ގުޅިފައިވާ ޕާޓީތަކުގެ ވެރިކަމެއްގައި އެންމެ އިސްދައުރަކަށްވާނީ ރާއްޖޭގައި އަދުލު އިންސާފު ގާއިމްކުރެއްވުން ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ބ. އަތޮޅަށް މިހާރު ކުރައްވަމުން ގެންދަވާ ކެންޕޭން ދަތުރުފުޅުގައި އެރަށު ހިތާދުއަށް ވަޑައިގެން އެރަށު މީހުންނާ ބައްދަލު ކުރައްވައި ދެއްކެވި ވާހަކަފުޅުގައެވެ. "އަޅުގަނޑުމެންގެ އެންމެ މުހިންމު އެއް މަސްއޫލިއްޔަތަކީ އެންމެ މުހިންމު އެއް ވާޖިބަކީ ރާއްޖޭގައި އަދުލު އިންސާފު ގާއިމް ކުރުން. އިރާދަ ކުރެއްވިއްޔާ އަޅުގަނޑުމެންގެ ސަރުކާރުގައި އަދުލު އިންސާފު ގެއްލިފައިވާ ފަރާތްތަކަށް އިންސާފު ހޯދައިދިނުމުގެ މަސައްކަތް އަޅުގަނޑުމެންގެ ޕްރޮގްރާމުގެ އެންމެ ކުރީގައި އޮންނާނެ،" އިބޫ ވިދާޅުވިއެވެ.
އިބޫ ވިދާޅުވީ އެބޭފުޅުންގެ ވެރިކަމެއްގައި ހިންގާ ތަރައްގީގެ އެންމެ ފުރަތަމަ ޕްރޮޖެކްޓަކަށް ހައްދަވާނީ ހިތާދޫގެ ފެނާއި ނަރުދަމާ ގާއިމް ކޮށް ދެއްވުމުގެ މަސައްކަތް ކަމަށެވެ. އެރަށުގެ ފެނަކީ ފެންވަރައި ތާހިރުވުމަށް ވެސް ކަމުނުދާ ފެން ކަމަށް އެކަމާބެހޭ މާހިރުން ވިދާޅުވެފައިވާ ކަމަށެވެ.
އެރަށަކީ އެއްވެސް ސަރުކާރަކުން މާބޮޑު އަޅާލުމެއް ދީފައިވާ ސަރުކާރެއް ނޫންކަމަށާއި އެމްޑީޕީ ސަރުކާރުގައި އެރަށުގެ ނަރުދަމާއާއި ފެނުގެ ނިޒާމް ގާއިމް ކުރައްވުމަށް ހަމަޖައްސަވައިފައިވަނިކޮށް ވެރިކަން ބަދަލުވީ ކަމަށް ވެސް އޭނާ ވިދާޅިވިއެވެ.
