ގެއްލުނު ލޯބި (2)

( 30 ޑިސެންބަރު 2025 ގައި ޝާއިޢުކުރި ބަޔާގުޅޭ )

ސައިމް ޖަލަށް ލެވުނީ އިންސާފުން ނޫންކަމަށް އޭނާގެ ރަޙުމަތްތެރިންވެސް އިއްތިފާޤު ވެއެވެ. އަންހެންކުއްޖެއްގެ ފޮޓޯނަގައި ބްލެކްމެއިލް ކުރުމަކީ އެހާ އާދައިގެ ކަމެއްނޫނެވެ. އެއްކްލާހެއްގައި ، އެކުދިންގެ ގްރޫޕްތެރޭގައި އުޅޭ އެހެން އަންހެންކުދިންނަށްވެސް އެއީ ނުރައްކަލެކެވެ. އެކުދިންގެ ފޮޓޯ ނަގައިގެން ، އޭއައި ބޭނުންކޮށްގެން މަންޒަރާއި ތަސައްވުރު ބަދަލުކޮށް ، ބްލެކްމެއިލްކުރަންވެސް ، ޝަހީރު އުޅެފާނެއެވެ. ސައިމް އެހެދީ ރަނގަޅަށްކަމަށް ހުރިހާކުދިން އެއްބަސް ވެއެވެ.

ޝަހީރުގެބައްޕަޔަކީ ފުލުހުންގެ އޮފިސަރެކެވެ. އެހެންކަމުން ، ޢާންމުކޮށް އެހެންމީހުންނަށް ނުކުރާ ވަރަށް ސައިމްއަށް އަނިޔާ ކުރާނެއެވެ. ސައިމް ގެންގޮސް ޖަލަށްލެވުނީވެސް ، ފުރިހަމަކުރަންޖެހޭ ހުރިހާ އިޖްރާޢަތުތަކެއް ފުރިހަމަނުކޮށެވެ. އެއީ ،  ޝަހީރުގެ ބައްޕަގެ ނުފޫޒުންނެވެ. އެއްވެސް ޙާލެއްގައި ، ސައިމް ޖަލުން ދޫކޮށްނުލާނެކަމަށް ޝަހީރުގެ ބައްޕަ އޮތީ ބުނެފައެވެ. ޝަހީރުގެ ބައްޕަ ނޫނީ ޝަހީރު މަޢާފު ނުކުރަނިސް ، ސައިމް ޖަލުން ދޫކޮށެއް ނުލާނެއެވެ.

ހުރިހާ ކުދިންވެގެން ގޮސް ، ފުލުހުންނަށް މައްސަލައިގެ އަސްލު ކިޔައިދޭން ، އޭގެތެރޭގައިތިބި އަންހެންކުދިން ލަފާދިނެވެ. އެކަމުގައި ސައިމްއާއި ޝަހީރާ ދެމީހުންގެ ކުށްވެސް އެބައޮތްކަން ، ފުލުހުންނަށް އެނގެން ޖެހެއެވެ. އެހެން ނޫނީ އިންސާފުވެރި ނިންމުމެއް ނުނިންމޭނެއެވެ. އެކަމަކު ، އެކަމަށް އެޅޭ ހުރަހެއް އެބައޮތެވެ. އެ މައްސަލަ ގުޅެނީ ޒުބާއާއެވެ. ޒުބާގެ ނަން އެމައްސަލައިގެ ތެރެޔަށް ވަނުމަކީ ސައިމް އެދޭކަމެއްނޫނެވެ. ޒުބާގެ ނަން ނުގެނެސް ، މައްސަލައިގެ ޙަޤީޤަތެއް ނޭނގޭނެއެވެ. އެހެނަސް ، ޝަހީރުގެ ހިތުގައި ސައިމްގެ މައްޗަށް އޮތް ޙަސަދަވެރިކަން ފިލުވައިލުމަށްޓަކައި ، ޒުބާގެ ނަން ބޭނުން ނުކޮށެއް ޝަހީރެއް ނުހުންނާނެއެވެ. އެއީ ހުރިހާ ކުދިންނަށްވެސް އެއްބަސް ވެވޭ ކަމެކެވެ.

