ގޭންގުތަކާ ދިމާލަށް މީހުން މިސްރާބު ޖަހަނީ ޒިންމާ އަދާކުރަން ޖެހޭ ބަޔަކަށް ޒިންމާ އަދާ ނުކުރެވިގެން ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެ އެވެ.
އޭނާ މިހެން ވިދާޅުވީ ފުލުހުންތަކަކަށް ހަމަލާ ދީ އަދި އިންޒާރު ދެމުންދާތީ އެކަން ހައްލުކުރަން ގޮވާލައިކާށިދޫ ދާއިރާގެ މެމްބަރު އަބްދުﷲ ޖާބިރު ހުށަހެޅުއްވި ކުއްލި މައްސަލައިގާ ރައްޔިތުންގެ މަޖިލީހުގައި މިއަދު ކުރިއަށްގެންދިޔަ ބަހުސް މަރުހަލައިގަ އެވެ.
އާދަމް ޝަރީފް ވިދާޅުވީ ގޭންގުތައް ހިނގަނީ ބަޔަކު އެ ގޭންގުތައް އެކްޓިވޭޓްކޮށް އަދި ހިންގާތީ ކަން އެންމެންވެސް ގަބޫލުކުރާ ކަމަށެެވެ.
"ހުރިހާ ސިޔާސީ މީހުންވެސް ރާއްޖޭގެ ނުފޫޒު ގަދަ ހުރިގާ އެންމެންވެސް ގޭންގު ހަރަކާތްތަކަށް ވާގިވެރިވުން، އެމީހުން އެކްޓިވޭޓްކުރުން ހުއްޓާލަންވީ. އެހެންނޫނީ ވިއްޔާ މި ވާނީ އަޅުގަނޑުމެން އެންމެންގެ ކަރުގައި ބެދޭ މަޅިއަކަށް، މިކަމުން ސަލާމަތްވާނެ ހަމައެކަނި ގޮތަކީ ގޭންގު ހަރަކާތްތަކާ ދުރުވުން." އާދަމް ޝަރީފް ވިދާޅުވި އެވެ.
ރާއްޖޭގެ އެކި ހިސާބުތަކުގައި ގޭންގުތަކަށް ނިސްބަތްވާ ގިނަ މީހުން ތިބިކަން ހާމަކޮށް ފުލުހުން ބުނެފައިވަނީ އޭގެތެރޭގައި ގިނަ އަދަދަކަށް ކުޑަކުދިން ވެސް ހިމެނޭ ކަމަށެވެ.
