ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ) މައްޗަށް ގޮޅިގެ ގެތަކަށް މިއަދު ޒިޔާރަތް ކުރައްވައިފިއެވެ. މިއީ ކުރިއަށް އޮތް ރިޔާސީ އިންތިޚާބަށް ކެމްޕޭން ކުރެއްވުމަށް އެމަނިކުފާނު ކުރިއަށް ގެންދެވި ޑޯ ޓު ޑޯ ކެމްޕޭނެކެވެ.
އެމަނިކުފާނު އެ އަވަށަށް ވަޑައިގެންނެވުމުން ވަނީ ވަރަށް ހޫނު މަރުހަބާއެއް ދަންނަވައިފައެވެ. މިހަރަކާތުގައި އެމަނިކުފާނު ޒިޔާރާތްކުރެއްވި ހުރިހާ ގެތަކުން ކަހަލަގޮތަކަށްވަނީ ކުރިއަށްއޮތް ރިޔާސީ އިންތިޚާނުގައި އެމަނިކުފާނާ އެކު ތިއްބެވިކަން ހާމަކޮށްފައި ކަމަށް އެމްޑީޕީން ބުންޏެވެ.
އިބޫގެ އަރިހުގައި އެމްޑީޕީގެ އިސް ބައެއް ބޭފުޅުންވެސް ބައިވެރިވެ ވަޑައިގެންނެވިއެވެ. އޭގެ ތެރޭގައި އެޕާޓީގެ ޗެއާޕާސަން ޙަސަން ލަތީފް ހިމެނި ވަޑައިގަންނަވައެވެ. ޖޭޕީގެ ކެންދޫ ދާއިރާގެ މެމްބަރު ޢަލީ ޙުސައިނާއި، ކުރިގެ އެމްޕީ އިބްރާހީމް ރަޝީދު (ބޮންޑޭ) ވެސް ހިމެނިވަޑައިގަންނަވައެވެ.
ކޭމްޕޭން މިހަރަކާތުގައި އެމަނިކުފާނު ވަނީ ރައްޔިތުންނަށް ދިމާވެފައިވާ ދަތިކަންކަމާއި މުހުތާދުތައް އޮޅުން ފިލުވައި ރައްޔިތުންގެ ޝުޢޫރު އަޑު އައްސަވައިފައެވެ. އިބޫ ގެންދަވަނީ ރިޔާސީ އިންތިޚާބަށް ތައްޔާރުވުމުގެ ގޮތުން ކެނޑިނޭޅި ކޭމްޕޭން ކުރައްވަމުންނެވެ. އެގޮތުން މިހާތަނަށް އެމަނިކުފާނު ވަނީ ދެކުނާއި މެދުރާއްޖެއާއި އިތުރުގެ ބައެއް އަތޮޅުތަކުގެ ރަށްރަށަށް ވެސް ވަޑައިގެންފައެވެ. އެމަނިކުފާނު އެންމެފަހުން ވަޑައިގެންނެވީ ހުވަދުއަށެވެ.
