ކުރިއަށްއޮތް ރިޔާސީ އިންތިޚާބު ކާމިޔާބު ކުރެއްވިއްޖެ ކަމަށްވާނަމަ އެ ފަސް އަހަރުގައި އެންމެ އިސްކަމެއް ދެއްވާނީ ފުވައްމުލައް ސިޓީ ފަދަ ތަންތަނުގައި ފުރިހަމަ ނުކުރެވިހުރި ކަންކަން ފުރިހަމަ ކުރެއްވުމަށް ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕީޕީއެމުން ފުވައްމުލަކު ސިޓީގައި މިހާރު ބާއްވަމުން ގެންދާ ޖަލްސާގައި ވާހަގަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ފުވައްމުލަކާއި ޕީޕީއެމާ ވަރަށްގާތް ގުޅުމެއް އޮންނަކަމަށެވެ. އެ ގުޅުން ރައީސް ޔާމީނާ އެއަށްވުރެ ގާތް ކަމަށް އެމަނިކުފާނު ވިދާޅުވިއެވެ. އެމަނިކުފާނު ފުވައްމުލަކަށް ވަޑައިގަންނަވާ ކޮންމެ ފަހަރަކު އެމަނިކުފާނަށް ޚާއްސަ އުފާފުޅެއް ލިބިވަޑައިގަންނަވާ ކަމަށެވެ.
ރައީސް ވިދާޅުވީ ޕީޕީއެމުން ބާއްވާ ޖަލްސާތަކުގައި ރަށްރަށުން މީހުން ނުގެންނާނެ ކަމަށާއި ރަށެއްގައި ބާއްވާ ޖަލްސާއެއްގައި ބައިވެރިވާނީ އެ ރަށެއްގެ މީހުން ކަމަށް ވެސް ރައީސް ވިދާޅުވިއެވެ. މިރޭގެ ޖަލްސާގައި ވެސް ބައިވެރިވެފައިވަނީ ފުވައްމުލަކު ސިޓީގެ މީހުން ކަމަށް އެމަނިކުފާނު ވިދާޅުވިއެވެ.
"އަޅުގަނޑުމެންދާ ރަށްރަށުގައި ބޭރުން އައިސްތިބި ބަޔަކު ނުތިބޭނެ. އެހެންވީމާ އެމްޑީޕީއާ ޕީޕީއެމާ އަޅައެއް ނުކިޔޭނެ. މިރަށުގައި ފެނާއި ނަރުދަމާ އެޅިގެން މިދިޔައީ. މިކުރާ ޒިޔާރަތަކީ ހަމައެކަނި ސިޔާސީ މަސައްކަތްކުރާ ޒިޔާރަތެއްނޫން. މިއީ ކުރިން އުނދަގޫވި އެތައްކަމެއް ފުއްދައިދިނުމަށް ރައީސް ކުރައްވާ ޒިޔާރާތެއް،" ރައީސް ވިދާޅުވިއެވެ.
އެމަނިކުފާނު ވިދާޅުވީ ފުވައްމުލަކުން އެމަނިކުފާނަށް މިރޭ ވަރަށްބޮޑު ހަދިޔާއެއް ދެއްވައިފި ކަމަށާއި އެއީ އެތައް ޒުވާނުންނެއްނެ ޕީޕީއެމަށް ސޮއިކުރުން ކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ޒުވާނުންނަކީ އެތަނެއްގެ ވިންދު ކަމަށެވެ. އެހެންނަމަވެސް އިސްރަށްވެހިންގެ ޚިދުމަތް ހަނދާން ނައްތައިގެން ނުވާނެ ކަމަށެވެ. "އެންމެ ބޮޑު ހަދިޔާއަކީ ގިނަ ޒުވާނުން ފުވައްމުލަކުން ޕީޕީއެމަށް ސޮއިކުރުން،" ރައީސް ވިދާޅުވިއެވެ.
މިރޭގެ ޖަލްސާގައި އެމަނިކުފާނު ވަނީ ޕީޕީއެމްގެ އުފެދުމާބެހޭ ގޮތުންވެސް ކޮންމެވެސް ވަރަކަށް ވާހަކަފުޅު ދައްކަވައިފައެވެ. އެމަނިކުފާނު ވިދާޅުވީ އެމަނިކުފާނު ފުރަތަމަ ޕީއޭ އުފެއްދެވީ އޭރުއޮތް ޑީއާރުޕީ ރެނދުލުމުންނެވެ. އޭރުވެސް ޑީއާރުޕީގެ ލީޑަރޝިޕްގައި އެއްވެސް ހަރުދަނާކަމެއްނެތް ކަމަށާއި، މަޖިލިސް ތެރެއިންނާއި މަގުމަތިން އެމްޑީޕީއަށް ބައެއްކަންކަން ޑީއާރުޕީން ފަހިކޮށްދެއްވި ކަމުގެ ތުހުމަތު ވެސް ރައީސް ކުރެއްވިއެވެ. އެމަނިކުފާނު ވިދާޅުވީ ޑީއާރުޕީ އުފެއްދީ އެމްޑީޕީން ކުރަމުދާ ނޭދެވޭ އެތައްކަމެއް ހުއްޓުވައި ޖަވާބުދާރީ ކުރުވަން ކަމަށެވެ.
"ޕީޕީއެމް އުފެއްދީ އެމްޑީޕީގެ ޖައްބާރުކަން ބޮޑުވެގެން. އެއީ އަމިއްލަ މުހުތާދެއް ފުއްދާކަށް އުފެއްދި ޕާޓީއެއްނޫން. އެޕާޓީގެ ފައުޖު ފުވައްމުލަކުން މިފެންނަނީ. އަޅުގަނޑުމެންދާ ކޮންމެ ތާކުން މިފެންނަނީ އެފައުޖު،" ރައީސް ވިދާޅުވިއެވެ.
ރައީސް ވިދާޅުވީ އެމްޑީޕީގެ ސަރުކާރު ވެގެންދާނީ ޒުވާނުންގެ ސަރުކާރަކަށް ކަމަށް އިބޫ ވިދާޅުވި ކަމަށާއި އެއީ ކަނޑައެޅިގެން ބޮޑު ދޮގެއް ކަމަށް ވެސް އެމަނިކުފާނު ވިދާޅުވިއެވެ. "އެމްޑީޕީން އެބުނާ ޒުވާނުންގެ ސަރުކާރެކޭ ބުނެ އެހަދަނީ ބޮޑު ދޮގެއް. މިސަރުކާރުން 30 އަށްވުރެ ގިނަ ރިސޯޓު މާކެޓަށް ނެރެވިއްޖެ. ޒުވާނުން މިއަދު ބޭނުންވަނީ ޓޫރިޒަމް ދާއިރާއިން ވަޒީފާ. އެންމެ ގިނަ ޒުވާނުން ވަޒީފާއަދާކުރަނީ ޓޫރިޒަމްދާއިރާގައި، މިސަރުކާރުން ވަނީ ލައްކައެއްހާ ވަޒީފާ އުފައްދައިފައި،" ރައީސް ވިދާޅުވިއެވެ.
