އިލެކްޝަންސް ކޮމިޝަން (އީސީ) ގެ އައުލޯގޯ އާއި ކުލަ އިފްތިތާޙުކުރެއްވުން މާދަންރޭ އޮންނާނެ ކަމަށް އެކޮމިޝަނުން ވިދާޅުވެއްޖެއެވެ.
އީސީން ވިދާޅުވީ މިކަން އޮންނާނީ ރައްޔިތުންގެ މަޖިލީހަށް ކުރިމަތި ލުމުގެ ފުރުސަތު ހުޅުވާލުމަށް މާދަންރޭ 9:00 ގައި ހޮޓެލްޖެންގައި ބާއްވާ ޚާއްސަ ރަސްމިއްޔާތުގައި ކަމަށެވެ.
އިލެކްޝަނުން ވިދާޅުވީ މިފަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ބޭނުން ކުރައްވާނީ އައު ލޯގޯއާއި ކުލަ ކަމަށެވެ. އެ ކޮމިޝަނުން ރަސްމީ ކަންކަމުގައި ބޭނުންކުރާ ކުލަ ސިޔާސީ ޕާޓީތަކުން ބޭނުން ކުރުމަކީ މަނާ ކަމެކެވެ. އީސީގެ ކުލައާއި ލޯގޯ ބަދަލު ކުރުމުގެ މަސައްކަތް ފަށްޓަވައިފައިވަނީ މީގެ ދެއަހަރެއްހާ ދުވަސް ކުރިންނެވެ. އެހެންނަމަވެސް ތަފާތު ކަންކަމާހެދި އެ އިތްތިތާޙު ކުރުން ވަނީ ލަސްވެފައެވެ.
ރަސްމީ ކަންކަމުގައި އީސީން ބޭނުންކުރާ ކުލައަކީ ދަނބު ކުލައެވެ. އެހެން ނަމަވެސް "ވޯކިން ކިޓް" ގެ ކުލައަކީ ޓާކިޝް ކުލަ ކަމަށް އިލެކްޝަންސް ކޮމިޝަނުން ކުރިން ވަނީ ވިދާޅުވެފައެވެ. އެ ކޮމިޝަނުން މިހާރު ބޭނުން ކުރައްވަނީ ފެހި ކުލައެވެ.
