ކުރިއަށްއޮތީ ރާއްޖޭގެ އިލްމުވެރިންނަށް ބިރުވެރި ދުވަސްތަކެއް ކަމަށް ރާއްޖޭގެ މަޝްހޫރު އިލްމުވެރިޔާ އަދި ނިމިގެންދިޔަ ރިޔާސީ އިންތިޚާބުގައި ރައީސް ޔާމީންގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރާއްޖޭގެ މަޝްހޫރު އިލްމުވެރިއެއް ކަމަށްވާ އައްޝައިޚް އާދަމް ޝަމީމް އިންޑިއާއަށް ވަޑައިގެންނެވުމުން އެގައުމަށް ވަނަނުދެއްވައި އިންޑިއާގެ އިމިގްރޭޝަނުން އޭނާ ހިފެހެއްޓުމުން ކުރެއްވި ޓްވީޓެއްގައެވެ.
އެޓުވީޓުގައި ޝަހީމްވަނީ ސުވާލެއް ވެސް ކުރައްވައިފައެވެ. އެމަނިކުފާނު ސުވާލު ކުރައްވައިފައިވަނީ ވަކި ފެކްޝަނަކަށް ނިސްބަތްވާ މީހަކަށް ގެއްލުން ދިނުމަކީ އެމްޑީޕީން ގެންނަން މަސައްކަތްކުރާ އިންސާފުގެ މަގުތޯއެވެ.
"ވަކި ފެކްޝްނަކަށް ނިސްބަތްވާ މީހަކުނަމަ އެމީހަކަށް ގެއްލުން ދިނުމަކީ ތިޔަ ގެންނަން އުޅޭ "އިންސާފުގެ" މަގުތޯއެވެ؟ ތިޔައިން ރަމްޒު ކޮށްދެނީ ކުރިއަށްއޮތީ އިލްމުވެރިންނަށް ބިރުވެރިކަމުން ފުރިގެންވާ ދުވަސްތަކެއް ކަމެވެ. މާތްﷲ އާ ވަކީލެވެ. ޑރ. ޝަމީމަށް ކެތްތެރިކަން ދެއްވާށިއެވެ." ޑރ. ޝަހީމްގެ ޓްވީޓުގައި ވިދާޅުވެފައިވެއެވެ.
ރައީސް ޔާމީންގެ ސަރުކާރުން ޗައިނާއާ ގުޅުން ބަދަހުކޮށް ތަރައްގީގެ ޚާއްސަ ބައިވެރިއަކަށް ޗައިނާ ހެއްދެވި ހިސާބުން ފެށިގެން ރާއްޖެއާއި އިންޑިއާގެ ގުޅުން އައީ ހީނަރުވަމުންނެވެ. އެހެންނަމަވެސް ދެ ގައުމުން މިހާރުވެސް ވިދާޅުވަމުން ގެންދަވަނީ ދެ ގައުމިގެ މެދުގައި އެއްވެސް މައްސަލައެއް ނެތްކަމަށެވެ. އެހެންނަމަވެސް މިފަދަ އަމަލުތައް ދެގައުމުން ދަނީ ފެންނަމުންނެވެ.
ޕީޕީއެމްގެ ޕީޖީ ލީޑަރު އިންޑިއާ އަށް ވަޑައިގެންނެވުމުން ވެސް ވަނީ އެގައުމަށް ނާރުވައި ރާއްޖެ ފޮނުވައިލައިފައެވެ. އަދި އިންޑިއާގައި އުޅޭ ދިވެހިންނާއި ރާއްޖޭގައި އުޅޭ އިންޑިއާ މީހުންނަށް ވިސާގެ މައްސަލަ ވެސް ފަހަކަށް އައިސް ވަނީ ވަރަށް ބޮޑަށް އިތުރުވެފައެވެ.
ޝައިޚް ޝަމީމް މާދަމާގެ ވަގުތެއްގައި ރާއްޖެ ވަޑައިގަންނަވާނެ ކަމަށް މައުލޫމާތު ވަނީ ލިބިފައެވެ.
