ފާދިއްޕޮޅު ނައިފަރަކީ ، ބައިގިނަ އަދި މަސްވެރިކަން ފިޔަވައި ، ރަށުގައިކުރާނެ މާގިނަ މަސައްކަތްތަކެއް އޮންނަ ރަށެއްނޫނެވެ. ހުކުރުދުވަހަކީ މަހަށްނުފުރާ ދުވަހެކެވެ. އެހެންކަމުން ރޯދަމަހު ، ޢަޞުރު ނަމާދުކޮށްލައިގެން ، ހަވީރު " ވާގަނޑު ބާރުކޮށްލަން " ހޮޅުއަށްޓަށް ޖައްސައިލުމަކީ ގިނަ ފިރިހެނުންގެ އާދައެކެވެ. ފުލޯކު ވާހަކަ ކިޔުމަކީވެސް ހޮޅުއަށީގައި ޢާންމުކޮށް ކުރާ ކަމެކެވެ. އެއްބަޔަކު ވަރުބަލިވެފައި ތިބިއްޔާ ނިދާނީއެވެ. އަނެއްބަޔަކު ، ވާހަކަ އަޑުއަހަން ތިބޭނެއެވެ. ބައެއްމީހުން ހޮޅުއަށްޓަށް ދާއިރު ، އެމީހުންގެ ފިރިހެންދަރިންވެސް ގެންދާނެއެވެ. ރޯދަ ކުރުކޮށްލުމަށްޓަކައެވެ.
ހުކުރު ދުވަހެއްގެ ހަވީރުގެ ވަގުތެވެ. ރޯދަމަހެއްގެ މެދުތެރެއިން ދުވަހެކެވެ. ހޫނު ގަދަވެފައި އަވިބާރެވެ. އެއްވެސް ވަރަކަށް ވައިރޯޅިއެއްގެ ކަންފުޅެއްވެސް ނުވެއެވެ. އާދައިގެ މަތިން ހަވީރުވީއިރު ، ހޮޅުއަށްޓަށް މީހުން އަތުވެއްޖެއެވެ. މިއަދަކީ ވަރަށް ޚާއްޞަ ދުވަހެކެވެ. ދަތުރުވަރިއަކު ، އެރަށަށް ދުރުވެ އުޅުއްވާ ، ފިނޭ އަޙްމަދު ކަތީބުގެ ވާހަކަ ކިޔުން އޮތް ދުވަހެކެވެ. ފިނޭ އަޙްމަދު ކަތީބަކީ ވަރަށް ރީތި ، ފުލޯކު ވާހަކަ ކިޔުއްވާ ބޭކަލެކެވެ. ރޯދަމަސް ނޫނަސް ، ނައިފަރުގައި ފިނޭކަތީބު އުޅުއްވަންޏާ ، ވާހަކަ ކިޔުއްވަން ހޮޅުއަށްޓަށް ގެންދިއުމަކީ އާދައެކެވެ. އެދުވަހު ހޮޅުއަށްޓަށް ދުރުވަމުން ، ނައިފަރުގައި ކިޔަވަން ބަހައްޓާފައިހުރި ، ކަތީބުގެ ފިރިހެންދަރިފުޅުވެސް ގެންދެވިއެވެ.
ކަތީބު ވާހަކަ ކިޔުއްވަން ފެއްޓެވިއެވެ. ހޮޅުއަށިދޮށުގައި އެނބުރޭ ޅަވަރުގެ ކުދިންތައް އަޑުގަދަވެސް ކުރެއެވެ. ހޮޅުއަށްޓައް އަރައި ދުވެ އުނދަގޫ ކުރެއެވެ. އިބިލީހު ފިނދަށް ދަނޑިހެރި ފުރައިގެ ކުދިން ކޮޅެކެވެ. ފިނޭކަތީބުގެ ދަރިފުޅުވެސް އޭގެތެރޭގައި އުޅެއެވެ. އެއީ އެންމެ ލާނެއްފުރައިގެ ޢުމުރު ކަމަށްވާތީ ، އެއްގޮތަކަށްވެސް އެކުދިން ހިމޭނަކުން ނުތިބެއެވެ. ދުވެ ، ހަޅޭއްލަވައި އަޑުގަދަ ކުރަމުން ގެންދެއެވެ. ބައެއްފަހަރަށް ބޮޑެތި މީހުން ހަޅޭއްލަވައިގަނެ ، އެކުދިން މައިތިރިކުރަންޖެހޭ ފަހަރުވެސް އާދެއެވެ. އެކުދިންވެސް ރުޅިއައިސްގެން ، ހޮޅުއަށީއޮށޯވެތިބޭ މީހުންގެ ގަޔަށް ބޮލަށް ވެލިއުކައި ހަދައެވެ.