ލައްކަ ގިނަ ވާހަކަ ދެއްކުމަށްފަހު ، ހުރިހާކުދިން އެއްބަސްވެ ، އެ މައްސަލައިގެ ޙަޤީޤަތް ، ޝަހީރުގެ ބައްޕަޔަށް ސާފުކޮށްދިނުމަށް ނިންމިއެވެ. އަދި އެ މަސައްކަތް ކާމިޔާބުވެސް ކުރިއެވެ. ޝަހީރު އެކުރިކަމެއް އޭނާގެ ބައްޕަޔަށް އެނގި ސާފުވުމާއެކީ ، ސައިމް ދޫކޮށްލިއެވެ.

ސައިމް ގެޔަށް އައުމާއެކީ ، އޭނާގެ މަންމަ ފާއިޤާ އާއި ބައްޕަ އިބްރާހީމްގެ އެތައް ސުއާލަކަށް ޖަވާބުދޭން ސައިމްއަށް ޖެހުނެވެ. އެންމެން އެއްވެފައި އޮތްތަނެއްގައި ، ޝަހީރުގައިގައި ތަޅައިގަންނަންޖެހުނީ ، ކޮން އަންހެންކުއްޖެއްގެ ޙައްޤުގައިތޯ ، ސައިމްގެ ބައްޕަ އިބްރާހީމް ، ސައިމްއާ ސުއާލު ކުރަމުން ގެންދިޔައެވެ. އެ ސުއާލު އިބްރާހީމް ތަކުރާރުކުރަން ފެށީމަ ، ސައިމްއާ އެވަގުތު އެއްވެސް ސުއާލެއްނުކުރުމަށް ބުނެ ، ސައިމްގެ މަންމަ ފާއިޤާ ، އިބްރާހީމް މައިތިރި ކުރުމަށް މަސައްކަތް ކުރިއެވެ.

ސައިމް ޖަވާބެއް ނުދިނީމަ ، އެންމެ ފަހުން އިބްރާހީމް އެކަން ސާފުކޮށްދިނެވެ. ޝަހީރު ގައިގައި ސައިމް ތަޅައިގަތީ ، ޒުބާއާ ހެދިއެވެ. ޒުބާއާގުޅޭ އެއްވެސްކަމެއް އެ މައްސަލައިގައި ނެތްކަމަށް ސައިމް ބުނިނަމަވެސް ، އެވާހަކަ އިބްރާހީމް ޤަބޫލެއް ނުކުރިއެވެ. އޭނާ އެއައީ ، ސައިމްގެ ރައްޓެހި އެހެން ކުދިންނާވެސް އެކަމާބެހޭގޮތުން ވާހަކަ ދައްކައި މަޢުލޫމާތު ހޯދައިގެންނެވެ. އެންމެފަހުން ، ޒުބާއާ ބައްދަލުކުރުމާއި ވާހަކަ ދެއްކުންވެސް ސައިމްއަށް މަނާކުރިއެވެ. އެގެޔަށް ސައިމް ދިއުންވެސް މަނާ ކުރިއެވެ.

ސައިމް ޖަލުން ދޫކޮށްލިކަން އެނގުމާއެކީ ، އެގެޔަށް ނުގޮސް ޒުބާއަކަށް ކެތެއް ނުވިއެވެ. ދުވެފައިގޮސް އެގެޔަށް ވަތްއިރު ޒުބާހުރީ ، އަނގައިން ނުބުނެވޭވަރަށް ވަރުބަލިވެ ގުނބުލިހިފައެވެ. ގެޔަށް ވަތްއިރު ، ސައިމްއާއި ސައިމްގެ މަންމައާއި ބައްޕަ ސިޓިންރޫމުގައި ވާހަކަ ދައްކަން ތިއްބެވެ. އިބްރާހީމް ދިޔައީ ސައިމްއާ ދިމާލަށް އެއްޗެތި ކިޔަމުންނެވެ. ޒުބާމެންގެޔަށް ދިއުން މަނާކޮށް ، އެގެޔަށް ގޮސްގެން ނުވާނެކަމަށް ބުނަމުންނެވެ. އިބްރާހީމް ދެއްކި ހުރިހާ ވާހަކައެއް ޒުބާއަކަށް ނީވެއެވެ. އެހެނަސް ، ޒުބާ އެގެޔަށް ވަނުމާއެކީ ، ޒުބާއަށްވެސް އިބްރާހީމްގެ ސުއާލުތަކާ ކުރިމަތިލާން ޖެހުނެވެ. ޒުބާއަށް ކުރެވުނުވަރު އަދި މަދީ ތޯއާއި ، އެގެޔަށް އެއައީ ކީއްކުރަންތޯ ، އިބްރާހީމް ސުއާލު ކުރިއެވެ.

