ސޫދާން ނިއުސް އެޖެންސީން ޚަބަރުދޭ ގޮތުގައި އެގައުމުގެ އުތުރުގައި ނީލަކޯރުން ދަތުރުކުރި ކުޑަ ބޯޓެއް ބަންޑުންޖަހާލައިގެން 23 މީހަކު މަރުވެއްޖެއެވެ. އޭގެ ތެރޭގައި 22 ދަރިވަރުން ހިމެނެއެވެ.
"ނަހްރުއްނީލް ސްޓޭޓްގެ އަލްބުހައިރާ ޑިސްޓްރިކްޓްގައި ކިޔަވާކުދިން މަދަރުސާތަކަށް އުފުލަން ދަތުރުކުރި ބޯޓެއް ބަންޑުން ޖަހާލައިގެން އެއީ ދަތުރުކުރި 22 ދަރިވަރަކާއި، އަންހެނަކު މިއަދު ހެނދުނު މަރުވެއްޖެއެވެ. މިކަން ދިމާވީ ގަދަވަޔާއި ބޯ ވާރޭގެ ސަބަބުން އޭގޭ އިންޖީނަށް މައްސަލަޖެހިގެންނެވެ." އެ ނިއުސް އެޖެންސީން މިއަދު ނެރުނު ބަޔާނެއްގައި ވެއެވެ.
ސިވިސް ޑިފެންސް ގެ މީހުން މިހާރުވެސް ދަނީ މަރުވި މީހުންގެ ހަށިތައް ހޯދައި ނަގަމުންނެވެ.
ޚަބަރު ލިބޭ ގޮތުގައި ބަންޑުން ޖަހާލި ބޯޓުގައި 40 ދަރިވަރުން ތިއްބެވެ. މަރުވި އަންހެން މީހާ އަކީ އެ ސްޓޭޓް ހޮސްޕިޓަލެއްގައި މަސައްކަތްކުރާ އަންހެނެކެވެ.
މިހާދިސާގެ ކުރިން މިއަދު ވިއްސާރަވެ ބޯކޮށް ވާރޭވެހެމުގެ ސަބަބުން ވެރިރަށް ޚުރްޠޫމުގެ މަދަރުސާތަކުގައި ނުކިޔަވާކަން ވެސް ވަނީ އިއުލާންކޮށްފައެވެ.
މިއަދު ހެނދުނު ސޫދާނުގެ ވެރިރަށް ޚުރްޠޫމާއި އެހެން ސަރަހައްދުތަކަށް ބޯކޮށް ވާރޭވެހި ފެންބޮޑުވުމުގެ ސަބަބުން މަގުތައް ބަންދުވެ ދަތުރުފަތުރަށް ހުރަސްއެޅިފައިވާ ކަމުގެ ޚަބަރުވެސް ލިބެމުން އެބަދެއެވެ.
އަނެއްކޮޅުން، ޚުރްޠޫމް ސަރަހައްދުގައި ފެންބޮޑުވުމުގެ ސަބަބުން 10 މީހުން މަރުވެ، 3 މީހުން ޒަޚަމްވެފައިވާއިރު، ކަސްލާ، ކަރްދަފާން އަދި އަލްޖަޒީރާ ސްޓޭޓްތަކުގައި 29 މީހުން ވަނީ މަރުވެފައެވެ.
ސޫދާނުގެ 18 ސްޓޭޓްގެ ތެރެއިން 13 ސްޓޭޓެއްގައި ފެންބޮޑުވުމުގެ ސަބަބުން 60 ހާހަށް ވުރެ ގިނަ މީހުންގެ ގެ ދޮރު މުޅިން ހަލާކުވެފައި، ނުވަތަ ނުއުޅެވަރުވެފައިވާ ކަމުގައި ސޫދާނުގެ ރެޑް ކްރެސްންޓުން ވަނީ ބުނެފައެވެ.
