އިސްލާމްދީނަށް އަދާވާތްތެރިން ގެންދަނީ އިދިކޮޅު ކޯލިޝަން މެދުވެރިކޮށް ރާއްޖޭގެ އިސްލާމީ ވެރިކަން ބަދަލު ކުރުމަށް ކަމަށް ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީންގެ ރަނިންމޭޓް ޑރ. މުހައްމަދު ޝަހީމް އަލީ ސައިދު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ ދ. ކުޑަހުވަދުއަށް ވަޑައިގެން އެރުށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ. "އަޅުގަނޑުމެންގެ ގައުމު މިއަދު މިވަނީ ވަރަށް ޚުތޫރަތްތެރި އިންތިޚާބަކާ ކުރިމަތިލައިފައި. މި އިންތިޚާބަކީ ދިވެހިރާއްޖޭގެ ތާރީޚުގައި ނާންނާނެ ފަދަ އިންތިޚާބެއް. މި އިންތިޚާބުގައި ދިވެހިން ކަނޑައަޅާ ގޮތެއްގެ މައްޗަށް ދިވެހި ގައުމުގެ ކަންކަން ކުރިމަގުގައި ބައްޓަން ވެގެންދާނީ،" ޝަހީމް ވިދާޅުވިއެވެ.
އެމަނިކުފާނު ވިދާޅުވީ ކުރިމަގުގައި ދިވެހި އުންމަތުގެ ކަންކަން ގާއިމް ވެގެންދާނީ މި އިންތިޚާބުގައި ދިވެހިން އިޚްތިޔާރުކުރާ ގޮތެއްގެ މައްޗަށް ކަމަށެވެ. "އެހެން ކަމުން މިއިންތިޚާބު ހައްސާސް މިވަނީ. މިއިންތިޚާބުގެ އެއްފަޅީގައި މިވަނީ ރައީސް އަބްދުﷲ ޔާމީން އަބްދުލްގައްޔޫމް. އަނެއްފަޅީގައި މިވަނީ އަދާވާތްތެރިންގެ މައްޗަށް އެކުލެވިގެންވާ ކޯލިޝަނެއް. އެއްބަޔަކު އަނެއްބަޔަކަށް އަދާވާތްތެރިކަންބޮޑު ކޯލިޝަނެއް. އެކޯލިޝަން މެދުވެރިކޮށް ދިވެހިރާއްޖޭގައި މިއޮތް އިސްލާމީ ވެރިކަން ބަދަލުކުރުމަށް މަސައްކަތް ކުރަމުން މިދަނީ އިސްލާމްދީނާ އަދާވާތެރި ބާރުތައް،" ޝަހީމް ވިދާޅުވިއެވެ.
އިސްލާމްދީނާ އަދާވާތްތެރި ބާރުތަކާ ގުޅިގެން އިސްލާމީ ދައުލަތެއްގެ ވެރިކަން ފުރޮޅާލަން މަސައްކަތް ކުރުމަކީ އެއީ ކޮންކަހަލަ ކަމެއްތޯ އޭގެ ތެރޭގައި މަސައްކަތް ކުރައްވާ އިލްމުވެރިންނަށް "އަޅުގަނޑު ސުވާލު ކުރަން ބޭނުންވޭ،" އެމަނިކުފާނު ވިދާޅުވިއެވެ.
ޝަހީމް ވިދާޅުވީ މިވެރިކަމުގެ ފަސްއަހަރުގައި ދިވެހިންނަށް ފެންނަމުން މިދަނީ ތަރައްގީގެ ވަރަށް ވަރުގަދަ ހަޟާރާތެއް ރާއްޖޭގައި ބިނާވާމުންދާތަން ކަމަށެވެ. އެމަނިކުފާނު ވިދާޅުވީ ކުރިން ވެރިކަން ކުރެއްވި އެއްވެސް ބޭފުޅަކަށް މިހާ ހަލުއި މިނެއްގައި ރާއްޖެ ހިސާބަށް ގެނެސްފައެއް ނުވާކަމަށެވެ.
ރައީސް ޔާމީން ދިވެހި ދައުލަތާ ހަވާލުވެ ވަޑައިގެންނެވިއިރު ރާއްޖޭގެ މައްޗަށް ބޭރުގެ ނުފޫޒުއޮތް މިންވަރުން ވަރަށް ރަނގަޅަށް ދެނެވަޑައިގަންނަވާ ކަމަށް އޭނާ ވިދާޅުވިއެވެ. މި ފަސްއަހަރު ރައީސް ޔާމީން ގެނެސްދެއްވި ތަރައްގީ ފުރިހަމަ ކުރުމަށް ފަސްނުޖެހި ރައްޔިތުންނަށް ޔާމީނަށް ވޯޓު ދެއްވަން ވިދާޅުވީ އަމިއްލަ އެދުމެއް އޮވެގެން ނޫންކަމަށް ވެސް ވިދާޅުވިއެވެ. އަދި މަޖުބޫރެއް އޮވެގެން ނޫންކަމަށް ވެސް ވިދާޅުވިއެވެ.
އިދިކޮޅު ކޯލިޝަނުގައި ތިބި މީހުގެ ތެރޭގައި ނަސާރާ ދީން ފަތުރަން އުޅުނު މީހުންނާއި ނޮވެމްބަރު 3 ގައި ރާއްޖެއަށް ހަމަލާދިން މީހުންނާ އޭގައިތެރޭގައި ދީނާއި ދައުލަތް ވަކިކުރަން އުޅޭމީހުން ވެސް އެބައުޅޭ ކަމަށް ވިދާޅުވިއެވެ. ސެކިޔުލިސްޓުންނާއި ބޭރުގެ ބާރުތަކާ ގުޅިގެން ދިވެހި ދައުލަތުގެ މިނިވަންކަމަށް އަރައިގަންނަން މަސައްކަތް ކުރި މީހުންވެސް އެބައުޅޭ ކަމަށް އޭނާ ވިދާޅުވިއެވެ. ދެންތިބީ "މިދެންނެވި މީހުންގެ އަވާގައި ޖެހިގެން ގޮސްތިބި ބައެއް ހެޔޮލަފާ މީހުން،" ޝަހީމް ވިދާޅުވިއެވެ.
