އިރާގުގެ ދެކުނުގެ ރަށެއް ކަމަށްވާ ބަސަރާގައި ސަރުކާރުންދޭ ޚިދުމަތްތަކުގެ ފެންވަރު ދަށްވަމުން ދާތީ، ނުރުހުން ފާޅުކުުރުމަށް އެރަށު މީހުން އިހުތިޖާޖުކުރަމުން ދާތާ މިހާރު ހަފްތާއެއް ވެފައި ވާއިރު، އިއްޔެ އެމީހުން ވަނީ އިހުތިޖާޖު ވަރުގަދަކޮށް އާ މަރުހަލާއަކަށް ގެންގޮސްފައެވެ. އެމީހުން ވަނީ ބަސަރާ ޕްރޮވިންސުގައިވާ ތެޔޮ ނަގާ ވަޅުތަކަށް ދެވޭ މަގުތައް ބަންދުކޮށް، ބައެއް ތަންތަނަށް ވަދެގެެންފައެވެ.
ވަޒީފާއެއް ނެތިފައި ތިބި މީހުންގެ ކަންތައް ވިލަރެސްކުރާ ކޮމިޓީއަކުން މިއަދު ވަނީ، މިމަހު 15 ވަނަ ދުވަހު ބާއްވަން ތައްޔާރުވަމުންދާ މުޒާހަރާއަށް، ވަޒީފާ ނެތިފައި ތިބި މީހުން ނުކުތުމަށް ގޮވާލާފައެވެ.
އިހުތިޖާޖުުކުރާ މީހުން ވަނީ ބަސަރާ ޕްރޮވިންސުގެ ތެޔޮވަޅުތައް ކަމުގައިވާ 'މަޖްނޫނު'، 'އައްރުމައިލާ'، 'ޤަރްނާ 1' އަދި 'ޤަރްނާ 3' އަށް ދެވޭ މަގުތަކުގައި ފޭލިގެ ޖަހައިގެން މަގުތައް ބަންދުކޮށްފައެވެ. އަދި ތެޔޮ ނަގާ ކުންފުނިތަކުގެ ދޮރާާށިތައްވެސް ބަންދުކޮށްފައެވެ.
މީގެ އިތުރަށް ބަސަރާގެ އުތުރުގައި ހުންނަ ތެޔޮ އުފައްދާ ކުންފުނި 'ލުކޮއިލް' ގެ މައި އޮފީހަށް ވަދެ އެެތަނުގައިވާ ތަކެއްޗަށް ގެއްލުން ދިނުމުގެ ސަބަބުން އެތައް ބަޔަކު ހައްޔަރުކޮށްފައި ވެއެވެ.
އަދި އިހުތިޖާޖުކުރާ މީހުން ވަނީ ބަސަރާ ޕްރޮވިންސުގެ ރަށެއް ކަމަށްވާ ޝައްޠުލްޢަރަބުގެ މީހުން ވަނީ އައްޝަލާމިޖާގައި އިރާނާއި އިރާގާ ދެމެދު ސަރައްދީ ރޮނގު ހުރަސްކުރާ އަލިފާން ރޯކޮށްފައިވާ ޓައިރުން ބަންދުކޮށް، ބަސަރާ-ބަޣުދާދު ހައިވޭ ބަންދުކޮށް، ޒީގާރު އަދި މީސާނަށް ދެވޭ މަގުތައް ވެސް ބަންދުކޮށްފައެވެ.
މިމައްސަލައަށް ހައްލެއް ހޯދުމަށް ވަޒީރުންގެ މަޖިލީހުގައި އުފައްދާފައިވާ 'ކުއްލި ހާލަތާ ބޭހޭ ކޮމިޓީ' ގެ ޗެއާމަން އަދި ތެލާބެހޭ ވަޒީރު ޖައްބާރުއް ލުޢައިބީ ވިދާޅުވީ ބަސަރާ މީހުން އެދޭ ކަންތައް ދިރާސާކުރަމުންދާ ކަމަށާއި، އިތުރަށް އުފެއްދި 10 ހާސް ވަޒީފާ އެކި މިނިސްޓްރީތަކަށާއި، ސަރުކާރުގެ އިދާރާތަކަށާއި، ކުންފުނިތަކަށް ބެހުމުގެ މަސައްކަތްކުރަމުން ދާކަމަށެވެ.
އަނެއްކޮޅުން އިރާގުގެ ދީނީ ޒައީމު މުޤްތަދާ އައްޞަދްރު ވަނީ ބޭރުގެ ކުންފުނިތަކުގެ އެހީގައި ކަރަންޓުގެ ޚިދުމަތް ރަނގަޅުކުރުމަށާއި، ޚިދުމަތް ދިނުމުގައި ފަރުވާކުޑަކޮށް މަކަރުހަދާ މީހުން ވަކިކުރުމަށް ގޮވައިލައްވާފައެވެ.
