( 20 ޖަނަވަރީ 2026 ގައި ޝާއިޢުކުރި ބަޔާގުޅޭ )
ސައިމް އެގެޔަށް ގޮއްސިއްޔާ އެގޭމީހުންނާ ސައިމްއާ ދެމެދު އޮންނަ ގާތްކަން އިތުރުވެދާނެތީ ، ޒުބާމެންގެޔަށް ދާން ފާއިޤާ ނިންމިއެވެ. ފާއިޤާ ދިޔައީ ޒުބާވެސް ގޮވައިގެންނެވެ. އެދިޔަގޮތަށްގޮސް ، އެންމެންގެ ތެރެޔަށް ޒުބާ ހޫރައިލިއެވެ. ފާއިޤާ އެއައީ ހިތްހަމަނުޖެހިގެންކަމެއް ސަމީނާމެންނަކަށް ނޭނގެއެވެ. ޒުބާގެ މޫނުމަތީގައިވާ ބިރުވެރިކަމާއި ހާސްކަންވެސް ، އެއްވެސް މީހަކަށް ނުފެނެއެވެ. ފާއިޤާ މެންނާ ގުޅުވައި އެކަހަލަ އެއްވެސް ނޭދެވޭ ކަމެއް މީގެ ކުރިޔަކުން ހިނގާފައެއް ނުވެއެވެ. އެއީ ގާތްކަން އޮތް އަވައްޓެރި ދެ ޢާއިލާއެވެ. ދެބައިމީހުންގެ ދެމެދުގައި ހިތްހަމަ ނުޖެހުން އުފެދެންވީ އެއްވެސް ސަބަބެއް ނެތެވެ. ކިހިނެއްވީތޯ ، ސަމީނާ ހިނިތުން ވެލައިގެން އިނދެ ، ފާއިޤާއާ ސުއާލު ކުރިއެވެ.
" ތިޔައިން އެކަކަށްވެސް ނުފެންނަ ކިތަންމެ ތަނެއް އަހަރެންނަށް އެބަ ފެނެއެވެ. މި ކުއްޖާ ، އަހަރެންގެ ދަރިފުޅާ ކައިވެނި ކުރުމުގެ ހުވަފެން އެބަ ދެކެއެވެ. ކަލޭމެންގެ މެދުގައި ހިނގާ ކަންތައްތަކުގެ ވާހަކަ މިމީހުންނަށް ކިޔައިދޭށެވެ ! " ޒުބާއަށް އިޝާރާތް ކުރަމުން ފާއިޤާ ބުންޏެވެ.
ޒުބާއާ ދިމާލަށް ފާއިޤާ އެބުނި ވާހަކަޔަކުން ، ސަމީނާ ހިތްހަމައެއް ނުޖެހުނެވެ. ފިރިހެން ދަރިޔަކަށްޓަކައި އެހާވަރަށް ފަޚުރުވެރިވާންޖެހޭތޯ ސަމީނާ ސުއާލު ކުރިއެވެ. ފާއިޤާ ކިޔާހާ އެއްޗެއް އެމީހުން ޤަބޫލު ކުރަންވީތޯވެސް ސަމީނާ ސުއާލު ކުރިއެވެ. ސައިމްގެ ނިޔަތުގައި އިތުބާރެއް ނެތިގެން ، ދިމާވާ ހުރިހާކަމެއްގައި ޒުބާ ކުށްވެރިކުރުމަކީ ، ސަމީނާއަށް ޤަބޫލު ކުރެވޭނެ ކަމެއްނޫނެވެ. އަދި ، އެކަމުގެ ހުރިހާ އިލްޒާމެއް އޭނާގެ ދަރިފުޅުގެ ބޮލުގައި އެޅުވުމަކީވެސް ، ސަމީނާ ޤަބޫލުކުރާނެ ކަމެއްނޫނެވެ.
