ރާއްޖޭގެ ބައެއް ރަށްރަށަށް އުދައިގެން އަސަރު ކޮށްފާނެ ކަމަށް މެޓް އޮފީހުން ބުނެފިއެވެ.
އެ ތަނުން ބުނެފައިވަނީ އުދައިގެ އަސަރުކުރާނީ ދިޔަވަރު ބޮޑުވާ ގަޑިތަކުގައި ކަމަށެވެ. އުދައިގެ އަސަރު ކުރުމުގެ އިތުރަށް ރާއްޖޭގެ އެކި ހިސާބަށް ވިއްސާރަ ކުރާނެ ކަމަށާއި ބައެއް ރަށްރަށަށް ގުގުރުމާއެކު ބޯކޮށް ވާރޭވެހޭނެ ކަމަށް ލަފާކުރެވޭ ކަމަށް ވެސް މެޓު އޮފީހުން ވަނީ ބުނެފައެވެ.
ދެކުނުގެ އަތޮޅުތަކަށް އިރު ދެކުނާއި ދެކުނުން، ގަޑިއަކު 05 މޭލާ 13 މޭލު ދެމެދުގެ ބާރުމިނުގައި ވައިޖެހޭނެ ކަމަށާއި، އެހެން ހިސާބުތަކަށް ހުޅަނގާއި ހުޅަނގުއުތުރުން ގަޑިއަކު 13 މޭލާ 23 މޭލު ދެމެދުގެބާރުމިނުގައި ވައިޖެހޭނެ ކަމަށްވެސް ބުނެފައިވެއެވެ. ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައިގަދަވުން އެކަށީގެންވާ ކަމަށްވެސް މެޓުން ބުނެފައިވެއެވެ.
ދެކުނު އަތޮޅުތަކުގެ ކަނޑުތައް އާދައިގެވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށާއި އެހެންހިސާބުތަކުގެ ކަނޑުތައް ގަދަވާނެ ކަމަށްވެސް ބުނެފައިވެއެވެ.
މެޓު އޮފީހުން މިރޭ ވަނީ ނ. އަތޮޅާއ ގދ. އާ ދެމެދުގައި ހިމެނޭ ރަށްރަށަށް ވައިޓްއެލާޓްވެސް ނެރެފައެވެ.
މެޓުން ބުނެފައިވަނީ މޫސުމަށް ސަމާލުވުމަށާއި ޚާއްސަކޮށް ކަނޑު ދަތުރުކުރައްވާ ފަރާތްތަކުން މޫސުމަށް ޚާއްސަ ސަމާލުކަމެއް ދިނުމަށެވެ.
