އެމެރިކާގެ ރައީސު ޑޮނާލްޑް ޓްރަމްޕާއި ރަޝިޔާގެ ރައީސު ވްލާޑިމީރް ޕުޓިންއާ ދެމެދު ބާއްވާ ބައްދަލުވުން ފިންލޭންޑުގެ ވެރިރަށް ހެލްސިންކީގައި އިއްޔެ ފަށައިފިއެވެ. ބައްދަލުވުމުން ފެށުމުގެ ކުރިން ވާހަކަފުޅު ދައްކަަަވަމުން ރައީސު ޓްރަމްޕް ވިދާޅުވީ "ދުނިޔެ ބޭނުންވަނީ އަހަރުމެން އެކުގައި ކުރިއަށް ދާތަން ދެކޭށެވެ."
2106 ވަނަ އަހަރު އެމެރިކާގައި ބޭއްވި ރިޔާސީ އިންތިޚާބަށް ރަޝިޔާ ނުފޫޒު ފޯރުވި މައްސަލަ މިސަމިޓުގައި ނުހިމެނޭ ކަންް ފާހަގަކޮށްލެވެއެވެ.
"އަނެއްހެން، މި ދިޔަ އަހަރުތަކުގައި އަހަރުމެންގެ ގުޅުން ދިޔައީ މާ ރަނގަޅަކަށް ނޫން." ޕުޓިންއާއެކު ފިންލޭންޑުގެ ރިޔާސީ ގަނޑުވަރުގައި އިންނަވައި ޓްރަމްޕް ވިދާޅުވިއެވެ. "އެހެންނަމަވެސް އަހަރެންނަށް ހީވަނީ އެންމެފަހުން އަހަރުމެންގެ މެދުގައި އާދަޔާއި ޚިލާފު ގުޅުމެއް އޮންނާނެހެން." އޭނާ އިތުރަށް ވިދާޅުވިއެވެ.
ބައްދަލުވުމުގެ ކުރިން ވާހަކަފުުޅު ދައްކަވަމުން ޕުޓިން ވިދާޅުވީ އޭނާއާއި ޓްރަމްޕް އާދަކޮށް ފޯނުން ވާހަކަފުޅުދައްކަވާ ކަމަށާ، ބައިނަލްއަގްވާމީ އެކިއެކި ބައްދަލުުވުންތަކުގައި ދެބޭފުޅުން ބައްދަލުކުރައްވަފައިވާ ކަމަށެވެ. އެހެންނަމަވެސް، "ބައިނަލްއަގްވާމީ މައްސަލަތަކާއި، ނާޒުކު މައްސަލަތަކާ ގުޅޭ ގޮތުން ފުރިހަމަ މަޝްވަރާތަކެއް ކުރަން ޖެހޭ" ކަމަށެވެ. "އޭގެ ތެރޭގައި ސަމާލުކަން ދޭން ޖެހޭ ބައެއް ކަންކަންވެސް އެބަހުރި" ކަން އޭނާ ފާހަގަކުރެއްވިއެވެ.
ނޫސްވެރިންގެ ބައްދަލުވުމުގައި ދެ ރައީސުންވެސް ފެނުނީ ވަރަށް ހަމަޖެހިވަޑައިގެން ތިއްބެވި ތަނެވެ. ބައެއް ފަހަރު ހިނިވަރުނަކުރައްވާ ތަންވެސް ފެނެއެެވެ.
ރައީސު ޕުޓިން ރައީސު ޓްރަމްޕަށް ވޯލްޑް ކަޕްގެ ފުޓުބޯޅައެއް ހަދިޔާކުރެއްވިއެވެ. އިންތިޒާމުތައް ރަނގަޅުވުމުގެ ސަބަބުން ރަޝިޔާއަށް ތައުރީފުގެ ބަސްތައް އޮހެމުންދާ، އެ މުބާރާތް ނިމިފައިވަަނީ ދެބޭފުޅުންގެ ބައްދަލުުވުމުގެ އެއް ދުވަސް ކުރިންނެވެ.
ރަޝިޔާއިން އެމެރިކާގެ ރިޔާސީ އިންތިޚާބަށް ނުފޫޒު ފޯރުވަން މަސައްކަތްކުރި ކަމުގެ ތުހުމަތު އޮތް ނަަމަވެސް، ޕުޓިންއާއެކު ރަނގަޅު ގުޅުމެއް އުފައްދަވަން ޓްރަމްޕް ވަރަށް ޝައުގުވެރިވެ ވަޑައިގެން ހުންނެވިކަން ފާހަގަކުރެއްވިއެވެ. ދެގައުމުގެ ގުޅުން ގޯސްވުމުގެ ޒިންމާވެސް އޭނާ އެޅުއްވީ ކުރީގެ ރައީސުން އިސްތަށިފުުޅުގައެވެ.
ޕުޓިންއާ ގާތްގުޅުމެއް އުފައްދަވަން މަސައްކަތްޕުޅު ކުރައްވާއިރު، އޭނާވަނީ ނޭޓޯގައި ތިބި އެމެރިކާގެ ރަހުމަތްތެރިންނަށް ފާޑުވިދާާޅުވެ، ހިތްޕުޅު ހަމަނުޖެހުން ފާޅުކުރައްވާފައެވެ. އިއްޔެ ހެނދުނު ފިންލޭންޑުގެ ރައީސު ސައުލީ ނިއިނިސްޓޯއާއި ބައްދަލުކުރެއްވުމަށްފަހު ދެއްކެވި ވާހަކަފުޅުގައި އޭނާ ވިދާޅުވީ، "ނޭޓޯ މީގެ ކުރިން ދުވަކުވެސް މިހާ ވަރުގަދައެއް ނޫން. އަދި މިހާ އެކުވެރިކޮށްވެސް ނެތް." ކަމުގައެވެ. އެކަން އެހެންވީ ހުރިހާ އެންމެން އެއްވަރަކަށް ބައިވެރިވުމަށް އޭނާ ބާރުއެޅުއްވުމުގެ ސަބަބުންކަން އޭނާ ފާހަގަކުރެއްވިއެވެ.
