރައްވާ ކަމަށެވެ. އެގޮތަށް އެމައްސަލަ ބަލައިފި ކަމަށްވާނަމަ ކާމިޔާބުވާނެ ކަމަށް ވެސް އޭނާ ވިދާޅުވިއެވެ.
އޭނާ ވިދާޅުވީ ބެންޗު ކަނޑައެޅުމަށްފަހު އެޝަރީޢަތް ބާއްވަންޖެހޭނީ ވަރަށް ހާމަކަން ބޮޑު ގޮތަކަށް ކަމަށެވެ. އެ މައްސަލަ މިހާރު ބައްލަވަނީ ކްރިމިނަލް ކޯޓުގެ އިސްޤާޒީ އަޙުމަދު ހައިލަމެވެ. މިހާރުވެސް އެ ޝަރީޢަތް ކުރިއަށް ގެންދަނީ ވަރަށް ހާމަކަންބޮޑު ގޮތަކަށެވެ. އެންމެފަހުން ބޭއްވި ޝަރީޢަތްވެސް ވަނީ ޓީވީތަކުން ވަގުތުން ދައްކައިފައެވެ.
ސަޢީދު ވިދާޅުވީ އެމްއެމްޕީއާރުސީގެ ފައިސާގެ މައްސަލާގައި އެތައް ބަޔަކު ހިމޭނޭއިރު ހަމައެކަނި ރައީސް ޔާމީންގެ މައްސަލަ ބެއްލެވުމަކީ ވެސް ސުވާލު އުފެދޭ ކަމެއް ކަމެއް ކަމަށެވެ. އެމަނިކުފާނުގެ މައްސަލަ ނުބެއްލެވުމަށް ފަނޑިޔާރުންގެ ޓީމުން ވެސް އަދި ޕީޕީއެމްއާއި ޕީއެންސީން ވެސް ބާރުއަޅާފައި ނުވާނެ ކަމަށް އޭނާ ވިދާޅުވިއެވެ.
މަނީލޯންޑަރިންގެ ޤާނޫނަކީ ރާއްޖެއަށް ވަރަށްފަހުން އައިސްފައިވާ އެއްޗަކަށްވާއިރު ކޮންމެ ގޮތަކަށް ޤާނޫނު މާނަ ކުރުމުގެ ފުރުސަތު އެބައޮތް ކަމަށާއި އެހެން ކަމުން އެކަށީގެންވާ ފުރުސަތު ރައީސް ޔާމީނަށް ލިބިވަޑައިގަންނަވަން ޖެހޭ ކަމަށް އޭނާ ވިދާޅުވިއެވެ. އެއީ އެމައްސަލަ ރަނގަޅަށް ބަލައި ދިރާސާ ކުރުމަށް ބޭނުންވާ ވަގުތު ކަމަށް ވެސް އޭނާ ވިދާޅުވިއެވެ.
ރައީސް ޔާމީނަށާއި އެހެން މީހުންނަށް ވެސް އިންސާފު ލިބެން ޖެހޭ ކަމަށް ވެސް ސަޢީދު ވިދާޅުވިއެވެ.
ރައީސް ނަޝީދުގެ މައްސަލަވެސް ބެއްލެވީ ފަނޑިޔާރުންގެ ބެންޗަކުން ކަމަށާއި ހަމައެގޮތަށް ރައީސް ޔާމީންގެ މައްސަލަ ވެސް ބެއްލެވުމަކީ އިންސާފުވެރިގޮތް ކަމަށް ދެކެވަޑައި ގަންނަވާ ކަމަށް އޭނާ ވިދާޅުވިއެވެ.
މި މައްސަލަ ކުއްލިއަކަށް ނަންގަވައި ގެން ޝަރީޢަތް ހިންގަން ފެށުމަކީ ސަރުކާރުގެ ސިޔާސީ މަގުސަދެއް ޙާސިލް ކުރުމަށް ކުރާކަމެއް ކަމަށް ވެސް އިދިކޮޅުން ތުހުމަތު ކުރެއްވިއެވެ. އެ މައަސަލައަށް އަހަރަކަށްވުރެ ގިނަ ދުވަސް ވެގެން ދިޔައިރު އެކަމާ އަޅައިނުލައްވައި ޕީޖީ ހުންނެވުމަށްފަހު ކުއްލިއަކަށް މައްސަލަ ހިންގަން ފެށުމަކީ ސުވާލު އުފެދޭ ކަމެއް ކަމަށްވެސް އިދިކޮޅުން ބުންޏެވެ.
ޔާމީންގެ މައްޗަށް ކުރާ ދައުވާގައި ދައުލަތުން ބުނެފައި ވަނީ އެމްއެމްޕީއާރްސީގެ އެއް މިލިއަން ޑޮލަރު މޯލްޑިވްސް އިސްލާމިކް ބޭންކްގައި ހުޅުވާފައިވާ ރައީސް ޔާމީންގެ އަމިއްލަފުޅު އެކައުންޓަކަށް އެސްއޯއެފުން ޖަމާކޮށް އޭގެ މަންފާ ޔާމީން ހޯއްދަވާފައިވާ ކަމަށެވެ. އެހެންނަމަވެސް ޔާމީން ގެންދަވަނީ އެ ތުހުމަތުތަކަށް އިންކާރު ކުރައްވަމުންނެވެ.
