ފާއިތުވި ފެބުރުވަރީ މަހުގެ 14 ވަނަ ދުވަހު ކަޝްމީރުގެ އިންޑިޔާ ފަޅީގެ ޕުލްވާމާގައި ޖާނުން ފިދާވެގެން ދިން ބޮމުގެ ހަމަލާގައި 40 އަށްވުރެ ގިނަ ފުލުހުން މަރާލި ހާދިސާއާ ގުޅިގެން، ހަތިޔާރުއެޅި ޖަމާއަތްތަކާ ދެކޮޅަށް ޕާކިސްތާނުން ހިންގާ އޮޕަރޭޝަނުގައި 44 މީހުން ހައްޔަރުކޮށްފިއެވެ.
ޕާކިސްތާނުގެ އިންޓީރިޔާ މިނިސްޓްރީން ބުނިގޮތުގައި، ހައްޔަރުކުރި މީހުންގެ ތެރޭގައި ހަފުތާބަންދުގައި އިންޑިޔާއިން ޕާކިސްތާނާ ހަވާލުކުރި ފައިލެއްގައި އޮތް ލިސްޓެއްގައިވާ މީހުންންވެސް ހިމެނެއެވެ.
ހައްޔަރުކުރި މީހުންގެ ތެރޭގައި ޕުލްވާމާ ހަމަލާގެ ޒިންމާ އުފުލި ޖައިޝެ މުހައްމަދުގެ ޒައީމު މައުލާނާ މަސްއޫދު އަޒްހަރުގެ ކޮއްކޮ މުފްތީ އަބްދުއްރައޫފާއި، ދަރިފުޅު ހަމަދު އަޒްހަރު ހިމެނެއެވެ.
"ގައުމީ އެކްޝަން ފްލޭނަށް އަމަލީ ސިފަ ގެނައުމަށްޓަކާ، ހުރިހާ ޕްރޮވިންޝަލް ސަރުކާރެއްގެ މަންދޫބުން ހިމެނޭ މަތީ ފެންވަރުގެ ބައްދަލުވެއް މާރިޗު 4 ގައި އިންޓީރިއާ މިނިސްޓްރީގައި ބާއްވާފައިވޭ. ގައުމީ އެކްޝަން ޕްލޭން ދިރާސާކުރި އިރު ނޭޝަނަލް ސެއުރިޓީ ކޮމިޓީއަށް ފާހަގަކުރެވުނު ކަންތައް މިދަނީ ތަންފީޒުކުރަމުން." އިންޓީރިޔާ މިނިސްޓްރީން ނެރުނު ބަޔާނެއްގައި ވެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އިންފޯމޭޝަން މިނިސްޓްރީގެ ސްޓޭޓް މިނިސްޓަރު ޝެހެރްޔާރު އަފްރީދީއާއި، އެ މިނިސްޓްރީގެ ސެކްރެޓަރީ އާޒަމް ސުލައިމާނު ޚާން ވެސް ވަނީ މީހުން ބަންދުކޮށްފައިވާކަން ކަށަވަރުކޮށްދެއްވާފައެވެ.
"(މި އޮޕަރޭޝަން މިހިންގަނީ) އާއްމުކޮށް (އެފަދަ ޖަމާއަތްތަކުގެ) އެންމެން ޝާމިލުވާހެން. އަހަރުމެން މިތިބީ ވަކި ޖަމާއަތަކާ ދެކޮޅަށޭ ހީވާހަކަލަ ގޮތަކަށް މަސައްކަތްކުރާކަށް އަހަރުމެން ބޭނުން ނުވޭ." އިންޓީރިޔާ ސެކްރެޓަރީ ވިދާޅުވިއެވެ.
ޕުލްވާމާ ހަމަލާއާ ގުޅިގެން އިންޑިޔާއިން ހަވާލުކުރި ލިސްޓުގައި ހިމެނޭ (މުފްތީ ރައޫފާއި ހަމަދު އަޒްހަރު ފަދަ) މީހުންވެސް ހައްޔަރުކުރި މީހުންގެ ތެރޭގައި ހިމެނޭކަމަށް އާޒަމް ސުލައިމާން ޚާން ވަނީ އެއްބަސްވެވަޑައިގެންފައެވެ. އެހެންނަމަވެސް "އޭގެ މާނައަކީ ފިޔަވަޅު އަޅަމުން ދަނީ އެ ލިސްޓުގައި ބުނެފައިވާ މީހުންނާ ދެކޮޅަށް އެކަނި ނޫން" ކަމުގައި އޭނާ ވިދާޅުވިއެވެ.
އިންޓީރިޔާ ސެކްރެޓަރީ ވިދާޅުވިގޮތުގައި މިހާރު ހިންގާ އޮޕަރޭޝަނުގައި އެއްވެސް ޖަމާއަތެއްގެ މިލްކިއްޔާތު ހިފަހައްޓަން ޖެހިއްޖެނަމަ އެކަންވެސް ކުރާނެއެވެ.
ހައްޔަރުކުރި މީހުންގެ ތެރޭގައި ޖައިޝެ މުޙައްމަދުގެ ޒައީމު މައުލާނާ މަސްއޫދު އަޒްހަރު ނުހިމެނެއެވެ. އިންޓީރިއާ މިނިސްޓްރީގެ މަސްދަރަކުން ޕާކިސްތާނުގެ ބައެއް ނޫސްތަކަށް މައުލޫމާތުދީފައި ވާގޮތުގައި މަސްއޫދު އަޒްހަރު ހައްޔަރު ކުރޭތޯ ނުވަތަ ނުކުރަންވެސް އަދި ނުކުރަންވެސް އަދި ނުނިންމައެވެ. އެކަން ނިންމަވާނީ އިންޓީރިޔާ މިނިސްޓަރުގެ ހައިސިއްޔަތުން ބޮޑުވަޒީރު އިމްރާހް ޚާނެވެ. އިންޑިޔާއިން ހަވާލުކުރި ލިސްޓުގައި މަސްއޫދު އަޒްހަރު ހިމެނޭކަންވެސް އެމަސްދަރުން ވަނީ ކަށަވަރުކޮށްދީފައެވެ.
އަނެއްކޮޅުން، ޕާކިސްތާނުގެ ކަނޑުގެ ސަރަހައްދަށް ވަންނަން އުޅުނު އިންޑިޔާގެ އަޑިންދާބޯޓެއް (ސަބްމެރީނެއް) ފައްސާލާފައިވާކަމަށް ޕާކިސްތާނުގެ ކަނޑުގެ ސިފައިން މިއަދު ވަނީ ބުނެފައެވެ. އެ އަޑިންދާބޯޓުގެ ވީޑިއޯއެއް ޕާކިސްތާނުން އާއްމުކޮށްފައިވާއިރު، އެގައުމުން ބުނެފައި ވަނީ އެބޯޓަށް ހަމަލާ ނުދިނީ މަސްރަހު އިތުރަށް ހޫނުކުރަން ބޭނުންނުވާތީ ކަމުގައެވެ.
