މިމަހު 23 ވަނަ ދުވަހު ބާއްވާ ރިޔާސީ އިންތިޚާބު އިދިކޮޅު ފަރާތްތަކަށް ކާމިޔާބު ކުރެވިއްޖެނަމަށް މިރާޖެއަކީ އަމާން ތަނެއް ކަމަށް ހައްދަވައި ދެއްވާނެ ކަމަށް އިދިކޮޅު ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން ށ. ފޯކައިދޫގައި ބޭއްވި ޖަލްސާގައި ވާހަކަފުޅު ދައްކަވަމުން އިބޫ ވިދާޅުވީ ޒުވާނުންތިބީ ވަޅިހަރައިފާނެތީ މަގުމައްޗަށް ނިކުންނަށް ބިރުން ކަމަށެވެ. އެހެން ކަމުން މިމަހުގެ 23 ގައި ބާއްވާ އިންތިޚާބުގައި އެމަނިކުފާނަށް ވޯޓުދީ ވެރިކަމަށް އިންތިޚާބު ކޮށްދެއްވައިފިނަމަ ރައްޔިތުންގެ ހާސްކަން ފިލުވައި ގައުމު އަމާންތަނަށް ހައްދަވައި ދެއްވާނެ ކަމަށެވެ.
"މިއަދު މިރާއްޖޭގެ ހާލަތަކީ އެއްބަޔަކު އެތިބީ ގޭގެ ކުލި ނުދެއްކި ހާސްކަމުގެ ތެރޭގައި. އަނެއްބަޔަކު ބޭސްފަރުވާ ނުލިބިގެން އެކަމުގެ ހާސްކަމުގެ ތެރޭގައި، މަސްވެރިންނާއި އޮޑިވެރިންތިބީ ނެގި ލޯނު ނުދެއްކިގެން ހާސްކަމުގެ ތެރޭގައި، މައިންބަފައިން ތިބީ ދަރިފުޅު މަސްތުވާތަކެތީގެ ވަބާގައި ޖެހިގެން ކަންބޮޑުވެ އެކަމުގެ ހާސްކަމުގެ ތެރޭގައި، ޒުވާނުން މަގުމައްޗަށް ނުކުންނަން ނުކެރިތިބީ ވަޅިޖަހައި މަރާލަފާނެތީ އެކަމުގެ ހާސްކަމުގެ ތެރޭގައި، ވިޔަފާރިވެރިންތިބީ މީރާއިން ކޮށްފާނެ ޖުރީމާނާއަކާ ދޭތެރޭ ކަންބޮޑުވެ ހާސްވެފައި. މިއީ މިއަދު މިރާއްޖޭގެ ހާލަތުއޮތް ގޮތް. އަޅުގަނޑުމެން ތިޔަބޭފުޅުންނަށް ކަށަވަރުކޮށް މިއަރުވަނީ ތިޔަބޭފުޅުން ނިކުމެވަޑައިގެން މިމަހުގެ ތޭވީސްވަނަ ދުވަހު ވޯޓު ލައްވައި އަޅުގަނޑުމެންނަށް ތާއިދު ކޮށްދެއްވާށޭ. އިރާދަކުރެއްވިއްޔާ އަޅުގަނޑުމެން ތިޔަބޭފުޅުންގެ ހާސްކަން ފިލުވައި މިރާއްޖެއަކީ އަމާން މާހައުލަކަށް އަނެއްކާވެސް ހަދައިދޭނަން،" އިބޫ ވިދާޅުވިއެވެ.
އިބޫ ވިދާޅުވީ އެމަނިކުފާނުގެ ވެރިކަމުގައި ރަށްތައް ތަރައްގީ ކުރައްވާނީ ރަށްރަށުގެ މީހުންގެ އަޑު އައްސަވައި މަޝްވަރާ ކުރައްވައިގެން ކަމަށެވެ. އެގޮތުން ފޯކައިދޫ ބަނދަރު އަލުން ހަދައި އެތަނުގެ ބޭނުން ކުރެވޭނެ ގޮތް ހައްދަވައި ދެއްވުމާއި، ފެނާއި ނަރުދަމާގެ ޚިދުމަތް ވެސް ގާއިމް ކޮށްދެއްވާނެ ކަމަށް ވިދާޅުވިއެވެ. އިންޖީނުގެ އެހެންތަނަކަށް ބަދަލުކޮށްދީ މިހާރަށްވުރެ ރަނގަޅަށް ޚިދުމަތް ލިބޭނެގޮތް ހައްދަވައި ދެއްވާނެ ކަމަށް ވެސް އެމަނިކުފާނު ވިދާޅުވިއެވެ. އޭގެ އިތުރަށް ހެލްތު ސެންޓަރުގައި ލެބޯޓަރީ ގާއިމްކޮށް ފެންވަރު ރަނގަޅު ޚިދުމަތް ފޯރުކޮށްދެއްވާނެ ކަމަށް ވެސް ވިދާޅުވިއެވެ. އަދި އެރަށުގެ ސްކޫލް ބޮޑުކޮށް އެއްދަންފަޅިއަށް ކިޔަވައިދެއްވަން ފަށްޓަވާނެ ކަމަށް ވެސް ވިދާޅުވިއެވެ. މިސަރުކާރުން ވަނީ ށ. ބިލެތްފަހީގައި އެއާޕޯޓެއް އެޅުމުގެ މަސައްކަތް ފަށްޓަވައިފައި ކަމަށާއި އެމަނިކުފާނުގެ ވެރިކަމުގައި އެތަން ނިންމަވައި ދެއްވާނެ ކަމަށް ވެސް ވިދާޅުވިއެވެ. އޭގެ އިތުރަށް ށ. އަތޮޅުގެ އެހެން ރަށްރަށަށް ބޭނުންވާ ކަންކަން ވެސް ކޮށްދެއްވާނެ ކަމަށް އިބޫ ވިދާޅުވިއެވެ.
އިބޫ ވިދާޅުވީ މިސަރުކާރަށް ތަރައްގީ އެނގޭ ކަމަށް ގަބޫލު ނުކުރެވޭ ކަމަށެވެ. "މިސަރުކާރަށް މިޒަމާނުގެ ތަރައްގީގެ ތައާރަފެއް އެނގެއެކޭ މިއަދު ދެންނެވޭކަށެއްނެތް. ތަހުޒީބު މުޖުތަމައެއްގައި ތަރައްގީ މިނެކިރަނީ މުޅިން އެހެން ގޮތަކަށް. ލިބޭ އާމްދަނީއާއި، ތަނުގައި އޮންނަ މަސްލަހަތާއި، އޮންނަ މިނިވަންކަމާއި ފުދުންތެރިކަމާއި އަދި ލިބޭއެއްޗަކުން ދަރަނި ދެއްކޭފަދަ ކަންތައްތަކުގެ މައްޗަށް. މިއިން އެއްވެސް ކަމެއްގައި ކޮންކްރީޓާއި ދަގަނޑުގެ ވާހަކައެއް ނާދޭ،" އިބޫ ވިދާޅުވިއެވެ.