" ސަމީނާގެ ދަރިފުޅު ޒުބާ ، އަތުންފައިން ގޯހެއް ނުހަދަނިސް ، ލޯ ހުޅުވައިލާ ، ވަށައިގެން ހިނގަމުންދާ ކަންކަމަށް ނަޒަރު ހިންގައިލާށެވެ ! ޒުބާ ކަހަލަ ތާކުންތާކު ނުޖެހޭ އަންހެންކުއްޖަކު ، އަހަރެންގެ ޅީދަރިޔަކަށް ވާކަށް އަހަރެންނެއް ނޭދެމެވެ. " ފާއިޤާ ބުންޏެވެ.
ފާއިޤާގެ ފިރިހެންދަރިފުޅު ، ގޭތެރޭގައި ރައްކާތެރިކަމާއެކީ ގެންގުޅުމަށް ސަމީނާވެސް ، ފާއިޤާއަށް ނަޞޭޙަތްތެރި ވިއެވެ. ޚައިރާތެއް ފަދައިން އަންނަ ، ފާއިޤާގެ ދަރިފުޅު ކަހަލަ ކުދިން ، އޭނާގެ ދަރިފުޅުގެ ޙަޔާތުން ދުރުކޮށްލާނެކަމަށްވެސް ސަމީނާ ބުންޏެވެ. ސަމީނާ އެ ފަޚުރުވެރިވާ ދަރިފުޅު ޚުދު ސަމީނާގެ ބޮލަށް ، އެއްދުވަހަކުން ސަވާރުވާނެކަމަށް ފާއިޤާ ބުންޏެވެ. އަދި ، އޭނާގެ ދަރިފުޅާ ދުރުގައި ހުރުމަށް ޒުބާއަށް އެންގުމަށްވެސް ފާއިޤާ ބުންޏެވެ. ޒުބާގެ ޙައްޤުގައި ސައިމް އަނިޔާ ކުރާނީ ، ކިތައް ފިރިހެންކުދިންނަށް ކަމެއްވެސް ނޭނގެއެވެ.
" ދެން ، އެންމެ ރަނގަޅުވާނީ ، ފާއިޤާ މިތަނުން ދިޔައްޔާއެވެ. ލައްކަ ޒުވާބު ކުރެވިއްޖެ ނޫން ހެއްޔެވެ ؟ " ސަމީނާ ބުންޏެވެ.
ޑުބާއީގައި ހުރެފައި ، ކަރާޗީއަށް އައިސް ދާނިޔަލްއަށް ގެޔަށް އާދެވުނީ ، އެ ޒުވާބު ގަނޑުގެ މެދަށެވެ. ގޭތެރޭގައި ، އަވަށްޓެރި ދެ ޢާއިލާގެ މެދުގައި އެދެކެވޭ ހޫނު ބަޙުސްގެ އަޑުއަހަން ، ގެއިން ބޭރުގައި ކުޑައިރުކޮޅަކު ، ދާނިއަލް މަޑުކޮށްލިއެވެ.
ފާއިޤާ އައިސް ގެޔަށް ވަތްތަނުން ، އޭނާޔާ ދިމާލަށް ސައިމް އެތިވަރު ގޮވައިގަތެވެ. މައްސަލައެއް އުފައްދަން ، އެގެޔަށް ފާއިޤާ ދާންވީ ސަބަބެއް ސައިމް އަކަށް ނުވިސްނުނެވެ. އެއީ ، ޒުބާ އާއި ސައިމްއާ ދެމީހުންގެ މައްސަލައެކެވެ. އެދެމީހުން އެކަން ޙައްލު ކުރާނެއެވެ. އެ ދޭތެރެޔަށް މަންމަ ވަންނަންވީ ކީއްކުރަން ހެއްޔެވެ ؟ މަންމަ އެކުރި ކަމެއްގެ ސަބަބުން އަވަށްޓެރި ދެ ޢާއިލާއެއްގެ މެދުގައި ހަމަނުޖެހުމެއް އުފެދުން ނޫންކަމެއް ނުވާނެއެވެ. އެ ދެ ޢާއިލާގެ މެދުގައި މިހާތަނަށް ، އެއްވެސް ކަހަލަ ހަމަނުޖެހުމެއް ހިނގާފައެއް ނުވެއެވެ. އުޅެނީވެސް ތިމާގެ ބައެއް ފަދައިން އެހާ ގާތް ކޮށެވެ.
