ޤައިދީން ރިހެބިލިޓޭޓްކުރުމުގެ މަޤްސަދަކީ ހަމައެކަނި މުޖުތަމަޢަށް ހެޔޮގޮތުގައި ނެރެދިނުމުގެ އިތުރުން، އަލުން ޖަލަށް ނާންނާނެ މީހަކަށް ހެދުންކަމުގައި ބަލައިގެން އެގޮތަށް ޤައިދީންގެ ރިހެބިލިޓޭޝަން ޕްރޮގްރާމްތައް ބައްޓަން ކުރުމަށް މަސައްކަތް ކުރެއްވުމަށް ކޮމިޝަނަރ އޮފް ޕްރިޒަންސް އަޙުމަދު ޝިހާން އެދިވަޑައިގެންފިއެވެ.
ޝިހާން މިގޮތަށް އެދި ވަޑައިގެންނެވީ މޯލްޑިވްސް ކަރެކްޝަނަލް ސަރވިސްގެ އެންމެހައި ކޮމިޝަންޑް އޮފިސަރުންނާ މިއަދު ބައްދަލުކުރައްވައި ދެއްކެވި ވާހަކަފުޅުގައެވެ.
ޤައިދީން ޖަލަށް ގެނެވޭ ހިނދު ކުރެވޭ އިވެލުއޭޝަންތައް ހަރުދަނާކޮށް، ކޮންމެ ޤައިދީއަކަށް އެންމެ އެކަށީގެންވާ ޕްރޮގްރާމަކީ ކޮބައިކަން ދެނެގަތުމަށް ކުރާ މަސައްކަތްތައް އިތުރަށް ތަރައްޤީކުރެވޭނެ ގޮތްތަކާބެހޭ ގޮތުން ކޮމިޝަނަރު ވަނީ މި ބައްދަލުވުމުގައި ވާހަކަފުޅު ދައްކަވައިފައެވެ. އަދި އެއްވެސް ޤައިދީއަކަށް ރިހެބިލިޓޭޝަން ޕްރޮގްރާމްގައި ބައިވެރި ނުވެވި ހުރެވިގެން ނުވާނެކަމަށާއި އެއިން ކޮންމެ މީހަކީވެސް ވަކި ފަރުދެއްގެ ގޮތުގައި ބަލައިގެން އެކަށީގެންވާ ޕްރޮގްރާމެއް ހަމަޖައްސައި ދިނުމަށްވެސް ކޮމިޝަނަރު އެދިވަޑައިގެންނެވިއެވެ.
ކޮމިޝަންޑް އޮފިސަރުންނަކީ މުވައްސަސާ ހިންގުމުގައި އެންމެ އިސް ރޯލެއް އަދާކުރައްވާ އޮފިސަރުން ކަމަށާއި، އެމީހުންނަކީ ޕްރިޒަން އޮފިސަރުންނަށް ނަމޫނާ ދައްކުވައިދޭ ބައެއް ކަމަށްވެސް ސީޕީ ޝިހާން ވިދާޅުވިއެވެ. އެމީހުން އަބަދުވެސް ވާންޖެހެނީ މުވައްސަސާ ހަރުދަނާ ކުރުމަށް މަސައްކަތް ކުރާ ބަޔަކަށް ކަމަށް ވެސް ވިދާޅުވިއެވެ.
މުވައްސަސާ ހަރުދަނާ ކުރެވޭނީ، ހުސްޖާގައެއް ނެތްގޮތަށް ހަރުދަނާ ގަވާއިދުތަކާއި އުސޫލުތައް ޤާއިމު ކުރެވިގެން ކަމަށްވެސް ސީޕީ ވިދާޅުވިއެވެ. އޮފިސަރުންނަށް މިހާރު ލިބޭ ޚިދުމަތްތަކުގެ އިތުރުން، ހައުސިން ސްކީމާއި، ޕްރިޒަން އޮފިސަރުންނަށް ސައިކޮލޮޖިކަލް ސަޕޯޓް ހޯދުމަށް މަސައްކަތްކުރަންޖެހޭ ކަމަށް ވެސް ސީޕީ ވިދާޅުވިއެވެ.
