މާލެއަތޮޅު މާފުށީގައި ގާއިމްކޮށްފައިވާ ތައުލީމާއި މަސައްކަތް އުނގަންނައިދޭ މަރުކަޒު (ކުޑަކުދިންގެ އިސްލާހިއްޔާ) ހިންގަމުންދާ ބިން އެރަށުގެ ރައްޔިތުންނަށް ދޫކޮށް ލެއްވުމަށް މިއަދުން ފެށިގެން ނިންމަވައިފި ކަމަށް ރައީސް ޔާމީން ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެރަށު ގޮނޑުދޮށް ހިމާޔަތް ކުރުމަށް ހިންގި މަޝްރޫއު ނިންމެވުމަށް އެރަށުގައި މިހާރު ކުރިއަށްދާ ރަސްމިއްޔާތު ޝަރަފުވެރި ކޮށްދެއްވައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ އެތަނުގެ ލޭންޑްޔޫސް ޕްލޭނެއް ހަދައިގެން އެތަނުގައި ކުރިއަށް ގެންދާނެ ކަންކަމާބެހޭ ގޮތުން ކައުންސިލުން ރައްޔިތުންނާ ވާހަކަ ދައްކައިގެން ގޮތެއް ނިންމެވުމަށެވެ.
"މިރަށުގެ ވަރަށްބޮޑު ބައެއް މިއޮންނަނީ ކުޑަކުދިންގެ އިސްލާހިއްޔާއަށް ނަގާފައި. އެތަނަކީ އަޅުގަނޑުމެންނަށް ބޭނުންތެރި ތަނަކަށް ވެގެންދާނެ. އެހެންނަމަވެސް އެންމެ ރަނގަޅަށް މިކަން ކުރެވޭނީ މާފުށީގައިތޯ، މިހާރުތިބީ ކިތައްކުދިންތޯ ބަލާލައިފައި އަޅުގަނޑު މިއަދުން މިއަދަށް ނިންމައިފިން ކުޑަކުދިންގެ އިސްލާހިއްޔާ ސަރުކާރުން މާފުށީ ރައްޔިތުންނަށް ދޫކޮށްލަން،" ރައީސް ވިދާޅުވިއެވެ.
ރައީސް ޔާމީން ވިދާޅުވީ އެރަށަށް އާމްދަނީ ލިބޭ މައިގަނޑު މަސައްކަތަކީ ފަތުރުވެރިކަން ކަމަށް މިހާރުވަނީ ވެފައެވެ. އެރަށުގައި މިހާރުވެސް 50 އަށްވުރެ ގިނަ ގެސްޓްހައުސް ހިންގާ ކަމަށާއި އިސްލާހިއްޔާހުރި ސަރަހައްދުގައި އިތުރު ގެސްޓްހައުސްތަކެއް އެޅިއްޖެ ކަމަށްވާނަމަ މާފުށީގެ އިތުރު ޒުވާނުންނަށް ވަޒީފާގެ ފުރުސަތުތައް ތަނަވަސް ވެގެންދާނެ ކަމަށް ވެސް ރައީސް ވިދާޅުވިއެވެ. އޭގެ ސަބަބުން އެތައް ބަޔަކަށް އާމްދަނީ ވެސް ލިބިގެންދާނެ ކަމަށް ރައީސް ވިދާޅުވިއެވެ.
އިސްލާހިއްޔާ މިހާރު އެހުރީ އެރަށުގައި އެންމެރީތި ގޮނޑުދޮށް އޮތް ސަރަހައްދު ކަމަށްވެސް އެމަނިކުފާނު ވިދާޅުވިއެވެ.
އެ ބިމުގައި ގެސްޓްހައުސްތައް އެޅުމަށްފަހު ރައްޔިތުން ބޭނުންވާ ތަރައްގީގެ އެހެން މަޝްރޫއުތައް ވެސް އެތަނުގައި ކުރިއަށް ގެންދެވޭނެ ކަމަށް ރައީސް ވިދާޅުވިއެވެ. "އެހެންވީމާ މާފުށީގެ ރައްޔިތުން ނިންމާކަމެއް ކުރުމަށް ކުޑަކުދިންގެ އިސްލާހިއްޔާހުރި ބިން މިއަދުން ފެށިގެން ހަމަޖެހިގެން މިދިޔައީ،" ރައީސް ވިދާޅުވިއެވެ.