ފާއިޤާއަށް އެގެޔަށްގޮސް އެމީހުންނާ ދިމާލަށް އެއްޗެތި ކިޔަންޖެހުނީ ، ސައިމްއަށް އޭނާދިން ނަޞޭޙަތް ޤަބޫލުނުކޮށް ، ޒުބާއާ ދުރަށް ދާން މަސައްކަތް ނުކުރީމައެވެ. ފާއިޤާގެ ބަސް އަހައިގެން ، ޒުބާއާ ދުރަށްދާން ސައިމް މަސައްކަތް ކުރިނަމަ ، ފާއިޤާއަކަށް އެގެޔަށްދާކަށް ނުޖެހުނީހެވެ.
މަންމަ އެކުރިކަމެއް ސައިމްއަކަށް ކަމަކު ނުދިޔައެވެ. ސައިމް ހަމައެކަނި ބުނީ ޒުބާދެކެ ލޯބިވާ ވާހަކައެވެ. ކޯޓަށްގޮސް ކައިވެނިކޮށްގެން އައިސް މަންމަމެން ޙައިރާންކުރުވާނެ ވާހަކައެއް ނޫނެވެ. މަންމަ އެކުރިކަމަކުން ، ޒުބާގެ މައިންބަފައިން ޒުބާއާ ދިމާލަށް އެއްޗެތިކިޔާނެއެވެ. އެއީ ، ސައިމްއަށް ކެތް ކުރެވޭނެކަމެއްނޫނެވެ.
މަންމަވެސް މަންމަ ބޭނުންކަމެއް ކޮށްލީއެވެ. ސައިމްއަށްވެސް އޭނާ ބޭނުންވާ ކަމެއް ކުރެވެން ޖެހޭނެއެވެ. ފާއިޤާ މަނާކޮށްކޮށް އޮއްވައި ، ޒުބާމެންގެޔަށް ދާން ސައިމް ނުކުތެވެ.
ޒުބާ އޭނާގެ ކޮޓަރިޔަށް ގޮސް އޮއްވައި ދާނިޔަލް ޒުބާއަށް ގޮވައި ތިރިޔަށް ބޭލުވިއެވެ. ދާނިޔަލް ގެޔަށް އައިތަނުން އެދިމާވި ކަންތަކުން ކަންބޮޑު ނުވުމަށް ސަމީނާ ބުނިނަމަވެސް ، ދާނިޔަލްއަށް އެއީ އެހާ އާދައިގެ ކަމެއްނޫނެވެ. ރެނދެއްލާނީ އަޑެއް ކިޔައިގެންނެވެ. ފާއިޤާ އައިސް އޭނާގެ މަންމަމެންނާ ދިމާލަށް އެގޮވި އެއްޗެހީގެ އަޑު ދާނިޔަލްއަށްވެސް އިވުނެވެ. ކަމެއް ނުވެ ، އެއްވެސް ކަމެއް ނުހިނގަނިސް ފާއިޤާ އެވަރު އަރުވައެއް ނުލާނެއެވެ. ޒުބާ އެގެޔަށް ދިޔައީ މަންމަ ދިން މޭވާ ތަށްޓެއް ހިފައިގެން ކަމަށް ޒުބާ ބުންޏެވެ. އެގެޔަށް ވަތްތަނުން ، ސައިމްއަށް ޒުބާ ފެނިގެން ވާހަކަ ދައްކަން ފެށީމަ ، ފާއިޤާ ދައްތަޔަށް ކަމު ނުދިޔައީއެވެ. އިތުރު އެއްވެސްކަމެއް ޒުބާއެއް ނުކުރެއެވެ. އެއީ އެގެޔަށް ޒުބާދިޔަ ފުރަތަމަ ފަހަރެއްނޫނެވެ.