ސީޕީ ވިދާޅުވީ މޯލްޑިވްސް ކަރެކްޝަނަލް ސަރވިސްގައި މަސައްކަތްކުރާ އޮފިސަރުންގެ ވެލްފެއާގެ ކަންކަން ހަރުދަނާ ކުރުމަށް ޕްރިސްކޯ އިން ޚާއްޞަ މަސައްކަތްތަކެއް ކުރަމުން ގެންދާކަމަށާއި އެގޮތުން އެ ސަރވިސްގައި މަސައްކަތްކުރާ ޕްރިޒަން އޮފިސަރުންނާއި މަދަނީ މުވައްޒަފުންނަށް އާސަންދައިގެ އިތުރުން ބޭސްފަރުވާގެ ޚަރަދު ލިބޭނެ ނިޒާމެއް ޤާއިމުކުރެވިފައިވާކަމަށެވެ.
މީގެ އިތުރުން، ބައިނަލް އަގުވާމީ ގޮތުން އެމްސީއެސް ގުޅިފައިވާ ފަރާތްތަކުން ލިބެމުންދާ ފައިދާތަކުގެ ތަފްސީލު ވެސް ސީޕީ ދެއްވިއެވެ. އަދި މި އަހަރު އޭޝިއާ އެންޑް ޕެސިފިކް ކޮންފަރަންސް އޮފް ކަރެކްޝަނަލް އެޑްމިނިސްޓްރޭޝަންސް (އަޕްކާ)ގެ މެންބަރަކަށް ރާއްޖެވެފައިވާކަމަށް ވެސް ވިދާޅުވިއެވެ.
ސީޕީ ޝިހާން ވިދާޅުވީ އެހެން ޤައުމުތަކުގެ ޖަލުތަކާ އޮންނަ ގުޅުން އިތުރަށް ބަދަހިކުރުމަކީ ވަރަށް މުހިންމު ކަމެއްކަމަށާއި އެކަމަށް ޚާއްޞަ ސަމާލުކަމެއް ދީގެން މަސައްކަތްތައް ބައްޓަންކުރުމުން އެ މުއައްސަސާއަށް ބޮޑެތި ފައިދާތަކެއް އިތުރަށް ޙާޞިލުވެގެން ދާނެކަމަށެވެ.
މިއަދުގެ ބައްދަލުވުމަކީ ރިޔާސީ އައު ދައުރެއް ފެށުމަށް ތައްޔާރުވަމުންދާއިރު މޯލްޑިވްސް ކަރެކްޝަނަލް ސަރވިސްގެ ޤާނޫނީ ވާޖިބު އަދާކުރުމުގެ ގޮތުން، ޤައިދީންނަށް ދެމުންގެންދާ ޚިދުމަތްތަކާ އޮފިސަރުންނަށް ދެމުންގެންދާ ޚިދުމަތްތައް ރަނގަޅު ކުރުމަށް ކުރެވެންހުރި ކަންތައްތައް ބަލައި އެކަންކަން ކުރުމަށް ސީޕީ އިރުޝާދު ދެއްވުމަށް ބޭއްވެވި ބައްދަލުވުމެއް ކަމަށް ކަރެކްޝަނުން ވަނީ ވިދާޅުވެފައެވެ. އަދި ކުރިމަގުގައި އެ މުއައްސަސާ އިތުރަށް ހަރުދަނާ ކުރުމަށް އެޅިދާނެ ބައެއް ފިޔަވަޅު ހާމަކުރެއްވުމަށާއި މިދިޔަ ބާރަވަރަކަށް އަހަރުތެރޭ ރާއްޖޭގެ ޖަލުތަކަށް އައިސްފައިވާ ބަދަލުތަކާ ބެހޭގޮތުން މި ބައްދަލުވުމުގައި ވަނީ ވާހަކަ ދައްކަވައިފައެވެ.