ޒުބާއަކަށް ، އިބްރާހީމަށް ދޭނެ ޖަވާބެއް ނޭނގުނެވެ. އޭނާހުރީވެސް ވާހަކަ ނުދެއްކޭ ވަރަށް ގުނބުހިލިފައެވެ. ސައިމްގެ ބައްޕަހުރީ ޒުބާދެކެ ރުޅި އައިސްކަން އެނގުމާއެކީ ، އެތަނުގައި މަޑުނުކުރަން ޒުބާ ނިންމިއެވެ. އޭގެ ކުރިން ، އެގެއިން ނުކުމެގެން ދިއުމަށް އިބްރާހީމް ، ޒުބާއަށް އެންގިއެވެ. ޒުބާގެ ފަހަތުން ސައިމްވެސް އެގެއިން ނުކުތެވެ. އިބްރާހީމަށް އެނގޭ މިންވަރަށްވެސް ، ފާއިޤާއަކަށް  ، ވެގެން އުޅޭގޮތެއް ނޭނގެއެވެ. ވެގެން އުޅޭގޮތެއް ސާފުކޮށް ބުނުމަށް ، އެތައް ފަހަރަކު އިބްރާހީމްގާތު ފާއިޤާ ބުނެފިއެވެ. އެއަކަށް ، އިބްރާހީމްގެ ފަރާތުން ސީދާ ޖަވާބެއް ނުލިބެއެވެ. އިބްރާހީމް ބޭނުންވީ އެ މަޢުލޫމާތު ސައިމްގެ ދުލުން ހާމަ ކުރުމަށެވެ. އެކަމަކަށް ސައިމް ތައްޔާރެއް ނޫނެވެ.

ޒުބާ ހުއްޓުވޭތޯ ސައިމް މަސައްކަތް ކުރަމުން ގެންދިޔައެވެ. ޒުބާ މަޑުކުރަންވީ ކީއްކުރަން ހެއްޔެވެ ؟ އެގެއިން ނުކުމެގެން ދާން ގޭގެ ވެރިން އޮތީ ޒުބާއަށް އަންގާފައެވެ. އެހެނަސް ، ސައިމް އެގޭގައި ހުރިހާ ހިނދަކު ، އެގެއިން ޒުބާ ނެރެނުލެވޭނެކަމަށް ސައިމް ބުނަމުން ގެންދިޔައެވެ. ޒުބާ ހަމަޖައްސައިލުމަށްފަހު ، އިރުއޮއްސުނީމަ އެދެމީހުން ބައްދަލުކުރާނެކަމަށް ވަޢުދުވެ ، ޒުބާ ފޮނުވައިލިއެވެ. ޒުބާ ފޮނުވައިލުމުގެ ކުރިން ޒުބާދެކެ ސައިމް ލޯބިވާ ވާހަކަ ބުނެލަން ސައިމްގެ ހިތަށް އެރިއެވެ. އެކަމަކު އެ ހިތްވަރެއް ސައިމްއަކަށް ނުލިބުނެވެ. ޒުބާވެސް ހިތަށް ލިބުނު ހަމަޖެހުމުގައި ހިނިތުންވެލައިގެންހުރެ  މަޑުމަޑުން ، އޭނާގެ ގެޔާދިމާލަށް ހިނގައިގަތެވެ. ޒުބާގޮސް ގެއްލެންދެން ސައިމް ބަލަހައްޓައިގެން ހުއްޓެވެ. އެއްފަހަރުވެސް ފަސްއެނބުރި ޒުބާ ބަލައެއް ނުލައެވެ. އެކަމަކުވެސް ، ސައިމްގެ ހިތަށްވެސް ހަމަޖެހުން ލިބުނެވެ. އެރޭ އެދެމީހުން ބައްދަލުކޮށް ހުރިހާ ވާހަކައެއް ކިޔައިދީ ، ވަރަށް ގިނައިރު އެކުގައި ހޭދަކުރާނެކަމަށް ސައިމް ނިޔަތް ގަތެވެ.