ޒުބާއާއި ސައިމް ވާހަކަ ދައްކަން އިރުކޮޅަކު ތިބިތަނާ ފާއިޤާ ދައްތަގާތަށް ރުޅިއައީކަމަށް ޒުބާ ބުންޏެވެ. އަދި އޭނާއާ ދިމާލަށް އެއްޗެތިވެސް ކިއެވެ. މިހާރަކަށް އައިސް ، ފާއިޤާ ދައްތަ ހުންނަނީ ޒުބާދެކެ ރުޅިއައިސްކަމުގައިވެސް ޒުބާ ބުންޏެވެ.
ޒުބާ އެގެޔަށް ފޮނުވީމަ ، އެކަމާ ދާނިޔަލް ހިތްހަމައެއް ނުޖެހުނެވެ. އެއީ ބޮޑެތިވެފައިތިބި ދެމީހުންނެވެ. ކުޑަކުދިންނެއް ނޫނެވެ. އެ ޢުމުރުގައި މާގިނައިން ދިމާވާން ވެއްޖިއްޔާ ދެމީހުންނަށްވެސް ގޯސް ހެދޭނެއެވެ.
ކުރީރޭ ޒުބާގެ ކޮޓަރީގައި ދިމާވި އަލިފާނުގެ ޙާދިސާއެއްގައި ސައިމް އައިސް ޒުބާ ސަލާމަތްކޮށްދީގެން ކޮޓަރިން ނެރެދިން ވާހަކަ ދާނިޔަލް އަށް ސަމީނާ ކިޔައިދިނެވެ. ޒުބާއަތަށް މޭވާ ތަށްޓެއް ދީފައި އެގެޔަށް ޒުބާ ފޮނުވުނީ ، އެކަމަށް އެމީހުންނަށް ޝުކުރު އަދާކުރަންވެގެންކަމަށް ސަމީނާ ބުންޏެވެ. ސައިމްއަށް އިޙްތިރާމްކޮށް ، ގާތްކަން ބަހައްޓައި އަޅައިލާން ފެށީމަ ، ފާއިޤާއަށް ކަމު ނުދިޔައީއެވެ. ގޯސްގޮތަކަށް އެކަން ފާއިޤާ ނެގީއެވެ. ޒުބާގެ ބޮލުގައި ފާއިޤާ އެއެޅުވީ ވަރަށްބޮޑު ބަދުނާމެކެވެ. ޒުބާއަކީ އެކަހަލަ ކުއްޖެއްނޫނެވެ.
" ވެދިޔަކަމެއް ވެ ނިމުނީއެވެ. މީގެ ފަހުން މިގޭގެ އެއްވެސް މީހަކު އެގެޔަށް ގޮސްގެން ނުވާނެއެވެ. " ދާނިޔަލް އެންމެންނަށް އަމުރު ކުރިއެވެ.
ސައިމްއާ ބައްދަލުކޮށް ، ވާހަކަދައްކައިގެން ނުވާނެކަމަށް ޒުބާއަށްވެސް ދާނިޔަލް އެންގިއެވެ. އެވަގުތު ، ސައިމްއަށް އައިސް އެތަނަށް ވަދެވުނެވެ.
މަންމަ އެކުރިކަމަކުން ނުފުދިގެން ، ސައިމް އެތަނަށް އެއައީ ކީއްކުރަންތޯ ސަމީނާ ސުއާލު ކުރިއެވެ. ސައިމް އެއައީ ، އޭނާގެ މަންމަ އެކުރި ކަންކަމަށް އެމީހުންގެ ކިބައިން މަޢާފަށް އެދޭށެވެ.
ހަމަ އެވަގުތު އެގެއިން ނުކުންނަން ސައިމްއަށް ދާނިޔަލް އެންގިއެވެ. އަދި ، އޭގެފަހުން ، އެގެޔަށް އެއްގޮތަކަށްވެސް ސައިމް އައިސްގެން ނުވާނެކަމަށްވެސް އެންގިއެވެ.
ސައިމްއަށް ލިބުނު ޙައިރާންކަމުގައި ދާނިޔަލް އަށް ގޮވައިލަމުން ދާނިޔަލްއާ ގާތަށް ޖެހިލިއެވެ.
