ދިރާގު ގޭމާސް ގިލްޑް (ޑީޖީޖީ) އާއި ޑީޖީޖީގެ ޕަރޓްނަރ މެގަޗިޕްއާ ގުޅިގެން ދޭ އޭލިއަންވެއަރ ގޭމިންގ ބަންޑްލްގެ ނަސީބުވެރިޔާ ހޮވައިފިއެވެ.
މި ގިވްއަވޭގައި ބައިވެރިވި ފަރާތްތަކުގެ ތެރެއިން ގުރުއަތުން ހޮވިގެން މި އަގުހުރި އިނާމު ހާސިލުކޮށްފައިވާ ނަސީބުވެރި ފަރާތަކީ ހަސަން އާލިފް އަބްދުލްޣަނީއެވެ.
ގޭމް ކުޅުންތެރިންނަށް ހާއްސަ މި އަގުހުރި އޭލިއަންވެއަރ ބަންޑްލްގެ ތެރޭގައި އޭލިއަންވެއަރ 34 އިންޗީގެ ގޭމިންގ މޮނިޓަރއެއް، އޭޑަބްލިއު ވަޔަރޑް ގޭމިންގ ހެޑްސެޓެއް، އަދި އޭޑަބްލިއު 420ކޭ ޓެންކީލެސް ގޭމިންގެ ކީބޯޑެއްގެ އިތުރުން އޭޑަބްލިއު ވަޔަރލެސް ގޭމިންގ މައުސްއެއް ވަނީ ހިމަނައިފައެވެ.
ޑީ.ޖީ.ޖީ އިން ދަނީ ރާއްޖޭގެ ގޭމިންގ ކޮމިއުނިޓީއަށް ހާއްސަ އިނާމުތަކާއި އިތުރު ފުރުސަތުތައް ހޯދައިދިނުމަށް ގިނަ މަސައްކަތްތަކެއް ކުރަމުންނެވެ. އަދި، ޑީޖީޖީއިން ދަނީ ވާދަވެރި މުބާރާތްތައް އަގުހުރި އިނާމުތަކާއެކު ބާއްވައި ރާއްޖޭގެ ގޭމް ކުޅުންތެރިންގެ ހުނަރުތައް އިތުރުކުރުމަށް އެހީތެރިވެދީ، ހުނަރުތައް ދައްކާލުމަށް އިތުރު ޕްލެޓްފޯމްތައް ހޯދައިދެމުންނެވެ.