ނަވާރަވަނަ ރައްޔިތުންގެ މަޖިލީހުން ރައްޔިތުންނަށް ފައިދާހުރި ބިލްތަކެއް ފާސް ކުރައްވައި ރައްޔިތުންގެ ޙާލަތު "ބޮޑު ތަނުން" ރަނގަޅު ކޮށްދެއްވާނެ ކަމަށް ސަރުކާރު ކޯލިޝަންގެ މައި ޕާޓީ އެމްޑީޕީގެ ތަރުޖަމާނު އަދި މާފަންނު އުތުރުދާއިރާގެ މަޖިލީސް މެމްބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.
އާފަތިހަށް މަޢުލޫމާތު ދެއްވަމުން އިންތި ވިދާޅުވީ އެކަން އެގޮތަށް ކުރެއްވުމަށް ރައްޔިތުން ވަނީ ސަރުކާރަށް ބާރުދީފައެވެ.
"ރާއްޖޭގެ ޑިމޮކްރަސީއާއި ޙައްޤުތަކާއި ސަރުކާރުގެ ވަޢުދުތައް ފުއްދުމަށް ރައީސް އިބްރާހީމް މުޙައްމަދު ޞާލިޙުގެ ސަރުކާރަށް ރައްޔިތުން އެވަނީ ބާރުވެރިކަން ދީފައި. އިރާދަކުރެއްވިއްޔާ ރައްޔިތުންގެ ދިރިއުޅުމުގެ ޙާލަތު ބޮޑުތަނުން ރަނގަޅު ކޮށްދޭނެ،" އޭނާ ވިދާޅުވިއެވެ.
ނަވާރަވަނަ މަޖިސް ވެގެންދާނީ އުންމީދީ، އުފެއްދުންތެރި މަޖިލީހެއް ކަމަށާއި ރައްޔިތުންނަށް ފައިދާކުރަނިވި ބިލްތަކެއް ހުށަހެޅި ފާސްވެގެންދާނެ ކަމަށް އޭނާ ވިދާޅުވިއެވެ. އޭގެ ސަބަބުން ރައްޔިތުންނަށް ފަހި ގޮތްތައް މެދުވެރިވެރިވެގެން އަންނާނެ ކަމަށް ވެސް ވިދާޅުވިއެވެ.
ނަވާރަވަނަ ރައްޔިތުންގެ މަޖިލީހުގެ އިންތިޚާބުގައި އެމްޑީޕީން ވަނީ 60 އަށްވުރެ ގިނަ ގޮނޑި ކާމިޔާބުކޮށް މިހާތަނަށް ޕާޓިއަކަށް ލިބިފައިނުވާވަރުގެ ބޮޑު އަޣުލަބިއްޔަތެއް ހޯދައިފައެވެ.
