ހއ. ފިއްލަދޫ ކައުންސިލުން ހުސްވެފައިވާ ދެ ގޮނޑިއަށް މެމްބަރުން އިންތިޚާބު ކުރަން ބާއްވާ ބައި-އިލެކްޝަންނުގެ ވޯޓުލާން ފަށައިފިއެވެ.
އިލެކްޝަންސް ކޮމިޝަންގެ މެމްބަރު އަދި ތަރުޖަމާނު އަޙުމަދު އަކުރަމް ވިދާޅުވީ ބައި-އިލެކްޝަނުގައި 4 ކެންޑިޑޭޓުން ވާދަކުރައްވާ ކަމަށެވެ. އެއީ އެމްޑީޕީގެ ދެ ކެންޑިޑޭޓުންނާއި ޕީޕީއެމްގެ 2 ކެންޑިޑޭޓެކެވެ.
ފިއްލަދޫ ކައުންސިލަށް ދެ މެމްބަރަކު އިންތިޚާބު ކުރަނީ އެ ކައުންސިލުން ދެ މެމްބަރަކު އިސްތިއުފާ ދެއްވުމުންނެވެ. އެބޭފުޅުން އިސްތިއުފާ ދެއްވި ސަބަބެއް އެނގިފައެއް ނުވެއެވެ.
އިސްތިއުފާ ދެއްވީ ނާއިބު ރައީސް މުޙައްމަދު ޖައުފަރާއި، މެންބަރ މުޙައްމަދު ނާފިއުއެވެ. ބައި-އިލެކްޝަންގެ ކަންކަން ފިއްލަދޫގައި ކުރިއަށްދާ ގޮތް އިލެކްޝަންސް ކޮމިޝަންގެ ނާއިބުރައީސް އަމްޖަދު މުސްތަފާ ވަނީ ބައްލަވާ ލައްވައިފައެވެ.
