ބަލިވެ އިންނަ ދުވަސްވަރު މާބަނޑުމީހާ ކުރާ ކަންތައްތަކުގެ ސަބަބުން އޭނާ ވިހާ ދަރިއަށް އަސަރު ކުރާ ކަމަށް ވަރަށް ގިނަ މީހުން ގަބޫލު ކުރެއެވެ. އިރު ކޭތަ ނުވަތަ ހަނދު ކޭތަ ހިފާފައި ހުއްޓާ ވަޅިއެއް ފަދަ ތޫނު އެއްޗެއް ބޭނުން ކޮށްފި ނަމަ ވިހާ ދަރިއަކީ ނުކުޅެދޭ ކުއްޖަކަށް ވެދާނެތީ ވަރަށް ގިނަ މީހުން ކޭތަ ހިފާފައި ހުއްޓާ އެ ފަދަ އެއްޗެހި ބޭނުމެއް ނުކުރެއެވެ. މި ނޫނަސް މި ފަދަ އެތައް އާދައެއް ދިވެހިންގެ ތެރޭގައި އިހުއްސުރެ ހަރުލައިފައި އެބަ ހުއްޓެވެ.
ދަރިފުޅު ވިހެއުމަށް ފަހުވެސް ދިވެހިން ހިފަހައްޓާ ވަރަށް ގިނަ އާދަތައް ހުރެއެވެ. ދަރިފުޅު ބިންމަތީގައި ފައި ޖެއްސުމުގެ ރަސްމިއްޔާތަކީ މިހާރުވެސް ވަރަށް އާދަޔާ ޚިލާފު ގޮތަކަށް ބައެއް ރަށް ރަށުގައި ފާހަގަ ކުރާ ރަސްމިއްޔާތެކެވެ. އިރު އޮއްސޭ ވަގުތު ދަރިން ގޮވައިގެން ގެއިން ބޭރަށް ނުކުތުމަކީވެސް ސުންޕާ ކަމެއް ކަމަށް ބުނެވެއެވެ.
މި އާދަތައް މިހެން ހުރި ކަމުގައި ވިޔަސް ޒަމާނާއެކު ބައެއް އާދަތައް ހަނދާން ނެތެމުން އެބަ ދެއެވެ. ޚާއްސަކޮށް މާލޭގައި މި ބާވަތުގެ އާދަތަކުގައި ހިފެހެއްޓުން ވަނީ ވަރަށް މަދު ވެފައެވެ.
މާބަނޑު މީހާއަށް ފެންނަ މަންޒަރުތަކަކީވެސް ބަނޑުގައި އޮންނަ ކުއްޖާއަށް އަސަރު ކުރާ ކަމެއް ކަމަށް ބައެއް މީހުން ގަބޫލު ކުރެއެވެ. ރީތި، ދޮން ކުދިންގެ ފޮޓޯ ގިނަ ގިނައިން ބަލާ ނަމަ ވިހާ ކުއްޖާ ރީތި ވެފައި ދޮން ވާނޭ ކަމަށް ގަބޫލު ކުރާ ޒުވާނުން އަދިވެސް ދިވެހިންގެ ތެރޭގައި އެބަ އުޅެއެވެ.
އެއް ދުވަހަކު ތިން ރަހުމަތްތެރިން އެ މީހުންނަށް ލިބެން އުޅޭ ދަރިންގެ ވާހަކަ ނުވަތަ ލިބިފައިވާ ދަރިންގެ ވާހަކަ ދައްކާން އަތިރިމަތީގައި އިށީނދެލައިގެން ތިއްބެވެ. މި ތިން މީހުންނަކީވެސް މަތީގައި ދެންނެވުނު ފަދަ ވާހަކަތައް އަޑު އަހައި، އެ ފަދަ މަންޒަރުތައް ދެކޭ ބަޔަކަށް ވާތީ އެހެން މީހުންނެކޭ އެއް ފަދައިން ވަހުމުގެ ބަލިން މުޅީން ސަލާމަތް ވެފައި ތިބި ތިން މީހުންނެއް ނޫނެވެ.
ވާހަކަ ދައްކަމުން ގޮސް އަޙްމަދު ބުންޏެވެ. "މީހުން ދައްކާ ވާހަކައަކީ މުޅިއަކުން ދޮގެއްވެސް ނޫން. އަހަރެންގެ އަންހެނުން ބަލިވެ އިން ދުވަސްވަރު ވަރަށް ގިނައިން ދޮން ހިޔަލަ އާއި ޢަލިފުޅު ވާހަކަ ކިޔައި އުޅުނު. އެ ފަހަރު ވިހެއި އެއްމާބަނޑު ދެ ކުދިން."
އިބްރާހީމް އޭނާގެ ރަހުމަތްތެރިޔާގެ ވާހަކައަށް ތާއީދު ކުރުމުގެ ގޮތުން ބުންޏެވެ. "ތިޔައީ ތެދެއް. އަހަންނަށްވެސް ތިޔަ ކަހަލަ ކަމަކާ ދިމާވި. އަހަރެންގެ އަންހެނުން ބަލިވެ އިން ދުވަސްވަރު ވަރަށް ގިނައިން "ތިން ދޫނި" މި ނަން ކިޔާ ވާހަކަ ފޮތެއް ކިޔައި އުޅުނު. އޭނަ ވިހެއީ އެއްމާބަނޑު ތިން ކުދިނ."-
މި ދެ މީހުންގެ ވާހަކަ އަހާން ހުރެފައި ކުއްލިއަކަށް ފެނުނީ މުޙައްމަދު އަނބުރައިގަނެގެން ވެއްޓުނު ތަނެވެ. ހޭއެރީ މޫނަށް ފެން އަޅައި، ތަޅުވައި ހަދާތާ އެތައް އިރެއް ވީ ފަހުންނެވެ. ހޭއެރި އިރު މޫނުމަތީން ކަން ބޮޑުވުމުގެ އަސަރު ފެންނާން ހުއްޓެވެ.
އިބްރާހީމް އަހައިލިއެވެ. "މުޙައްމަދާ. ކުއްލިއަކަށް އަނބުރައިގަތީ ކިހިނެއް ވެގެން؟"
މުޙައްމަދު ބުނެލިއެވެ. "ކަލޭމެން ދެއްކި ވާހަކައަކުން ކުއްލިއަކަށް މާ ބޮޑަށް ހާސްވާ ގޮތްވީ. އަހަރެންގެ އަންހެނުން މިހާރު އިނީ ބަލިވެ. އިއްޔެ އަހަރެން ގެއަށް ދިޔަ އިރު އޭނާ އިނީ ވާހަކަ ފޮތެއް ކިޔާން. އެއީ ޢަލީބާބާ އާއި ސާޅީސް ވަގުންގެ ވާހަކަ!"