" ދާނިޔަލް ބޭބޭއެވެ ! އަހަރެން ކުޑަކުޑަ އިރުއްސުރެ މިގެޔަށް އައިސް މިއުޅުނީ ބޭބެމެންގެ ކުރިމަތީގައެވެ. މިއަދު މިގެޔަށް ވަނުން ތި މަނާކުރަނީ ކީއްވެ ހެއްޔެވެ ؟ " ސައިމް ބުންޏެވެ.
ކުޑައިރުގެ ދުވަސްތައް ހިނގައްޖެއެވެ. މިހާރު ސައިމް އެހުރީ ބޮޑުވެފައެވެ. އެހެންވީމާ ، ދެން މީގެފަހުން އެގެޔަށް ސައިމް ނުވަނުމަށް ، ސައިމްގެ ކޮނޑުގައި ހިފައިލަމުން ދާނިޔަލް އެންގިއެވެ. އަދި ، އޭގެފަހުން ޒުބާއާ ވާހަކަދައްކަން ސައިމް ހުއްޓާ އޭނާއަށް ފެނިއްޖެނަމަ ، ސައިމްއަށް އޭނާ ހަދާނީ ކިހިނެއްކަން ޚުދު އޭނާއަށްވެސް ނޭނގޭކަމަށް ދާނިޔަލް ބުންޏެވެ.
ސައިމް ވާހަކަ ދައްކަން ފެށީމަ ، ޒުބާވެސް ބިރުގެންފައި ހުރެ ، ސައިމް އެގެއިން ނުކުމެގެން ދިއުމަށް އެދުނެވެ.
އެއްވެސް މީހަކަށް އަންގައިނުލާ ދާނިޔަލް އައީ އެންމެން ޙައިރާންކޮށްލުވަން ވެގެންނެވެ. އެކަމަކު ، ގެޔަށް ވަތްތަނުން ، އޭނާގެ ކޮއްކޮއާ ބެހޭގޮތުން އެދެކެވުނު ވާހަކަތަކުން ، ޙައިރާންވާން ޖެހުނީ ދާނިޔަލްއެވެ.
ސައިމް ގެޔަށްދިޔައިރު ބައްޕަވެސް ގެޔަށް އަތުވެއްޖެއެވެ. މަންމަގޮސް އެކުރީކީ ރަނގަޅުކަމެއް ނޫންކަމަށް ސައިމް ބުނަމުން ގެންދިޔައެވެ. އަމްދުން ، ދާނިޔަލްގެ ކުރިމަތީ ޒުބާ ފަޟީޙަތްކޮށްލިއިރު ، އެކަމުގައި ސައިމްއަކީވެސް އެއްވަރަކަށް ޙިއްސާވާ މީހެއްކަން ސައިމް އޭނާގެ މަންމަޔަށް ހަނދާން ކޮށްދިނެވެ. އެކަމެއް ކޮށްގެން އެއުޅެނީ ޒުބާ އެކަންޏެއްނޫނެވެ. ސައިމްއާ ޒުބާއާ ދެމީހުން ވެގެންނެވެ.
