ރާއްޖޭގެ ޑިމޮކްރަސީ ހިންގާނެގޮތް އެނގޭނީ ދިވެހި ގައުމަށާއި ރައްޔިތުންނަށް ކަމަށް ތިމާވެއްޓާ ބެހޭ މިނިސްޓަރު ތާރިގު އިބްރާހީމް ވިދާޅުވެއްޖެއެވެ.
ޓީވީއެމްގެ "ފުރަތަމަ ގައުމު" ޕްރޮގްރާމުގައި ވާހަކަ ދައްކަވަމުން މިނިސްޓަރ ވިދާޅުވީ ބައެއް ފަރާތްތަކުން ރާއްޖޭގެ ޑިމޮކްރަސީ އިޔާދަ ކުރަން ބުނެ ބޭރުގެ ފަރާތްތަކުގެ އެހީއަށްވެސް އެދި ގޮވަމުން ގެންދަވާ ކަމަށެވެ. އެހެންނަމަވެސް ރާއްޖޭގެ ޑިމޮކްރަސީ ހިންގާނެގޮތް ބޭރުގެ ފަރާތްތަކަށް ނޭނގޭނެ ކަމަށް މިނިސްޓަރ ވިދާޅުވިއެވެ.
ރާއްޖޭގެ ހާލަތު ބަދަލުކޮށް ޑިމޮކްރަސީ އިޔާދަ ކުރަން ބޭރުގެ ފަރާތްތަކުގެ އެހީބޭނުންވާ ކަމަށް ވިދާޅުވެ ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު އިންޑިއާ ނޫހެއްގައި ވިދާޅުވުމުން އެކަމަށް ރައްދު ދެއްވައި މިނިސްޓަރ ތާރިގު ވިދާޅުވީ އެއީ ދައްކާނެ ވާހަކައެއް ނޭނގިގެން ދެއްކޭ ވާހަކަތައް ކަމަށެވެ. އެގޮތަށް ދައްކާ ވާހަކަ ތަކުގައި މާބޮޑު ބުރަދަނެއް ނުހުންނާނެ ކަމަށްވެސް ވިދާޅުވިއެވެ.
"އަޅުގަނޑުމެންގެ ޑިމޮކްރަސީ ހިންގާނެގޮތް ހަމަ އެނގޭނީ އަޅުގަނޑުމެންނަށް. ރާއްޖެއާއި ރާއްޖޭގެ ރައްޔިތުންނަށް. ބޭރުގެ ފަރާތްތަކަށް ރާއްޖޭގެ ޑިމޮކްރަސީ ހިންގާނެގޮތެއް ނޭނގޭނެ. އަޅުގަނޑުމެންގެ މައްސަލަތައް ހައްލުކުރާނީ އަޅުގަނޑުމެން، ރާއްޖޭގެ ރައްޔިތުން. ބޭރުގެ ފަރާތްތަކަށް އައިސް ރާއްޖޭގެ ކަންތައްތައް ކުރާނެ ގޮތެއް ނޭންގޭނެ،" ވަޒީރު ވިދާޅުވިއެވެ.
ރާއްޖެއާ ބެހޭގޮތުން ދެން ވާހަކަ ދައްކަވަން ދެންތިއްބެވީ ޤާސިމް އިބްރާހީމާއި ރައީސް ނަޝީދަކީ ކުށްވެރިފައިވާ ކުށްވެރިންކަމަށްވެސް ވިދާޅުވިއެވެ. އެހެންނަމަވެސް މިހާރު ފިލައިގެންގޮސް އެތިބީ ރާއްޖެއިން ބޭރަށްގޮސް ކަމަށް ވިދާޅުވިއެވެ. އެތަނުގައި ތިބެގެން ރައީސް ނަޝީދާއި، ގާސިމް އިދިކޮޅުގައި ދެންވެސް ތިއްބެވި ސިޔާސީ ލީޑަރުން ރައްޔިތުންނަށް ގެންދަވަނީ އޮޅުވާލަމުން ކަމަށް މިނިސްޓަރ ވިދާޅުވިއެވެ.
