މި އަހަރުގެ އީސްޓާ އާދީއްތަ ދުވަހު ސްރީލަންކާގައި ދިން ބޮމުގެ ހަމަލާތަކާއި އިސްލާމިކް ސްޓޭޓް އޮފް އިރާގް އެންޑް ސީރިޔާ (އައިސިސް) އާ ގުޅުމެއް ނެތް ކަމަށް، އެ ގައުމުގެ ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) ގެ ވެރިޔާ އިއްޔެ ވިދާޅުވެއްޖެއެވެ.
ރަވީ ސެނެވިރަތުނޭ ވިދާޅުވިގޮތުގައި 258 މީހުން މަރުވި އެ ހަމަލާތަކަކީ، އައިސިސް ފިކުރުގައި ޖެހި، އެ ފިކުރުން ހިތްވަރު ލިބިގެން ތިބި ސްރީލަންކާގެ ހަރުކަށި މުސްލިމުންގެ ބަޔަކު ދިން ހަމަލާތަކެކެވެ.
"އެމީހުން ތަބާވީ އައިސިސްގެ ފިކުރަށް. އެހެންނަމަވެސް، ދެ ބައިމީހުންގެ މެދުގައި އެއްވެސް ގުޅެމެއް އޮތްކަމަށް އަހަރުމެންގެ ތ ތަހުގީގަށް ފެނިފައި ނުވޭ." 21 އެޕްރީލް ހަމަލާތަކާ ގުޅޭގޮތުން ގާނޫނުހަދާ މަޖިލީހުގެ ކޮމިޓީއަކަށް މައުލޫމާތު ދެއްވަމުން ސެނެވިރަތުނޭ ވިދާޅުވިއެވެ.
އޭނާ އިތުރަށް ވިދާޅުވިގޮތުގައި ހަމަލާ ދިނުމުގައި ހަރަކާތްތެރިވި ޖަމާއަތް، ނޭޝަނަލް ތައުހީދު ޖަމާއަތު (އެންޓީޖޭ) ގެ މެންބަރުން އައިސިސްއަށް ގުޅައި، އެ ހަމަލާތަކުގެ ޒިންމާ އުފުލަން އެދުމުން، ހަމަލާ ދިނުމުގެ ދެ ދުވަސް ފަހުން އައިސިސް އިން ޒިންމާ އުފުލީއެވެ. އެއާއެކު، އައިސިސް އިން ވަނީ ބޮމެއް ގޮއްވައިގެން އަމިއްލައަށް މަރުވުމުގެ ކުރިން ޒަހްރާން ހާޝިމީއާއި އޭނާގެ ބައިވެރިން އައިސިސްއަށް ބައިއަތުހިފާ ވީޑިއޯއެއް ދައްކާފައެވެ.
ހަމަލާތައް ދިނުމުގެ ފަސް ދުވަސް ފަހުން ސްރީލަންކާ ފުލުހުން ވަނީ އެ ވީޑިއޯ ރެކޯޑުކުރި ތަނަށް ވަދެ، ވީޑިއޯގެ ފަސްމަންޒަރުގައި އެމީހުން ބޭނުންކުރި އައިސިސްގެ ދިދަވެސް ހޯދާފައެވެ.
ގާނޫނުހަދާ މަޖިލީހުގެ ކޮމިޓީއަށް މައޫލާތު ދެއްވަމުން ތަހުގީގު ޓީމުގައި ހިމެނިވަޑައިގަންނަވާ ޝާނީ އަބޭސޭކަރަ ވިދާޅުވީ ސީއައައީ އޮފިސަރުން މިއަހަރުގެ ކުރީކޮޅު އެންޓީޖޭ މީހުންގެ މަރުކަޒަކުން 105 ކިލޯގްރާމުގެ ގޮވާތަކެތި ނަގާފައިވާ ކަމުގައެވެ.
"މި ތަކެތި ކުރިން ނުފެނުނަމަ، އެމީހުން ދިން ގެއްލުން މާ ބޮޑުވީސް." އަބޭސޭކަރަ ވިދާޅުވިއެވެ. އޭނާ އިތުރަށް ވިދާޅުވި ގޮތުގައި އެންޓީޖޭއިން ހަމަލާތައް ދިން އިރުވެސް ސީއައިޑީން ދިޔައީ އެ ޖަމާއަތާ ގުޅޭ ތަހުގީގެއް ހިންގަމުންނެވެ.
ސްރީލަންކާގެ ރައީސު މައިތުރިޕާލާ ސިރިސޭނާ ފާއިތުވި ހަފުތާގައި ވިދާޅުވެފައިވަނީ އީސްޓާ ހަމަލާތަކުގެ ފަހަތުގައި ތިބީ މަސްތުވާތަކެތީގެ ވިޔަފާރިކުރާ ބޮޑުން ކަމުގައެވެ. ބޭނުމަކީ މަސްތުވާތަކެތި ކޮންޓުރޯލުކުރަން އޭނާ ކުރައްވާ މަސައްކަތް ހުއްޓުވުމެވެ.
އެހެންނަމަވެސް، ބޮޑުވަޒީރު ރަނިލް ވިކްރަމަސިންހަ ވަނީ ސިރިސޭނާ މިވާހަކަފުޅާ ދެކޮޅު ހައްދަވާފައެވެ.
"ފުލުހުން ވަނީ ދެ ހަފްތާހެއްހާ ދުވަހުގެ ތެރޭގައި ތަހުގީގު ނިންމާލާފައި. މަސްތުވާތަކެތީގެ ވިޔަފާރިކުރާ މީހުންގެ ވާހަކައެއް ނެތް. އަހަރުމެންގެ ތަހުގީގީ އިދާރާއަށް އަހަރުމެން ޝައްކުކުރަން ޖެހެ ސަބަބެއް ނެތް." ބޮޑުވަޒީރުގެ ތަރުޖަމާނު ސުދަރްޝަނާ ގުނަވަރްދަނާ ވިދާޅުވިއެވެ.
