ބަހުގެ މައްސަލައަކީ ހުރިހައި ޒަމާނެއްގައިވެސް އޮންނަ މައްސަލައެއް ކަމަށް ބައެއް މީހުން ބުނެއެވެ. އެއީ ތެދެއް ކަމެއް ދޮގެއް ކަމެއް އަޅުގަނޑަކަށް ނޭނގެއެވެ. އެނގޭ ވަރަކީ މިހާރު ބަހުގެ މައްސަލަ އޮންނަ ކަމެވެ. އެއީ ވަރަށް އާދައިގެ މައްސަލައެއް ކަމަށް ހަދަން ބައެއް މީހުން މަސައްކަތް ކުރެއެވެ. އެކަމަކު ފުންކޮށް ވިސްނާލައިފި ނަމަ ބަހުގެ މައްސަލަ އާދައިގެ މައްސަލައަކަށް ނުވެއެވެ. ބަހޭ މި ދަންނަވަނީ އަޅުގަނޑުމެން ލިޔެ ކިޔައި ވާހަކަ ދައްކައި އުޅޭ ބަހަށެވެ.
ދިވެހި ބަހުގެ ތެރެއަށް ބަހާ ނުގުޅޭ ހަމަ ތަކެއް ވަދެގެން، ބަސް ހަލާކު ވަމުން ދާތީ ބަހުގެ ބައެއް އެދުރުން ކަންބޮޑު ވެއެވެ. މިސާލަކަށް ހުރުމާއި އިނުމާއި އޮތުން އޮޅުވާލުމުގެ މައްސަލައަކީވެސް މިހާރު ތަންކޮޅެއް މައިތިރި ވެފައި އޮތް މައްސަލައަކަށް ވީ ނަމަވެސް އެއީ އެއް ދުވަސްވަރެއްގައި ވަރަށް ބޮޑު މައްސަލައަކަށް ވެފައި އޮތް ކަމެކެވެ. މިހާރު އެ ވާހަކަ އިހަށް ދެއްކިހައި ބާރަށް ނުދެކެވެނީ އެ ބަސްތައް އޮޅުވައިލުން ހުއްޓާލީތީއެއް ނޫނެވެ. މިހާރުވެސް ބައެއް މީހުންގެ ލިޔުންތަކުންނާއި ވާހަކައިން ހުރިހައި އެއްޗެއް އިންނަނީއެވެ. ޅެންވެރިއަކު ވިދާޅުވެފައިވާ ފަދައިން ގިފިލީގައި ވަޅު އިންނަނީއެވެ. ވަޅުގައި ދާނި އިންނަނީއެވެ. އަދި ފެންވެސް އިންނަނީއެވެ.
ހުރުން، އިނުން، އޮތުމުގެ ވާހަކައަށް ފަހު ދެން އައީ ފަރާތުގެ ވާހަކައެވެ. އިހަށް މީހުން އުޅެއެވެ. މިހާރު ފެންނަނީ ހައްތަހާވެސް ފަރާތެވެ. ރޭޑިއޯއިން ލަވައަށް އެދެނީ ފަރާތް ފަރާތުންނެވެ. ވާހަކަ ދެއްކުމުގެ މުބާރާތުން ވަނަ ހޯދަނީ ފަރާތް ފަރާތުންނެވެ. އެކްސިޑެންޓް ވެގެން އަނިޔާ ލިބެނީވެސް ފަރާތް ފަރާތަށެވެ.
އަޅުގަނޑަކީވެސް ފަރާތެކެވެ. ތިޔައީވެސް ފަރާތެކެވެ. އެއީވެސް ފަރާތެކެވެ. އަޅުގަނޑު މިއީ މިހާރު ބޮޑުވެ ތަސައްރަފު ފުދިފައި ހުރި ފަރާތެކެވެ. ކުރިން އަޅުގަނޑަކީ ކުޑަ ފަރާތެކެވެ. އޭގެ ކުރިން ޅަ ފަރާތެކެވެ. މަރުވީމާ ވާނީ މަރްޙޫމް ފަރާތަކަށެވެ.
ބަހުގެ ވާހަކަ ދެކެވެން ފެށީމާ ހަނދާނަށް އަންނަނީ އަޅުގަނޑުގެ ވަރަށް ގާތް ބޭފުޅަކު ވިދާޅުވެ ދެއްވި ވާހަކައެކެވެ.
މަރްޙޫމް ޢަބްދު އިސްމާޢީލް ނުވަތަ ތުއްތު ސާހިބަކީ ރާއްޖޭގައި އުފެދުނު އެންމެ ކުޅަދާނަ ހިސާބު ޢިލްމުވެރިންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އޭނާ ދުނިޔޭގައި ހުންނެވި ދުވަސްވަރު އޭރުގެ ބޮޑުންގެ ތެރޭގައި ދިވެހި ބަހުގެ މައްސަލައަކާ ގުޅިގެން ބަހުސެއް ކުރެވިއްޖެއެވެ. މި ދެކެވޭ ވާހަކައަކީ ހަވީރު ނަލަ ވެގެން ލާ ހެދުމަށް "ހަވީރީ ހެދުން"، ހަނދުވަރުދޭ ރޭރެއަށް "ހަނދުވަރީ ރޭ" މި ކަހަލަ ގޮތަކަށް ނަން ހެދުމުގެ ވާހަކައެވެ. ކޮންމެއަކަސް މިއީ ތުއްތު ސާހިބު ގަބޫލު ކުރައްވާ ހަމަ ތަކަކަށް ނުވިއެވެ. އޭނާ ބުނުއްވާ ގޮތުގައި ބޭރުގެ ބަސް ބަހުގައި އެ ފަދަ ގޮތަކަށް ބަސް ހެދި ކަމުގައި ވިޔަސް ދިވެހި ބަހުގެ އުސޫލުތައް ހަމަ ޖެހިފައި ހުންނަ ގޮތުން އެހެން ބަސް ހެދޭކަށް ނޯންނާނެއެވެ. ހަވީރުގެ ހެދުން ހަވީރީ ހެދުމަކަށް ނުވާނެއެވެ. ތުއްތު ސާހިބުގެ މި ވާހަކަ އެ ބޭފުޅުން ގަބޫލުފުޅެއް ނުކުރެއްވިއެވެ.
ތުއްތު ސާހިބު ބުނުއްވާ ގޮތުގައި ހަވީރުގެ ހެދުން ހަވީރީ ހެދުމަށް ވާ ކަމަށް ވަންޏާ، އަޅުގަނޑުގެ ބަކަރިއޭ ބުނަން އަޅުގަނޑީ ބަކަރިއޭ ވެސް ބުނެވޭނެ އެވެ. މި ދެ ބަހުންވެސް ނުކުންނާނީ ހަމަ އެއް މާނައެކެވެ!