ފާއިޤާ އައިސް ޒުބާއާ ދިމާލަށް އެއްޗެތި ކީމަ އެކަމާ އެންމެ ބޮޑަށް ކަންބޮޑުވީ ރޮޝްނާއެވެ. ޒުބާގެ ކަންތައް އެންމެ ބޮޑަށް އެނގޭނީ ރޮޝްނާއަށެވެ. ޒުބާގާތު އެކަން ކުރިޔަށް ނުގެންދަން ބުނީމަވެސް އެކަމެއް ޒުބާއެއް ނުކުރިއެވެ. އެއްކަމަކަށްފަހު އަނެއްކަމެއް ލައިގަންނައިރު ، އެންމެންވެސް ޝައްކު ކުރަނީ ޒުބާއަށެވެ. ޒުބާ އެކަހަލަ ކަމެއް ނުކުރާނެކަމަށް ޤަބޫލުކުރާ އިރުވެސް ، ޒުބާއަށް ކުރާ އިތުބާރަށް އެކަމުން އަސަރު ކުރާނެކަމަށް ރޮޝްނާ ޒުބާއަށް ވިސްނައިދެމުން ގެންދިޔައެވެ. ސައިމްއާއެކު ވާރޭގައި ތެމިގެން އެޖެހީ ކޮން ސަކަރާތެއްތޯ ރޮޝްނާ ، ޒުބާއާ ސުއާލު ކުރިއެވެ. އެމީހުން ވާރެއާ ތެމިލައި ، ކުޑައިރު ކުޅޭހެން ވާރެތެރޭ މަޖާކޮށްލީކަމަށް ޒުބާ ބުންޏެވެ. އެހެނަސް ، ކުޑައިރު ކުޅޭގޮތަށް މިހާރު ކުޅޭ ކުޅުންތައް ވިހަވާނެކަމަށް ޒުބާއަށް ރޮޝްނާ ވިސްނައިދިނެވެ. ފާއިޤާ ދައްތައަށް ކަމުދާގޮތަށް ، ޒުބާއަށް މިހާރު ފިޔަވަޅެއްވެސް ނޭޅެއެވެ. ޒުބާ ފެންނައިރަށް ހުންނަނީ ، ދެބުމަ ގޮށްޖަހައި ރުޅިމޫނު ދައްކައިގެންނެވެ. ޒުބާއަށް ކުރެވެނީ ކީއްކަމެއް ނޭނގެއެވެ. ޒުބާގެ ޖަޒުބާތުތައް ކޮންޓްރޯލް ކުރުމަށް ރޮޝްނާ ، ޒުބާއަށް ނަޞޭޙަތް ދިނެވެ.
" ދުނިޔެ ، އެހާބޮޑަށް ލޯތްބަށް ނަފުރަތު ކުރަނީ ކީއްވެ ހެއްޔެވެ ؟ " ރޮޝްނާއާ ޒުބާ ސުއާލު ކުރިއެވެ.
ދުނިޔެ ، ލޯތްބަށް ނަފުރަތު ނުކުރާކަމަށް ރޮޝްނާ ބުންޏެވެ. ލޯތްބަށް ނަފުރަތު ކުރަނީ އިންސާނުންނެވެ. ދުނިޔެއަކީ ލޯތްބަށް މަގުދައްކާ ވަޞީލަތެކެވެ. އެ ވަޞީލަތުގެ ބޭނުން ނަހަމަ ގޮތުގައި ހިފަނީ ، ދުނިޔެ ހަލާކު ކުރަމުންގެންދާ އިންސާނުންނެވެ.
އޭނާއަށް ކުރެވުނީ ކޮން ކުށެއްތޯ ، ޒުބާ އޭނާގެ ދައްތަ ރޮޝްނާއާ ސުއާލު ކުރިއެވެ. އެވަގުތު ސަމީނާއަށްވެސް އެތަނަށް އާދެވުނެވެ. އަދި އޭނާވެސް އެ ވިސްނަނީ ، ޒުބާއަށް ކުރެވުނު ކުށަކާމެދުގައިކަމަށް ސަމީނާ ބުންޏެވެ. ރޮޝްނާ އެހުރީ ބޮޑުވެ ، ފިރިފުރާވަރަށް އަޅާފައެވެ. ރޮޝްނާގެ ފަރާތުން ، މިހާތަނަށް އެއްވެސް މައްސަލައެއް ދިމަލެއް ނުވެއެވެ. ޒުބާ ބޮޑުވިފަހުން ، ފިރިފުރާވަރަށް އެޅިތަނުން ، ކިޔެވުންވެސް ނުނިމިގެން އުޅެނިކޮށް ، މިހާރުވެސް ، އެދަނީ މައްސަލަތައް ކުރިމަތި ވަމުންނެވެ. މައްސަލަޔަކަށްފަހު މައްސަލަ އެކެވެ.
