ހަނގުރާމައިގެ ޖައްވެއްގެ ތެރޭގައި މެދުއިރުމަތި އޮތްއިރު، އަދި ސީިރިޔާގެ ދެކުނުގެ ސަރަހައްދުތަކުން އީރާނު ސަފައިން ފޭބުމަށް އިސްރާއީލުން ގޮވާލަމުންދާ މި ދަނޑިވަޅުގައި އެމެެރިކާގެ މަޝްހޫރު މަޖައްލާ ނިއުސްވީކުން ވަނީ ދެގައުމުގެ އަސްކަރީ ބާރު އަޅާކިޔާފައެވެ.
ނިއުސްވީކުން ބުނާގޮތުގައި ދެގައުމުން ކުރެ ގައުމަކުން ބޮޑު ހަނގުރާމައަކަށް ދާން ބޭނުމެއް ނުވެއެވެ. އެހެންނަމަވެސް، މަސްރަހު ހޫނުވެގެން ގޮސް ނިންމައިގެން ތިބި ގޮތަށް ހުރިހާ ކަމެއް ނުދިއުމުގެ ފުރުސަތުވެސް އެބައޮތެވެ.
ސިފައިންގެ އަދަދަށް ބަލާއިރު އިސްރާއީލުގެ ލަޝްކަރުތަކުގައި 1 ލައްކަ 70 ހާސް ސިފައިން އަމަލީ ގޮތުން ހަރަކާތްތެރިވާއިރު ރިޒާވް ސިފައިންގެ ގޮތުގައި 4 ލައްކަ 45 ހާސް މީހުން އެބައިތިއްބެވެ.
ވަޒީފާގައި ތިބި އީރާނު ސިފައިންގެ އަދަދު 5 ލައްކަ 34 ހާހަށް އަރައެވެ. އެގައުމުގެ ރިޒާވް ސިފައިންގެ ގޮތުގައި 400 މީހުން އެބަތިއްބެވެ. އެހެންކަމުން، އީރާނަކީ މެދުއިރުމަތީގައި އެންމެ ބޮޑު ލަޝްކަރު އޮތް ގައުމެވެ.
މިިކަމާބެހޭ ގޮތުން ނިއުސްވީކުން ދެކޭ ގޮތުގައި ޓެކްނޮލޮޖީގެ ގޮތުން އަސްކަރީ އުފެއްދުންތައް ކުރިއަރާފައިވާ، ދުރުން ހަމަލާދެވޭ ހަތިޔާރުގެ ބާރު ގަދަ މިދުވަސްވަރުގައި ލަޝްކަރު ބޮޑުވުމަކުން ހަނގުރާއިން މޮޅުވާނެ ކަމުގެ ޔަގީންކަން ނުލިބެއެވެ. އެހެނަސް ބާރު ވަޒަންކުރާއިރު އެއީ ވަރަށް މުހިއްމު ބައެކެވެ.
އަނެއްކޮޅުން އީރާނުގެ އިންސާނީ ވަސީލަތަށް ބަލާއިރު އެގައުމުގެ 82 މިލިއަން މީހުންގެ އާބާދީގެ 47 މިލިއަން މީހުންނަކީ ހަނގުރާމައަށް ނުކުންނަން ޖެހިއްޖެ ހާލަތެއްގައި އެކަން ކުރެވޭނެ މީހުންނެވެ. އިސްރާއީލުގެ 8.5 މިލިއަން މީހުންގެ އާބާދީގައި މިގޮތަށް ތިބީ 3 މިލިއަން މީހުންނެވެ.
އަސްކަރީ ޚަރަދުތަކަށް ބަލާއިރު 2017 ވަނަ އަހަރު އިސްރާއީލުން ވަނީ 16.5 ބިލިއަން ޔޫއެސް ޑޮލަރު ޚަރަދުކޮށްފައެވެ. އީރާނުން ޚަރަދުކުރީ 14 ބިލިއަން ޑޮލަރެވެ.