އުއްޑުން އޮތްމީހެކެވެ. ވަރުބަލިވެގެން ކަންނޭނގެއެވެ. އޮތީ ނިދިފައެވެ. އަނގައޮތީ ތަންމިނަށް ހުޅުވިފައެވެ. އަނގައިގާ ދަތެއް ނެތެވެ. މިމީހާގެ އަނގަ ހުޅުވިފައި އޮތްތަން ، ކުދިވެރިންނަށް ފެނިއްޖެއެވެ. މިހާރު ނިދިފައި އޮތަސް ، އެއީ އެދުވަހު އެކުދިންނަށް ، ވަރަށް ޖެއްސުންކޮށްފައި އޮތް މީހެކެވެ. ފިރިހެންކުދިންނާ ދޯޅުވެސް މީހެކެވެ. ލަނޑެއްދޭން އެންމެ ރަނގަޅު އެކެކެވެ.
ހުރިހައި ކުދިން ސައްލާކޮށްފަ ، ފަޅޯއޮނުތަކެއް ހޯދައި އެއްއޮނު އަނެއްއޮނާ ގުޅުވައިލިއެވެ. ހޮޅުއަށްޓާ ޖެހިގެންހުރި ކާނިގަހަށް ، އެތަނުން އެއްކުއްޖަކު އެރިއެވެ. ގުޅުވައިފައިވާ ފަޅޯއޮނުތަކުގެ ކުރީއޮނު ހިފައިގެންނެވެ. ރާވައިފާ އޮތީ ، ފަޅޯއޮނު ހިފައިގެން ކާނިގަހަށް އަރާ ކުއްޖާ އެއޮނު ތެރެޔަށް ފެން އެޅީމައި ، އެއްކުއްޖަކު ތިރީގައި ހުރެ ، އަނގަހުޅުވައިގެން ނިދާފައި އޮތް މީހާގެ އަނގަޔާ ދިމާކުރުމަށެވެ. އޭރުން އެމީހާއަށް ފެން ބޮވޭނެއެވެ. ގަހަށް އަރާ ކުއްޖާ އޮނުތެރެޔަށް ކުޑަކަމުދާ ވާހަކަވެސް ދެއްކިއެވެ. ގަހަށް އެރި ކުއްޖާ ، ހޮޅިޔަށް ފެން އަޅާލެއް މާބޮޑަށް ލަސްވެއްޖެއެވެ. ތިރިން ، މުސްކުޅިޔާގެ އަނގަޔާ ހޮޅިދިމާކުރަން އޮތް ކުއްޖާ ގޮވާ ގޮވާވެސް މަތީގައިއޮތް ކުއްޖާއަކަށް އަޑެއް ނުއިވުނެވެ. އެންމެފަހުން ، ހޮޅީގައި އެއްޗެއް ތާށިވެފަތޯ ބަލައިލަން ހޮޅީގެ ތިރީ ކޮޅުން އެތެރެ ބަލައިލިއެވެ. އެވަގުތަކީ މަތީގައި އޮތް ކުއްޖާ މަތިން ، ފަޅޯ އޮނުން އެއްޗެހި ފޮނުވައިލި ވަގުތެވެ. ހުރިހައި އެއްޗެއް އޮހިގަތީ ތިރީގައިހުރި ކުއްޖާގެ މޫނު މައްޗަށެވެ. އަނގަ ހުޅުވައިގެން އޮތް މުސްކުޅިޔާގެ އަނގަޔަކާ ދިމަލެއް ނުކުރެވުނެވެ. އެމުސްކުޅިޔާއަށް އެއްޗެއް ބޯންދެވޭގޮތެއް ނުވިއެވެ.