ގެޔަށްގޮސް މަތީބުރިޔަށް ސައިމް އެރިއިރު ، މަންމައާއި ބައްޕައާ ދެމީހުން ޒުބާއާބެހޭގޮތުން ވާހަކަ ދައްކަމުން ގެންދިޔައެވެ. އެއީ ސައިމްއާ އެކަށީގެންވާ ބައެއްނޫންކަމަށާއި އެދެ ޢާއިލާގެ ތަފާތާ ބެހޭގޮތުން އިބްރާހީމަށް ފެންނަ ތަފާތު ، އޭނާގެ އަންހެނުންނަށް ކިޔައިދެމުން ގެންދިޔައެވެ. އެންމެފަހުން ، އެވާހަކަ ޒުބާގެ މަންމަޔާއި ބައްޕަގާތު ބުނެގެން އެކަން ހުއްޓުވުމަށް އެދެމަފިރިން ނިންމިއެވެ.

" އެއްވެސް ވާހަކައެއް އެއްވެސް މީހެއްގާތު ބުނާނެކަމެއް ނެތެވެ. " ސައިމް އައިސް ވަންނަމުން ބުންޏެވެ.

އެވާހަކަ އެމީހުންގާތު ނުބުނާންވީ އެއްވެސް ސަބަބެއް ފާއިޤާއަކަށް ނުވިސްނުނެވެ. ޒުބާއާހުރެ ، ސައިމް ޖަލަށް ލެވުނު ވާހަކައާއި ، އިތުރު ކުއްޖަކު ހޮސްޕިޓަލުގައި އޮތްވާހަކަ ، ޒުބާގެ މައިންބަފައިންނަށްވެސް އެނގެން ޖެހޭނެކަމަށް އިބްރާހީމަށް ފެނުނެވެ. އަދި އެކަމަށް އޭނާގެ އަންހެނުންވެސް އެއްބަސް ވެއެވެ.

ފާއިޤާމެން ، ޒުބާގެ މައިންބަފައިންގާތު އެވާހަކަ ބުނެފިއްޔާ ، ފާއިޤާމެން ދެރަވާނެކަމެއް އޭނާ ކުރާނެކަމަށް ސައިމް ބުންޏެވެ. އޭނާ މިހާރު އެހުރީ އެއްފަހަރު ޖަލަށް ލެވިފައެވެ. އެ ބިރުވެސް ކެނޑިފައެވެ. އެހެންވީމާ ، އޭނާ އެކުރާ ކަމަކުން އަލުން ޖަލަށް ދާންޖެހުމަކީ ، ސައިމްއަށް އެއްވެސް މައްސަލައެއްނޫނެވެ. އެކަމަކާ ޖެހިލުމެއް ނުވެއެވެ.

ޒުބާ އެހުރީ ސައިމްގެ ސިކުނޑިޔާ ރަނގަޅަށް ކުލެލާފައެވެ. ސައިމްގެ ދުވަސް އެހުރީ ގޮއްސައިކަމުގައި އިބްރާހީމްގެ ދެމަފިރިން ނިންމިއެވެ. އެވާހަކަ އެހިސާބުން އޮއްބައިލުން ނޫންގޮތެއް އެމީހުންނަކަށް ނެތެވެ.

" އަހަރެމެންގެ ލޯބީގެ ވާހަކަ އަދި ކިރިޔާ މި ފެށުނީއެވެ. ސައިމްގެ ބައްޕަމެން އެވަނީ އަހަރެން އެގެޔަށްވަނުން މަނާކޮށްފައެވެ. އަހަރެމެންގެ ލޯބީގެ މިވާހަކަ ފެށިގެން ކުރިޔަށްދާނީ ކޮންފަދަ އަނިޔާވެރި ކެކުޅުންތަކެއްގައިކަމެއްވެސް ނޭނގެއެވެ. " ޒުބާ އޭނާގެ އަމިއްލަ ނަފްސަށް ވިސްނައިދިނެވެ.

