ގއ. ކޮލަމާފުށީ ގެއަކުން ތިޖޫރިއެއް ވަގަށްނެގި ކަމުގެ ތުހުމަތުގައި މިއަދު ދެމީހަކު ބަންދުކޮށްފި ކަމަށް ފުލުހުން ވިދާޅުވެއްޖެއެވެ. އެ މައްސަލާގައި ބަންދުކޮށްފައިވަނީ ޢުމުރުން 28 އަހަރުގެ ފިރިހެނަކާއި، 32 އަހަރުގެ ފިރިހެނެކެވެ.
އެ ތިޖޫރި ވަގަށް ނަގައިފައިވަނީ ފެބުރުވަރީ 26 ވަނަދުވަހުގެރޭ 22:46 ގައެވެ. ފުލުހުންވަނީ ތިޖޫރި ވެސް ހޯދައިފައެވެ. ތިޖޫރި ފެނިފައިވަނީ އެރަށު ވަލުތެރެއިނެވެ. ތިޖޫރި ގެއްލުނުއިރު އޭގައި ހުރީ 13510 ރުފިޔާއެވެ. އޭގެތެރެއިން 11010 ރުފިޔާ ފެނިފައިވާ ކަމަށް ފުލުހުން ވަނީ ވިދާޅުވެފައެވެ. އެ ފައިސަގެ ތެރެއިން 1000 ރުފިޔާ ފެނިފައިވަނީ އެ މައްސަލައިގައި ބަންދުކުރި ދެ މީހުންގެ ތެރެއިން 28 އަހަރު މީހާގެ އަތުންނެވެ.
ފުލުހުން ގެންދަނީ މިމައްސަލަ ތަޙުޤީގު ކުރަމުންނެވެ. ވައްކަމާއި ފޭރުމުގެ މައްސަލަ މިހާރުވަނީ އިތުރުވެފައެވެ.
