ފާއިތުވި ނޮވެންބަރު މަހުގެ ތިންވަނަ ދުވަހު އެެމެރިކާގައި އޮތް ރިޔާސީ އިންތިޚުބުން ހޮވި އިލެކްޓޯރަލް ކޮލެޖުން އެމެރިކާގެ 46 ވަނަ ރައީސުކަމަށް ޑިމޮކްރެޓިކް ޕާޓީގެ ކެންޑިޑޭޓް ޖޯ ބައިޑަން އަދި ނާއިބު ރައީސުކަމަށް އޭނާގެ ރަނިންގމޭޓް ކަމަލާ ހެރިސް ރަސްމީކޮށް ހޮވައިފިއެވެ. އެމެރިކާގެ ބޮޑެތި ޓީވީ ޗެނަލްތަކުން ކުރިންވެސް ބުނެފައިވާ ގޮތަށް، ޖޯ ބައިޑަން ވަނީ އިލެކްޓޯރަލް ކޮލެޖްގެ 306 ވޯޓު ހޯއްދަވާފައެވެ. އިންތިޚާބު ކާމިޔާބުކުރުމަށް ބޭނުންވަނީ 270 ވޯޓެވެ. ރައީސު ޓްރަމްޕަށް ލިބިވަޑައިގަތީ 232 ވޯޓެވެ.
އެމެރިކާގެ ރިޔާސީ އިންތިޚާބު ހަމަޖެހިފައި އޮންނަ ގޮތުން ރައްޔިތުން ވޯޓުލަނީ ސީދާ ރައީސު ހޮވާކަށް ނޫނެވެ. އެމީހުންގެ ވޯޓުން އިންތިޚާބުުކުރަނީ ކޮންމެ ސްޓޭޓަކުންެވެސް އިލެކްޓޯރަލް ކޮލެޖަށް ފޮނުވާ އިލެކްޓަރުންނެވެ. ކޮންމެ ސްޓޭޓެއްގެ އާއްމު ވޯޓު ކާމިޔާބުކުރައްވާ ކެންޑިޑޭޓަކަށް އެ ސްޓޭޓުގެ ހުރިހާ އިލެކްޓޯރަލް ވޯޓު ލިބިވަޑައިގަންނަވާނެއެެވެ. ނިބްރާސްކައާއި މެއިން ފިޔަަވައެވެ. އެ ދެ ސްޓޭޓުގައި އެލެކްޓޯރަލް ވޯޓު ދެބައިކުރެއެވެ. މިހާރު އިލެކްޓޯރަލް ކޮލެޖްގެ އަދަދީ 538 އެވެ.
ރޭ ނިމިގެން ދިޔައީ އެމެރިކާގެ ރިޔާސީ އިންތިޚާބުގެ ދެވަނަ މަރުހަލާއެވެ. ރިޔާސީ އިންތިޚާބުގައި ވޯޓުލާ ކޮންމެ އަހަރެއްގެ ޑިސެންބަރު މަހުގެ ދެވަނަ ބުދަ ދުވަހުގެ ފަހުން އަންނަ ފުރަތަމަ ހޯމަ ދުވަހު ބާއްވަން އެމެެރިކާގެ ގާނޫނު އަސާސީގައި ކަނޑައަޅާފައި އޮންނަ އިލެކްޓޯރަލް ކޮލެޖްގެ ވޯޓެެވެ. ދެން އޮންނާނީ ރިޔާސީ އިންތިޚާބުގެ ތިންވަނަ މަރުހަލާއެވެ. އެއީ އަންނަ ޖަނަވަރީ މަހުގެ 6 ވަނަ ދުވަހު ކޮންގްރެސްގެ ދެގެ އެކުގައި ބާއްވާ ޖަލްސާއެއްގައި އިލެކްޓޯރަލް ކޮލެޖުގެ ނަތީޖާ ތަސްދީގުކޮށް ރައީސުކަމަށް ހޮވިވަޑައިގަތް ބޭފުޅަކު ރަސްމީކޮށް އިއުލާންކުރުމެވެ.