ހަވީރުއްސުރެ ފަށައިގެން އިރުއޮއްސުނު އޮއްސުނުހެން ޒުބާގެ މޫނުމަތިން ފެންނަމުންދިޔަ ހާސްކަން ރޮޝްނާއަށް ފާހަގަ ކުރެވުނެވެ. އެކަމާބެހޭގޮތުން އިތުރަށް ސުއާލެއްކުރާކަށް ރޮޝްނާ ބޭނުމެއްނޫނެވެ. އެހެނަސް ، އެދުވަހުގެ ހަވީރު ، މަންމަޔާއެކީ ސައިމްމެން ގެޔަށް ޖައްސައިލަން ނިންމާފައި އޮތްކަން ، ޒުބާއަށް އަންގައިލިއެވެ. ރޮޝްނާއާއި މަންމަޔާ ، ސައިމަންމެންގެ ގެޔަށް ދިއުމަކީ ޒުބާ އެދޭކަމެއްނޫނެވެ. އެދުވަހު ހެނދުނު އެގެޔަށް އޭނާއަށް ދެވުނީމަ އޭނާވަނީ އެގެއިން ބޭރުކޮށްލާފައެވެ. އެހިތްހަމަ ނުޖެހުމުގައި ތިއްބާ ، އަދި ޒުބާއާހުރެ ސައިމް ޖަލަށްލެވިފައިވަނިކޮށް ، ޒުބާގެ މަންމަ އެގެޔަށް ދިޔައިމަ ސައިމްގެ މައިންބަފައިންގެ ފަރާތުން ޒުބާގެ މަންމަމެންނަށް  ކިޔާނީ ކޮންކަހަލަ މަރުޙަބާއެއްކަމެއް ނޭނގެއެވެ. އެހެންވީމާ ކޮންމެވެސް ބަހަނާއެއް ދައްކައިގެން މަންމަ އެގެޔަށްދިއުން ހުއްޓުވުމަށް ރޮޝްނާގާތު ޒުބާ އެދުނެވެ.

ކުރިންވެސް އެއްބަސްވެފައި އޮތްގޮތަށް ، ޒުބާއާއި ސައިމް އެރޭ ބައްދަލުކުރިއެވެ. ކޮޓަރީގައި ސައިމް ނެތީމަ ، ސައިމް އެދިޔައީ ޒުބާއާ ބައްދަލު ކުރަންކަން ފާއިޤާ ދެނެގަތެވެ.

ޒުވާން ޢުމުރުގައި މީހަކުދެކެ ލޯބިވެގެން ހިތަށް ލިބޭނެ އިޙްސާސްތަކާ ބެހޭގޮތުން ، ޒުބާ މަޢުލޫމާތު ހޯދަމުން ގެންދިޔައީ ދައްތަ ، ރޮޝްނާގެ ފަރާތުންނެވެ. އެ ދެބެން ނިދަނީ އެއް އެނދެއްގައެވެ. އެހެންކަމުން އެ ދެބެންނަށް ނިދެނީ އެކަމާބެހޭގޮތުން ވާހަކަ ދައްކައި މަޖާކުރަން ތިއްބައެވެ.

ލޯތްބަކީ ކިހާވަރެއްގެ އެއްޗެއްކަމެއް ، ޒުބާއަކަށް އަދި ނޭނގެއެވެ. އޭގެ ޖަޒުބާތާއި އިޙުސާސުގައި ހުންނަނީ ކިހާވަރެއްގެ ވޭނެއްކަމެއް ޒުބާއަކަށް އިޙުސާސެއް ނުވާނެއެވެ. ރޮޝްނާ އޭނާގެ ކޮއްކޮއަށް ދޭ ނަޞޭޙަތަކީ ، ލޯބީގެ މަގުން ޒުބާއަށް މިހާރު ދެވިފައި އެހުރި ހިސާބުގައި ހުއްޓި ، އިތުރަށް ކުރިޔަށް ނުދިއުމެވެ. އެއީ ، އަދި ޒުބާއާ އެކަށީގެންވާ ކަމެއްނޫނެވެ. ޒުބާއަކީ ކިޔަވާ ޢުމުރުގެ ކުއްޖެކެވެ. ޒުބާގެ މުސްތަޤްބަލް ގުޅިފައިވަނީ ކިޔެވުމާއެވެ. ޑޮކްޓަރަކަށް ވުމަށް ޒުބާގެ ބައްޕަ ކުރާ އުއްމީދު ފުރިހަމަކޮށްދިނުމެވެ. ޒުބާއަކީ ، ކިޔެވުމަށް މޮޅު ކުއްޖެކެވެ. ތޫނުފިލި ކުއްޖެކެވެ. އެއީ ، އެ ޢާއިލާގެ އެހެންކުދިންނަށް ލިބިފައިނެތް ހުނަރެކެވެ. ރޮޝްނާވެސް އެހުރީ އިބްތިދާއީ ތަޢުލީމާ ހަމައިން ކިޔެވުމާ ދުރުވެފައެވެ. މިހާރު އެ އުޅެނީ މީހަކާ އިންނަން ވެގެންނެވެ. ލޯބީގެ އެ ހިތި ތަޖުރިބާތަކާއި ، ހާސްކަމާ އަދި ތަކުލީފުތައް ޒުބާގެ ހިތަށް ތަދުކުރާ ކަމެއްގެ ގޮތުގައި އޮވެގެން ، ޒުބާގެ ކިޔަވާ ޢުމުރު ބަރުބާދުވެގެންދާކަށް ރޮޝްނާ ބޭނުމެއް ނޫނެވެ.

