ޕީޕީއެމްގެ ރިޔާސީ ކެންޑިޑޭޓް ރައީސުލް ޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ރަނިންމޭޓް ޑރ. މުހައްމަދު ޝަހީމް އަލީ ސައީދު އުތުރުގެ ދެއަތޮޅަކަށް މިއަދު ފުރައިވަޑައިގެންފިއެވެ.
އެމަނިކުފާނު މިއަދު ފުރައިވަޑައިގެންނެވީ ހދ. އަތޮޅަށާއި، ށ. އަތޮޅަށެވެ.
ޑރ. ޝަހީމްގެ މިދަތުރުފުޅުގައި ހދ. ގެ 8 ރަށަކަށް ވަޑައިގަންނަވާނެއެވެ. އެއީ ހަނިމާދޫ، ކުޅުދުއްފުށި، ވައިކަރަދޫ، ނެއްލައިދޫ، ކުމުންދޫ، ނައިވާދޫ، ނޮޅިވަރަމް، ކުރިނބީ އެވެ. މިއީ ޕީޕީއެމްގެ ރިޔާސީ ކެންޑިޑޭޓް ރައީސް ޔާމީނަށް ތާއީދު ހޯއްދެވުމުގެ ގޮތުން ޑރ. ޝަހީމް ކުރައްވާ ކެމްޕޭން ދަތުރުފުޅެކެވެ. މި ދަތުރުފުޅުގައި ރަށްރަށުގެ ރައްޔިތުންނާ އެމަނިކުފާނު ބައްދަލުކުރައްވާނެއެވެ. މިދަތުރުފުޅުގައި ށ. ކޮމަންޑޫ، ފޯކައިދޫ ގެ އިތުރަށް މަރޮއްޓަށް ވަޑައިގަންނަވާނެއެވެ.
ރައީސް ޔާމީނަށް ތާއީދު ހޯއްދެވުމުގެ ގޮތުން ޑރ. ޝަހީމްވަނީ ހުވަދުއަތޮޅުގެ ބައެއް ރަށްރަށާއި، ފުވައްމުލަކު ސިޓީއާއި، ލ. އަތޮޅަށް ވަޑައިގެންފައެވެ.