އެހެން ރިޔާސީ އިންތިޚާބުތަކުގައި، އިލެކްޓޯރަލް ކޮލެޖުގެ ވޯޓުުލުމާއި، ކޮންގެރެސްއިން ބާއްވާ ޖަލްސާތަކަކީ މާބޮޑު ސަމާލުކަމެއް ލިބޭ ހަރަކާތްތަކެއް ނޫނެވެ. އާއްމުން ވޯޓުލާ ދުވަހު މީޑިއާތަކުން ނަތީޖާ އިއުލާންކުރުމުން ބަލިވާ ކެންޑިޑޭޓު ބަލި ގަބޫލުކުރުމުން އާއްމުންނަށް އިންތިޚާބު ނިމުނީއެެވެ. މި ފަހަރު އިންތިޚާބުގައި ބަލިވެވަޑައިގެންްނެވި ރައީސު ޑޮނާލްޑް ޓްރަމްޕް ބަލި ގަބޫލުނުކުރައްވައި، އިންތިޚާބުގެ ނަތީޖާއާމެދު ސުވާލު އުފައްދަވަމުން ގެންދަވާތީ އިލެކްޓޯރަލް ކޮލެޖްގެ ވޯޓު މިފަހަރު މުހިއްމުވީއެވެ. އެމެރިކާގެ ޗެނެލްތަކުން މިފަހަރުގެ އިލެކްޓޯރަލް ކޮލެޖްގެ ވޯޓު ވަގުތުން ދައްކާފައި ވެސް ވެއެވެ.
ރޭ އިލެކްޓޯރަލް ކޮލެޖުން އޭނާއަކީ އެމެރިިކާގެ މުންތަޚަބު ރައީސުކަން ރަސްމީކޮށް ކަނޑައެޅުމާާ ގުޅިގެން ޖޯ ބައިޑަން ވަނީ ގައުމާ މުޚާޠަބުކުރައްވާފައެވެ.
"އާލަމީ ވަބާއަކުންވެސް އަދި ބާރުގެ ބޭނުން ނަހަމަ ގޮތުގައި ބޭނުން ކުރުމަކުންވެސް ޑިމޮކްރެސީގެ ހުޅުކޮޅު ނިވައެއް ނުލެވޭނެެ." ރޭ ދެއްކެވި ވާހަކަފުޅުގައި ޖޯ ބައިޑަން ވިދާޅުވިއެވެ. "އެމެރިކާގައި ވެރިން ވެރިކަން އަތުނުލާ، ރައްޔިތުން އެމީހުންނަށް ވެރިކަން ދެނީ." ބައިޑަން އިތުރަށް ވިދާޅުވިއެވެ.
އިލެކްޓޯރަލް ކޮލެޖުން ޖޯ ބައިޑަންއަކީ މުންތަޚަބު ރަސްމީކޮށް ކަނޑައެޅުމުން ނޫނީ ބައިޑަން ރައީސުކަމަށް ހޮވިވަޑައިގަތްކަމަށް ގަބޫލުނުކުރައްވާނެކަމަށް މީގެ ކުރިން ވިދާޅުވެފައިވާ ރައީސު ޓްރަމްޕް ރޭގެ ވޯޓަށްފަހު އަދި އެެއްވެސް އެއްޗެއް ވިދާޅުވެފައި ނުވެއެވެ.
މައްސަލައަކަށް ފަހު މައްސަލައެއްގައި ކޯޓުތަކުގައި ނާކާމިޔާބީއާއި ކުރިމަތިވެވަޑައިގަންނަވާއިރުވެސް، ޓްރަމްޕް ހުންނެވީ ބަަލި ގަބޫލުކުރައްވާ ގޮތަކަށް ނޫނެވެ.