ލޯބީގައި ދައްތަ އެގެންގުޅޭ އިދިކޮޅު ވިސްނުމަކީ ، ޒުބާއަށް އެހާ ފަސޭހައިން ޤަބޫލުކުރެވުނު ވިސްނުމަކަށް ނުވިއެވެ. އެހެނަސް ، އެކަމާބެހޭގޮތުން އެހާބޮޑަށް ބަޙުސްކުރާކަށް ޒުބާއަކަށް އަދި ނޭނގެއެވެ. ލޯބި ދިފާޢުކޮށް ވާހަކަ ދައްކާކަށްވެސް ޒުބާއަކަށް އަދި ނޭނގެއެވެ. އެނގޭހާވެސް ކަމަކީ ، އޭނާގެ ހިތުގައިވެސް ލޯތްބެއް އުފެދިގެން އަންނަ ކަމެވެ. އެއީ ސައިމް ފެނުނީމަ އަދި ސައިމްއާ ވާހަކަ ދައްކައިލެވުނީމަ ، ހިތަށް ވަންނަ އިޙްސާސެކެވެ. ކުރިޔަށްވުރެ ބޮޑަށް ސައިމްއާ އޭނާއަށް ގާތްވެވޭކަމެއްވެސް ޒުބާއަކަށް އިޙްސާސެއް ނުވެއެވެ. ލޯތްބަކީ ، ދަގަތްފާނަށް ދަނގަނޑު ދަމާހެން ، ދެ ޒުވާނެއްގެ މެދުގައި ދަމާބާރެއް ހުންނަ އެއްޗެއްކަމެއް ޒުބާއަކަށް ނުވެސް އެނގެއެވެ.

ދައްތަ އެ ދައްކާ ވާހަކަތައް އަޑުއަހާފައި ، ފިރިހެނަކުދެކެ ލޯބިވާނީ މުސްކުޅި ޢުމުރަށް އެޅީމާ ކަމުގައި ޒުބާ ނިންމައެވެ. އެހެނަސް ، ޒުބާގެ ހިތުގައި އޮތް ލޯބީގެ ޖަޒުބާތުތައް ، އެހާދުވަހަށް ކެތްކޮށްގެން ހިތުތެރޭ ފޮރުވާފައި ބޭއްވިދާނެ ބާވައެވެ ؟

ކުރިން އޮތް ގާތްކަން ފާއިޤާމެންގެ ފަރާތުން ނުފެންނަ ކަހަލަ އިޙްސާސެއް ، ޒުބާގެ މަންމައަށް ކުރެވޭކަން ފާހަގަ ކުރެވިގެން އެކަމާ ޒުބާއާ ސުއާލު ކުރިއެވެ. ސައިމް ޖަލަށް ލެވުނީ ޒުބާއާ ބެހޭގޮތުން ، ސައިމްގެ ރަޙުމަތްތެރިޔަކު އެއްޗެއް ބުނެގެން އޭނާ ގައިގާ ތަޅައިގަނެގެންކަން ޒުބާގެ މަންމަމެންނަށްވެސް މިހާރު އޮތީ ، އެނގިފައެވެ. އެކަމަކު ، ސައިމް އާއި ޒުބާއާ ދެމެދު ގާތްގުޅުމެއް އުފެދުނުކަމެއް އެއްވެސްމީހަކަށް ނޭނގެއެވެ. ކިރިޔާވެސް އެއްޗެއް އެނގެންޏާ އެނގެނީ ޒުބާގެ ދައްތަ ރޮޝްނާ އަށެވެ.

