އިލެކްޝަންސް ކޮމިޝަން (އީސީ) ހިންގާ ހަރަކާތްތައް ރައްޔިތުންނާ ހަމައަށް ފޯރުކޮށް ދިނުމަށްޓަކައި ހަދައިފައިވާ ވައިބާ ގްރޫޕް އުވާލައިފިއެވެ.
އީސީގެ ރައީސް އަހުމަދު ޝަރީފް ވިދާޅުވީ އެ ގްރޫޕަކީ ރިޔާސީ އިންތިޚާށް ތައްޔާރުވަމުން އައިސް ދުވަސްވަރުން ފެށިގެން ހަދައިފައިވާ ގްރޫޕެއް ކަމަށެވެ. އެއީ މައުލޫމާތު ފޯރުކޮށްދިނުމުގެ ބޭނުމުގައި ނޫސްވެރިންނާއި އީސީގެ މެމްބަރުން ހަދައިފައިވާ ގްރޫޕެކެވެ. އެހެންނަމަވެސް މިރޭ ވަނީ އެގްރޫޕު އުވައިލައިފައެވެ.
ޝަރީފް ވިދާޅުވީ އެ ގްރޫޕު އުވައިލީ އެކްޓިވިސްޓުން އެއަށް ވަދެ އެކަށީނުވާ ވާހަކަތައް ދައްކަން ފެށުމުން އޭނާގެ ހުއްދައާއެކު އީސީގެ ތަރުޖަމާނު އަދި މެމްބަރު އަކުރަމް ކަމަށެވެ.
"އެގޫރޫޕަށް އެކްޓިވިސްޓު ލެވެލް މީހުން ވައްދައި ވަރަށް ފާޑުފާޑުގެ އެއްޗެހި ލިޔެ ހަދަން ފެށީމައި އަކުރަމް އަޅިގަނޑު ގާތު އެހި އެންމެ ރަނގަޅުހޭ އުވާލިޔަސް. އަޅުގަނޑު ދެންނެވިން އެކްޓިވިސްޓު ލެވެލެ މީހުން ވަދެ ހަގީގަތާ ޚިލާފު ވާހަކަ ދައްކައި ހަދާކަމަށްވާނަމަ އެގްރޫޕު އުވާލައި އަލުން މީޑިއާ މީހުން ލައިގެން އިތުރު ގްރޫޕެއް ހަދާށޭ،" ޝަރީފް ވިދާޅުވިއެވެ.
ޝާރީފް ވިދާޅުވީ ފާއިތުވި ހަފްތާއެއްހާ ދުވަސްތެރޭގައި ބައެއް ފަރާތްތަކުން ވަނީ އެކްޓިވިސްޓް ލެވެލްގެ މީހުންނާއި ސިޔާސީ ބައެއް މީހުންވެސް އެ ގުރޫޕަށް ވައްދައިފައި ކަމަށެވެ. އޭގެ ސަބަބުން ވަރަށް ބޮޑަށް ދަތިވެގެން ދިޔަ ކަމަށްވެސް އޭނާ ވިދާޅުވިއެވެ. "ފަސޭހައަކަށް ގްރޫޕު ހެދުމުން ފަސޭހަ ބޭނުން ކުރުމުގެ ބަދަލުގައި އަޅުގަނޑުމެންނަށް އުދަގޫކުރަން ކުރާކަމެއްގެ ގޮތުގައި ފާހަގަ ވެގެން މިދިޔައީ،" ޝަރީފް ވިދާޅުވިއެވެ.
ޝަރީފް ވިދާޅުވީ ބައެއް ޝަކުވާތައް އީސީލް ބަލައި ނުގަންނަ ކަމަށް އަރުވާފައިވާ އަޑުތަކާ ބެހޭގޮތުން ޖަވާބު ދެއްވުމަށް މާދަމާ ޕްރެސް އެއް ދެއްވާނެ ކަމަށެވެ.
