ބާ ކައުންސިލް ހިންގާ ކޮމެޓީގެ މެމްބަރުކަމަށް ނޫރުބާން ފަހުމީ އިންތިޚާބު ކޮށްފިއެވެ. ބާކައުންސިލްގެ ގޮނޑި ޤާނޫނީ ވަކީލް ނޫރުބާން ކާމިޔާބުކުރެއްވި 101 ވޯޓުންނެވެ. އޭނާއާ ވާދަކުރެއްވި އަބްދުލްސަލާމް އާރިފަށް ލިބިވަޑައިގަތީ 97 ވޯޓެވެ. ބާ ކައުންސިލްގެ ހުސްވެފައިވާ ގޮނޑިއަށް ކުރިމަތިލެއްވީ ވެސް މި ދެ ބޭފުޅުން އެކަންޏެވެ.
ބާ ކައުންސިލްގެ ހިންގާކޮމެޓީގެ ގޮނޑިއެއް ހުސްވީ، ބާ ކައުންސިލްގެ މެންބަރު ކަމުގައި ހުންނެވި އައިޝާ ޝުޖޫން މަގާމުން އިސްތިއުފާ ދެއްވުމުންނެވެ. ޝުޖޫން އިސްތިއުފާ ދެއްވީ ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވުމުންނެވެ.
ޤާނޫނީ ވަކީލުންގެ ހުރިހާ ކަމެއް ރެގިއުލޭޓް ކުރުމުގެ ބާރު، ޤާނޫނީ ގޮތުން މިހާރު ލިބިފައިވާ ފަރާތަކީ ބާ ކައުންސިލެވެ. ބާކައުންސިލްގެ ހިންގާ ކޮމެޓީ އެކުލެވިގެން ވަނީ އިންތިޚާބު ކުރާ ރައީސް އާއި ނައިބު ރައީސް އާއި ހަ މެންބަރުންގެ އިތުރުން ބަންޑާރަ ނައިބުގެ ހިމެނޭ ގޮތަށެވެ. ބާ ކައުންސިލްގެ ރައީސަކީ ގާނޫނީ ވަކީލު މައުމޫން ހަމީދެވެ. ނައިބު ރައީސަކީ ކުރީގެ އެޓާނީ ޖެނެރަލް އަބްދުﷲ މުއިއްޒެވެ. ދެން އެ ކޮމިޓީގައި މިހާރު ތިއްބަވާ މެންބަރުންނަކީ ކުރީގެ ޕްރޮސިކިއުޓާ ޖެނަރަލް އަހުމަދު މުއިއްޒާއި މަކުނުދޫ ދާއިރާގެ ކުރީގެ މެންބަރު އަނާރާ ނައިމާއި އެމްޑީޕީގެ ސެކްރެޓްރީ ޖެނަރަލް އަނަސް އަބްދުލް ސައްތާރާއި ޤާނޫނީ ވަކީލު މުޙައްމަދު ފައިސަލާއި މުޙައްމަދު އަސީލް ޙަސަން އެވެ.