އިސްރާއީލުގައި އެންމެ ޒަމާނީ 'މިރްކާފާ' މަރުކާގެ 2760 ޓޭންކު އޮތް އިރު އީރާނުގައި އޮެތީ ޓެކްނޮލޮޖީގެ ގޮތުން ތަންކޮޅެއް ފެެންވަރު ދަށް 1650 ޓޭންކެވެ. އެހެންނަމަވެސް އީރާނުން ބުނީ އެގައުމުގެ 'ކަރާރު' މަރުކާގެ ޓޭންކް އެންމެ ޒަމާނީ ފެންވަރަށް ތަރައްގީކުރަމުން އަންނަ ކަމުގައެވެ.
ވައިގެ ބާރަށް ބަލާއިރު އިސްރާއީލުގައި 250 އަސްކަރީ މަތިންދާބޯޓު އެބައޮތެވެ. އޭގެ ތެރޭގައި އެފް-35 މަރުކާގެ ބޯޓުފަހަރުވެސް ހިމެނެއެވެ. އީރާނުގައި 160 އަސްކަރީ މަތިންދާބޯޓު އޮތް އިރު އޭގެ ތެރޭގައި އެފް-35 ފެންވަރުގެ އެއްވެސް ބޯޓެއް ނެތެވެ.
ވައިގެ ދިފާއަށް ބަލާއިރު، އިސްރާއީލުގައި މިހާރު ދުނިޔޭގެ އެންމެ ކުރިއަރާފައިވާ ވައިގެ ދިފާއީ ނިޒާމު ކަމުގައި ބެލެވޭ 'އަޔަން ޑޯމް' ގެ ނިޒާމުތައް އެބަހުއްޓެވެ. އެހެން ނަމަވެސް މި ސިސްޓަަމުން ބައެެއް ފަހަރު އިސްރާއީލު ލަދުގަންނަ ޒާތުގެ ކަންތައްވެސް ވެފައި އެބަހުއްޓެވެ. އެގޮތުން، ދާދިފަހުން ފަލަސްޠީނު ބަޔަކު ޖެހި ބަޑީގެ އަލިފާން އެއީ މަތިން އައި އަސްކަރީ ހަމަލާއެއް ކަމަށް ބަލައި މިސިސްޓަމުން ވަނީ އޮޓަމެޓިކުން ވައިގެ ތެރެއަށް މިސައިލުތަކެއް ފޮނުވާލާަފައެެވެ.
އީރާނުގައި ހުރީ 2016 ވަނަ އަހަރު ރަޝިޔާއިން އުފެންދި އެސް-300 ގެ ނިޒާމުތަކެވެ. މީގެ މިިސައިލްތަކަށް 160 ކިލޯމީޓަރަށް ދަތުރުކުރުމުގެ ގާބިލުކަން ލިބިގެން ވެއެވެ.
ނިއުކުލިޔާ ބާރަށް ބަލާއިރު، އިސްރާއީލުގައި 'އަރީހާ' މަރުކާގެ ބެލިސްޓިކް، މިސައިލާއި، ސަބްމެރީންގައި ބޭނުންކުރެވޭ މިސައިލާއި، އަސްކަރީ މަތިންދާބޯޓުތަކުގެ މިސައިލުތަކުގައި ބޭނުންކުރެވޭ ފެންވަރުގެ 75 އާ 400 އާ ދެމެދު އަދެދެއްގެ ނިއުކުލިޔާ ބޯ އެބަހުއްޓެވެ. އީރާނުގައި އަދި މިފަދަ ހަތިޔާރެއް ނެތެެވެ. އަދި ކައިރި މުސްތަގުބަލެއްގައި އީރާނަށް ނިއުކުލިޔާ ހަތިޔާރު އުފެއްދުމުގެ ގާބިލުކަން ލިބިދާނެކަމަށް ނުބެލެވެއެވެ.
ނިއުސްވީކުގެ އަޅާކިއުމުގައި އިސްރާއީލަށް ކުރި ލިބުނަސް ހަނދާންކޮށްލަން ޖެހޭ ކަމަކީ ހަނގުރާމަތައް ކާމިޔާބު ކުރެވިފައި ހުރީ އަސްކަރީ ބާރުގެ ވަރުގަދަ ކަމުން އެކަނި ނޫންކަމެވެ. ސިފައިންގެ އަޒުމާއި، ހިތްވަރާއި، އީމާންތެރިިކަމަކީ ހަނގުރާމައިން މޮޅުވުމުގެ އެންމެ ވަރުގަދަ ބަހާއެވެ.