ސައިމްއަށް އެކުރެވުނު ކަމަކީ ކުޑަކަމެއް ނޫނެވެ. އަދި ، އެކަމުން ސައިމް ސަލާމަތް އެވީ އޭނާގެ ނަޞީބު ރަނގަޅުކަމުންނެވެ. އެކަހަލަ އިތުރުކަމެއް ސައިމްގެ ފަރާތުން ހިނގައިފިނަމަ ، އޭނާ ކޮލެޖުން ކަނޑައިލާނެކަމުގެ އިންޒާރު ، ފާއިޤާވަނީ ސައިމްއަށް ދީފައެވެ. ޢާންމު ގޮތެއްގައި ފިރިހެންދަރިންނަށް އެކަހަލަ އިންޒާރުދެނީ ބައްޕައެވެ. ސައިމްއަށް އިންޒާރު އެދިނީ މަންމައެވެ.

އަންހެންކުދިންނަށް އިޙްތިރާމް ކުރުމަށް ، ފާއިޤާވަނީ ސައިމްގާތު ބުނެފައެވެ. އެކަން ސައިމް އޭނާގެ މަންމަޔަށް ހަނދާން ކޮށްދިނެވެ. ޒުބާއާއި ސައިމްއަކީ ، ކުޑައިރުއްސުރެ އެކުގައި އުޅޭ ދެ ރަޙުމަތްތެރިންނެވެ. އެހެންކަމަށް ވަންޏާ ޒުބާއާ ދިމާލަށް މީހަކު ހުތުރު އެއްޗެތި ކިޔާ އަޑުއިވުނީމަ ، އޭނާ ހިމޭނުން ހުންނަންވީތޯ ސައިމް ، އޭނާގެ މަންމަޔާ ސުއާލު ކުރިއެވެ.

" ޝަހީރު އެއައީ ޒުބާއާ ދިމާކުރަމުންނެވެ. ހުތުރު އެއްޗެތިވެސް ކިޔައި ، ޒުބާގެ ފޮޓޯނަގައި ، ފޮޓޯހަދައިގެން ސޯޝަލްމީޑިއާގައި ޖަހައި ، ޒުބާ ފަޟީޙަތް ކުރަމުންނެވެ. ޒުބާގެ އެއްވެސް ކުށެއް ނެތެވެ. ކުޑައިރުގެ އަވަށްޓެރި ރައްޓެއްސަކަށް އެކަހަލަ ކަމެއް ދިމާވީމަ ، އޭނާގެ އަބުރު ސަލާމަތް ނުކޮށް ހުންނަންވީ ހެއްޔެވެ ؟ " ސައިމް އޭނާގެ މަންމަޔާ ސުއާލު ކުރިއެވެ.

އެއީ މައްސަލައެއް އޮތްކަމެއްނޫނެވެ. ރަޙުމަތްތެރިން ޙިމާޔަތްވެސް ކޮށްދޭން ޖެހޭނެއެވެ. އެކަމަކު ، ފާއިޤާގެ މައްސަލަޔަކަށްވީ ، ސައިމް އެކަން ކުރަން އުޅުމެވެ. އެކަމުގެ ތެރެޔަށް ސައިމް ވަންނަންވީ ކީއްކުރަން ހެއްޔެވެ ؟ ސައިމް ދައްކަމުން ގެންދިޔަ އެއްވެސް ވާހަކައެއް ފާއިޤާއަކަށް ޤަބޫލެއް ނުކުރެވުނެވެ. ފާއިޤާ ބޭނުންވަނީ ، ސައިމް އަމިއްލަޔަށް މަސައްކަތް ކޮށްގެން ޒުބާއާ ދުރުވުމެވެ. އެއީ ފާއިޤާވެސް އަދި އިބްރާހީމްވެސް ބޭނުންވާ ގޮތެވެ.  ސައިމްއަށް ޒުބާއާ ދުރުނުވެވިއްޖިއްޔާ ، ޒުބާގެ މައިންބަފައިންގާތު ބުނެގެން ، އެކަން ކުރުވާނީ ފާއިޤާކަމުގައި ބުނެ ، ސައިމްއަށް ފާއިޤާ އިންޒާރު ދިނެވެ.  ( ނުނިމޭ )