ރާއްޖޭގެ ޚާރިޖީ ސިޔާސަތަށް ބަލާއިރު، ދިވެހިރާއްޖެ މިހާރު މިވަނީ، ޚާރިޖީ ސިޔާސަތުގައިވެސް އައު ބާބެއް ފަށައިފައި ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިނިވަންދުވަހުގެ ރަސްމީޖަލްސާގައި ވާހަކަފުޅު ދައްކަވަމުންނެވެ. ޚާރިޖީ އައު ސިޔާސަތުގެ ދަށުން ވިޔަފާރީގެ އައު ގުޅުންތަކެއްވެސް ރާއްޖެއިންވަނީ ގާއިމުކުރަން ފަށައިފައި ކަމަށް ރައީސް ވިދާޅުވިއެވެ. އެހެނަސް އެ ގުޅުންތަކަކީ، ކުރީގެ ގުޅުންތައް ނައްތައިލުމަށްފަހު ޤާއިމުކުރެވުނު ގުޅުންތަކެއްނޫން ކަމަށްވެސް ރައީސް ވިދާޅުވިއެވެ. ޚާރިޖީ ސިޔާސަތުތަކާއި ދާޚިލީ ސިޔާސަތުތައް ބަދަލުކުރުމަށް ގާއިމުކުރެވުނު ގުޅުންތަކެއްވެސް ނޫން ކަމަށް އެމަނިކުފާނު ވިދާޅުވިއެވެ.
"މިއާ ޚިލާފަށް، ރާއްޖޭގެ މިއަދުގެ ޚާރިޖީ ގުޅުންތަކަކީ، ދުނިޔޭގެ ތަރައްގީއާއި ތަމައްދުނުގައި ދިވެހިންގެ ފައިތިލަ ސާބިތުކޮށް، ދުނިޔޭގެ މައިދާނުގައި ހަމައިސްކޮޅަށް ދެމިލުމަށް ގާއިމުކުރެވޭ ގުޅުންތަކެއް. މިއީ، ދިވެހިންނަކީ ބަޔަކު ފުރުޞަތު ދިނީމާ ބަސްބުނާ ބަޔަކަށްވުމުގެ ބަދަލުގައި، އަމިއްލަ ހައިސިއްޔަތުން ދިވެހިންގެ ބަސް، އެހެންމީހުންވެސް ހޯދާނޭ ބަޔަކަށްވުމަށް ކުރެވޭ ދަތުރެއް،" ރައީސް ވިދާޅުވިއެވެ.
ރައީސް ވިދާޅުވީ ރާއްޖެއާ ކުރިމަތިކުރުވާ ނިންމުންތަކާއި ސިޔާސަތުތަކަކީ، އެ ނިންމުންތައް ނިންމާ ގައުމަކަށް ނުވަތަ ބަޔަކަށް އެންމެ އެކަށޭނަ އަދި އެންމެ ބޭނުންތެރި ނިންމުންތަކަށް ވާނޭ ކަމަށެވެ. އަދި މަދު ފަހަރަކުނޫނީ މިފަދަ ކަންކަމަކީ ހާމަޔަށް ފެންނަން ހުންނާނޭ ކަންކަން ނޫންކަމަށް ވެސް ވިދާޅުވިއެވެ.
"މިހެންކަމުން، ރާއްޖެއިން މިފަދަ ކަންކަމުގައި ޢަމަލުކުރެވޭނީ ރާއްޖެއަށް އެންމެ ފައިދާ ހުންނާނޭ ގޮތަށް ކަމާއި، އަދި އެއްވެސް ޙާލެއްގައި ފޮރުވިފައިވާ ކަމެއްގެ ތެރެއިންވިޔަސް ދިވެހިންގެ މިނިވަންކަމަށް ނުވަތަ އިސްލާމީ ޝަޚްޞަށް އެއްވެސް ގެއްލުމެއް ވެދާނޭ ކަމަކަށް ފުރުޞަތު ނުދިނުމަށް ހޭލާ އަބަދުމެ ތިބެންޖެހޭ،" ރައީސް ވިދާޅުވިއެވެ.
ރައީސް ވިދާޅުވީ މިއަދު ރާއްޖެއަށް ބޭރުގެ ބައެއްގެ ފަރާތްތަކުން ނުރައްކާތަކެއް ދިމާވެފައިވާނަމަ، އެކަމެއް އަދި އެކަމަކުން ކުރާނޭ އަސަރެއްގެ މިންވަރު ބިނާވެގެންވާނީ، ދައުލަތުގެ މުއައްސަސާތަކުގައި ހުރި ބަލިކަށިކަމެއްގެ މައްޗަށް ކަމަށެވެ. ވުމާއެކު، ދައުލަތް ބާރުވެރިކޮށް، ދައުލަތުގެ މުއައްސަސާތައް ވަރުގަދަ ކުރުމަކީ، ގައުމުގެ މިނިވަންކަން ރައްކާތެރިކޮށް، ގައުމީ ސަލާމަތްކަން ކަށަވަރުކުރުމުގެ އެންމެ މުހިންމު އަސާސް ކަމަށް ވެސް ރައީސް ވިދާޅުވިއެވެ.
ދެހާހުގެ އަހަރުތަކުގެ ކުރީކޮޅުއްސުރެ، ޤައުމުގައި އުފެއްދި ޚިޔާލުތަފާތުވުންތަކާއި، ބައިބައިކުރުވި ވިސްނުންތަކުގެ ތެރެއިން، ދައުލަތަށް ވަރަށް ބޮޑެތި ލޮޅުންތަކެއް އަރާފައިވާ ކަމަށްވެސް ރައީސް ވިދާޅުވިއެވެ.
