ބަޖެޓް ބަހުސަށް އިތުރު ޖަލްސާއެއް ބާއްވާންޖެހޭނެކަމަށް ރައްޔިތުންގެ މަޖިލީހުގެ މިއަދުގެ ޖަލްސާ ފަށްޓަވަމުން، މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
2020 ވަނަ އަހަރުގެ ބްޖެޓް ބަހުސް މަޖިލީހުގައި ފެއްޓެވީ އިއްޔެއެވެ. އިއްޔެގެ ޖަލްސާ ހަވީރު 5 ޖެހުމާ ހަމައަށް ވަނީ ކުރިއަށް ގެންގޮސްފައެވެ. މިއަދުގެ ޖަލްސާ ފަށްޓަވަމުން މަޖިލީހުގެ ރައީސް ވިދާޅުވީ އިއްޔެގެ ޖަލްސާގައި ބަޖެޓްގެ ބަހުސްގައި 25 މެމްބަރުން ވާހަކަ ދައްކަވައިފައިވާ ކަމަށެވެ. މިއަދުގެ ޖަލްސާވެސް ހަވީރު 5 ޖެހުމާހަމައަށް ކުރިއަށް ގެންދެވި ނަމަވެސް އިތުރު ޖަލްސާއެއް ބާއްވަން ޖެހޭނެކަމަށެވެ. އިތުރު ޖަލްސާއެއް ބާއްވާނީ މިރޭތޯ ނޫނީ މާދަމާތޯ ކަނޑައެޅުމަށް މިއަދުގެ ވޯޓް ގަޑީގައި ވޯޓަށް އައްސަވާނެކަމަށް ވިދާޅުވިއެވެ.
2020 ވަނަ އަހަރުގެ ބްޖެޓް ބަހުސްގައި މެމްބަރަކަށް ދެއްވުމަށް ނިންމަވައިފައި ވަނީ 15 މިނެޓްގެ ފުރުޞަތެވެ. އަދި ވަގުތު ޖެހޭއިރު މެމްބަރަކު ވަޑައިގެންނެތިއްޔާ އެމެމްބަރެއްގެ ވަގުތު ގެއްލިގެން ދާނެކަމަށް ވެސް މަޖިލީހުގެ ރައީސް ވަނީ ވިދާޅުވެފައެވެ. މެމްބަރުން ގޭގައި ތިއްބެވި ނަމަވެސް، ބަހުސަށް މަޖިލީހަށް ގެންނަވާނެކަމަށާއި އެކަމަށް ސަމާލުވެ ތިއްބެވުމަށް މަޖިލީހުގެ ރައީސް، ބަޖެޓް ބަހުސް ފެށުމުގެ ކުރިން އިއްޔެގެ ޖަލްސާގައި ވަނީ ވިދާޅުވެފައެވެ.
2020 ވަނަ އަހަރަށް ލަފާކުރާ ދައުލަތުގެ ބަޖެޓަކީ 37.5 ބިލިއަން ރުފިޔާއެވެ. އާމްދަނީގެ ގޮތުގައި ލިބޭނެކަމަށް ލަފާ ކުރަނީ 29.92 ބިލިއަން ރުފިޔާ އެވެ. އެއީ ހިލޭއެހީއާއި ޓެކުހަށް ލިބޭނެ ކަމަށް އަންދާޒާކުރާ މިންވަރެވެ. ދައުލަތުގެ ބަޖެޓުން އަންނަ އަހަރު ވެސް އެންމެ ބޮޑު ޚަރަދެއް ކުރުމަށް ކަނޑައަޅައިފައިވަނީ ރިކަރަންޓަ ށެވެ. އެއީ 22.2 ބިލިއަންރުފިޔާ އެވެ. އެއީ ޖުމްލަ ޚަރަދުގެ 59 އިންސައްތައެވެ. ޕީއެސްއައިޕީ އަށް 10 ބިލިއަން ރުފިޔާ ކަނޑައަޅާފައިވެއެވެ. އެހެނިހެން ކެޕިޓަލް ޚަރަދުތަކަށް ކަނޑައަޅައިފައިވަނީ 5 ބިލިއަން ރުފިޔާ އެވެ.
