ބާރ ކައުންސިލްގެ އިންތިޚާބު މާލެ އާއި އައްޑޫގައި މިއަދު ކުރިއަށް ދާނެއެވެ. އިންތިޚާބުގައި ވޯޓްލުން ކުރިއަށް ދާނީ ހެދުނު 9 ން ހަވީރު ފަހެއް ޖެހުމާ ހަމައަށް ކަމަށް އިލެކްޝަން ކޮމިޝަނުން ވަނީ ހާމަކުރައްވައިފައެވެ.
މިއަދު ކުރިއަށްދާ ބާރ ކައުންސިލްގެ އިންތީޚާބުގައި، އިންތިޚާބުކުރެވޭނީ ރައީސްއާއި ނާއިބް ރައީސާ ހިންގާ ކޮމެޓީގެ ހަ މެމްބަރުންނެވެ. ބާރ ކައުންސިލްގެ ރައީސްކަމުގެ މަގާމަށް ވާދަކުރައްވަނީ މަޝްހޫރު ދެ ޤާނޫނީ ވަކީލުންކަމުގައިވާ ކުރީގެ އެޓާނީ ޖެނެރަލް ޙުސްނު ސުޢޫދާއި މައުމޫނު ޙަމީދެވެ. ނައިބު ރައީސްކަމަށް ވާދަކުރައްވަނީ ކުރީގެ އެޓާނީޖެނެރަލް ޢަބްދުﷲ މުޢިއްޒާއި ސިވިލް ކޯޓްގެ ކުރީގެ ޤާޒީ މުޙައްމަދު ޙަލީމެވެ.
ހިންގާ ކޮމިޓީގެ މެމްބަރުކަމަށް ވާދަކުރެއްވުމަށް ކުރިމަތި ލެއްވި އެއްބޭފުޅެއްގެ ޝަރުތު ހަމަ ނުވާތީ އެނާގޭ ކެންޑިޑޭޓްކަން ވަނީ ބާޠިލްކުރައްވައިފައެވެ. އެހެންކަމުން ހިންގާ ކޮމެޓީއަށް ވާދަކުރައްވާނީ 18 ބޭފުޅެކެވެ. އޭގެތެރޭގައި ކުރީގެ ޕޮރޮސެކިއުޓަރ ޖެނެރަލް، މަޝްހޫރު ޤާނޫނީ ވަކީލް އަޙްމަދު މުޢިއްޒާއި ކުރީގެ މަކުނުދޫ ދާއިރާގެ މެމްބަރ އަނާރާ ނަޢީމް ހިމެނިވަޑައިގަންނަވައެވެ.
އީސީ އިން ހާމަކުރައްވައިފައިވާ ގޮތުގައި 1600 ވަކީލުންނަށް މި އިންތިޚާބުގައި ވޯޓުލެވޭނެ އެވެ. ބާރ ކައުންސިލްގެ ފުރަތަމަ އިންތިޚާބު ޤާނޫނުގައިވާ ގޮތުން ކުރިއަށް ގެންދަނީ އިލެކްޝަންސް ކޮމިޝަނުންނެވެ.
ބާރ ކައުންސިލް އެކުލެވިގެން ވަނީ، ޤާނޫނީ ވަކީލުންގެ ތެރެއިން އިންޚާބުކުރެވޭ ރައީސަކާއި ނައިބު ރައީސަކާއި ހިންގާ ކޮމިޓީއަށް އިންތިހާބު ކުރެވޭ ހަ ވަކީލުންގެ އިތުރުން ދައުލަތުގެ ބަންޑާރަނައިބު ހިމެނިވަޑައިގަންނަވާ ގޮތަށެވެ.