ޒުބާއަށް އިތުބާރު ނުކުރަނީތޯ އޭނާގެ މަންމަޔާ ސުއާލު ކުރިއެވެ. ޒުބާގެ މައްސަލައެއް އޮތްކަމަކަށް ސަމީނާއަކަށްވެސް އަދި ނުފެނެއެވެ. އެކަމަކު ، ޒުވާން އަންހެން ކުއްޖަކާ ފިރިހެން ކުއްޖަކު އެކީއުޅޭތަން ފެނުނީމަ ، ކުރެހުންތެރިން ކުރަހާނީ ކޮންކަހަލަ މަންޒަރެއްކަން އެނގޭވަރަށް ޒުބާ އެހުރީ ބޮޑުވެފައެވެ. ސައިމްގެ ފަރާތުން ފާއިޤާ އައިސް ސަތޭކަފަހަރަށް ، ޒުބާގެ ކައިވެންޏަށް އެދުނަސް ، ސަމީނާ އެކަމަށް އެއްބަހެއް ނުވާނެއެވެ. ޒުބާއިނީ ތަރުކާރީ ކޮށާށެވެ. އެވަގުތު ، ލިބުނު ކުއްލި ސިހުމުގައި ޒުބާގެ އިނގިލި ކަނޑައިގެން ދިޔައެވެ. އެތަން ފެނުމާއެކީ ، އެކަހަލަ ވާހަކައެއް ސައިމް ، ޒުބާއާ ދައްކާފައި އޮތްތޯ ސަމީނާ ސުއާލު ކުރިއެވެ.
މަންމަގެ އެ ސުއާލަށް ނޫނެކޭބުނެ ޒުބާ ޖަވާބު ދިނެވެ. ޒުބާގެ އެޖަވާބުން ސަމީނާގެ ހިތަށް ހަމަޖެހުން ލިބުނެވެ. އެހެނަސް ، އެވާހަކަތައް އަޑުއަހަންހުރި ، ރޮޝްނާއަށް ޒުބާގެ ޖަވާބު ކަމަކު ނުދިޔައެވެ. އެކަމަކު ، މަންމަ އެތަނުން ދަންދެން އެއްޗެކޭ ނުބުނެ ހުއްޓެވެ. މަންމަޔަށްވެސް މިހާރު ޝައްކުކުރެވޭ ހިސާބަށް ކަންތައް ދިޔައީކަން ރޮޝްނާ ، ޒުބާއަށް ހަނދާން ކޮށްދިނެވެ. ޒުބާއަށް މިހާރު ދެވިފައިއޮތް ހިސާބުން ، އެ ސައިމްގެ ކަންތައް ހުއްޓައިލުމަށް ، އަނެއްކާވެސް ރޮޝްނާ ބާރުއަޅަން ފެށިއެވެ. ޒުބާގެ އިނގިލީގައި ބޭސް އަޅައިދިނުމަށްފަހު ، ވަރަށް ނަޞޭޙަތްދީފައި ، ޒުބާގެ ކޮޓަރިޔަށް ފޮނުވައިލިއެވެ.
ކޮޓަރިޔަށްގޮސް ، ސައިމްއާ ގުޅައި ، ޒުބާއަށް ސައިމްއާއެކީ ކުރިޔަށް ގެންދެވެން ނެތްކަމަށް ޒުބާ ބުންޏެވެ. ސައިމްގެ މަންމަވެސް ޒުބާއަކާ ޤަބޫލެއްނޫނެވެ. އޭނާ ދެކެ އިންތިހާއަށް ރުޅިއާދެއެވެ. ޒުބާ ފެނުނަސް ހުންނަނީ މޫނުން ފޫގަޅާފައެވެ. އެއީ ސައިމް ބަލަން ބޭނުންވާ ކަމެއްނޫނެވެ. ޒުބާދެކެ ސައިމް ލޯބިވެއެވެ. އެވަރުން ، ސައިމްއަށް ފުދެއެވެ. އެހެންމީހަކު ޒުބާދެކެ ލޯބިވޭތޯ ރުޅިއާދޭތޯ ބަލާކަށް ސައިމް ބޭނުމެއް ނޫނެވެ. ސައިމްއާއި ޒުބާއާ ދެމެދު ، ލައްކަ ވާހަކަ ދެއްކުމަށްފަހު ، ކޮންމެ ގޮތެއްވިޔަސް އެދެމީހުން އަބަދުވެސް އެކުގައި ތިބުމަށް ނިންމައި ފޯނު ބޭއްވިއެވެ. ( ނުނިމޭ )
