ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސާލީހު (އިބޫ) ޑޯޓުޑޯ ކެންޕޭނަށް ހުޅުމާލެއަށް ވަޑައިގެންނެވުމުން އެ އަވަށުން އެމަނިކުފާނަށް ހަމަލާ ދޭން ބަޔަކު މަސައްކަތް ކޮށްފިއެވެ.
އެމަނިކުފާނަށް ހަމަލާދޭން ބަޔަކު މަސައްކަތް ކޮށްފައިވަނީ ހުޅުމާލޭ ސެންޓްރަލް ޕާކް ސަރަހައްދުގަ އެވެ. އިބޫއަށް ހަމަލާ ދޭން އުޅުނުއިރު އެމަނިކުފާނުގެ އަރިހުގައި ތިބި މީހުންވަނީ އެކަމަށް ހުރަސް އަޅައި އެކަން ހުއްޓުވައިފައެވެ.
މިދަތުރުގައި އެމަނިކުފާނާއެކު އެމްޑީޕީގެ އިސް ބައެއް ބޭފުޅުންނާއި މަޖިލިސް މެންބަރުން ބައިވެރިވި ކަމަށް އެމްޑީޕީންވަނީ ބުނެފައެވެ. އިބޫއަށް ހަމަލާ ދޭން މަސައްކަތް ކޮށްފައިވަނީ ސައިކަލެއްގައި އައި ދެމީހެކެވެ. އެއީ ޕީޕީއެމްގެ އެކްޓިވިސްޓުން ކަމަށް އެމްޑީޕީން ވަނީ ތުހުމަތު ކޮށްފައެވެ.
މި މައްސަލަ ފުލުހުންނަށް ހުށަހަޅަން ވެސް އެމްޑީޕީންވަނީ ނިންމަވައިފައެވެ. މިކަމާ ބެހޭ ގޮތުން ފުލުހުންގެ މީޑިއާއިން ވިދާޅުވީ އެއްވެސް ހަމަނުޖެހުމެއް ހިނގާ ކަމަށްވާނަމަ ފުލުހުންދާނެ ކަމަށެވެ. އޭގެ އިތުރަށް އެއްޗެއް މިވަގުތަށް ބުނެވެންނެތް ކަމަށެވެ. "އެއްވެސް ހަމަނުޖެހުމެއް ހިނގަންޏާ ފުލުހުން އެޓެންޑެންޓްވާނެ. އިތުރު ކޮމެންޓެއް ދެވެންނެތް މިވަގުތު،" ފުލުހުންގެ މީޑިއާއިން ވިދާޅުވިއެވެ.
އިބޫއަށް ދޭން އުޅުނު ހަމަލާ އެމްޑީޕީން ވަނީ ކުށްވެރިކޮށްފައެވެ. އިބޫއަށް ހަމަލާ ދޭން އުޅުމުގެ އިތުރަށް އެޕާޓީގެ އިސްބައެއް ބޭފުޅުންގެ ގަޔަށް ބަޔަކު ވަނީ މިއަދު ކަޅުތެޔޮވެސް ޖަހައިފައެވެ.
